ເຈົ້າແຂວງອຸດົມໄຊ ມອບເຄື່ອງຊ່ວຍເຫລືອຜູ້ປະສົບໄພພິບັດ 2 ເມືອງ



ຂປລ. ເມື່ອບໍ່ດົນມານີ້,  ທ່ານ ຄໍາພັນ ເຜີຍຍະວົງ ເຈົ້າແຂວງອຸດົມໄຊ ແລະ ພະແນກການກ່ຽວຂ້ອງ ໄດ້ນຳເອົາເງິນ ແລະ ເຄື່ອງອຸປະໂພກ-ບໍລິໂພກ ໄປມອບໃຫ້ຄະນະພັກອົງການປົກຄອງເມືອງແບງ ແລະ ເມືອງຮຸນ ເພື່ອປະກອບສ່ວນໃນການແກ້ໄຂໄພພິບັດທີ່ເກີດຂຶ້ນໃນໄລຍະຜ່ານມາ ແລະ ຊ່ວຍເຫລືອປະຊາຊົນຜູ້ທຸກຍາກຂາດເຂີນ.

 ເຄື່ອງທີ່ນຳໄປມອບໃນຄັ້ງນີ້ ແມ່ນໄດ້ຮັບການອຸປະຖຳຈາກພາກລັດ, ສຳນັກງານອົງການ ລັດວິສາຫະກິດ, ບໍລິສັດ ຫ້າງ, ຮ້ານ ຕະຫລອດບຸກຄົນ ນິຕິບຸກຄົນພາຍໃນແຂວງອຸດົມໄຊ ເພື່ອຊ່ວຍເຫລືອຜູ້ປະສົບໄພ, ໃນນັ້ນ ໄດ້ມອບເງິນສົດ ຈຳນວນ 30 ລ້ານກວ່າກີບ, ນ້ຳດື່ມ 300 ແກັດ, ເສື້ອແຂນຍາວ 300 ຜືນ ແລະ ໝີ່ໄວໄວ 13 ແກັດ ແລະ ມອບໃຫ້ເມືອງຮຸນ ໂດຍສະເພາະແມ່ນບ້ານຕາດຕະແລ ປະກອບມີເຂົ້າສານໜຽວ 1 ໂຕນ ມູນຄ່າ 6 ລ້ານກວ່າກີບ ແລະ ເຄື່ອງນຸ່ງເດັກນ້ອຍ ຈໍານວນ 5 ແກັດ ເພື່ອມອບໃຫ້ແກ່ຄອບຄົວທຸກຍາກ ທີ່ຂາດເຂີນເຄື່ອງນຸ່ງຫົ່ມ ແລະ ຂາດເຂົ້າກິນໃນຈຳນວນເປົ້າໝາຍ 23 ຄອບຄົວ.

ໃນໂອກາດນີ້, ຄະນະພັກ-ອຳນາດການປົກຄອງເມືອງ ແລະ ອົງການປົກຄອງບ້ານດັ່ງກ່າວກໍໄດ້ສະແດງຄວາມຂອບອົກຂອບໃຈມາຍັງ ຄະນະພັກ, ອົງການປົກຄອງແຂວງ ທີ່ມີຄວາມເປັນຫ່ວງເປັນໄຍ ຕໍ່ການແກ້ໄຂ-ຟື້ນຟູສະພາບໄພພິບັດ ແລະ ຊີວິດການເປັນຢູ່ຂອງພໍ່ແມ່ປະຊາຊົນ ພ້ອມທັງຢຶນຢັນວ່າ ຈະນຳເອົາເງິນທີ່ໄດ້ຮັບໄປໝູນໃຊ້ເຂົ້າໃນການແກ້ໄຂໄພພິບັດ ໃຫ້ເກີດປະໂຫຍດສູງສຸດ ແລະ ນຳເອົາເຄື່ອງທີ່ໄດ້ຮັບໃນຄັ້ງນີ້ໄປມອບໃຫ້ຖືກຕ້ອງຕາມເປົ້າໝາຍ.

ຂ່າວ: ສີຈັນ ເກດວົງສາ

Post a Comment

0 Comments