ຄຶກຄື້ນຊ່ວງເຮືອໃນບຸນອອກພັນສາປະວໍລະນາແຂວງໄຊຍະບູລີ ພສ 2562


ໄຊຍະບູລີ:  ບຸນອອກພັນສາປະວໍລະນາ ແລະ ຊ່ວງເຮືອປະຈໍາປີ ພສ 2562 ຢູ່ ແຂວງໄຊຍະບູລີ ໄດ້ຈັດຂຶ້ນຢ່າງຄຶກຄື້ນ ກິດຈະກໍາຫຼັດໃນງານງານເທດສະການບຸນອອກພັນສາ ແມ່ນການແຂ່ງຂັນຊ່ວງເຮືອ ສະເພາະປີນີ້ມີເຮືອເຂົ້າຮ່ວມແຂ່ງຂັນ ເພດຊາຍມີ 20 ລໍາ, ເພດຍິງມີ 16 ລໍາ ແລະ ເຮືອສູດມີ 7 ລໍາ. ໂດຍການແຂ່ງຂັນໄດ້ຈັດຂຶ້ນໃນລະຫວ່າງວັນທີ 13-14 ຕຸລານີ້ ທີ່ສາຍນໍ້າຮຸ່ງບ້ານບົ່ງ ໂດຍໃຫ້ກຽດເຂົ້າຮ່ວມຊົມ ແລະ ເຊຍ ຂອງທ່ານ ສົມສະຫວາດ ເລັງສະຫວັດ ອາດິດຮອງນາຍົກລັດຖະມົນຕີແຫ່ງ ສປປ ລາວ, ທ່ານ ເຄໂຊ ທາເກວາກະ ເອກອັກຄະລັດຖະທູດປະຈໍາ ສປປ ລາວ, ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ, ມີການນໍາຂອງສູນກາງ, ຂອງແຂວງ, ຂອງເມືອງ, ແຂກພາຍໃນ ແລະ ຕ່າງແຂວງເຂົ້າຮ່ວມຢ່າງຫຼວງຫຼາຍ.



 ໃນພິທີ ທ່ານ ບຸນແທນ ທີແກ້ວ ເຈົ້າເມືອງໄຊຍະບູລີໄດ້ກ່າວເປີດງານບຸນຊ່ວງເຮືອປະຈໍາປີ 2019 ເຊິ່ງທ່ານໄດ້ກ່າວວ່າ: ການຈັດງານເທດສະການອອກພັນສາປະວໍລະນາ ແລະ ບຸນຊ່ວງເຮືອປະຈໍາປີ ພສ 2562 ກໍ່ເພື່ອເປັນການອານຸລັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມທີ່ເປັນເອກະລັກຂອງຊາດ, ຂອງທ້ອງຖິ່ນ ທັງເປັນການສ້າງຄວາມສາມັກຄີປອງດອງມິກຕະພາບ, ການຮ່ວມມືທີ່ດີ ໄປພ້ອມກັບການສົ່ງເສີມໂຄສະນາການທ່ອງທຽວ ແລະ ປຸກລະດົມຂະບວນການປົກປັກຮັກສາສະພາບແວດລ້ອມໃຫ້ຍືນຍົງຕະຫຼອດໄປ. ສະເພາະງານບຸນຊ່ວງເຮືອໃນປີນີ້ ມີເຮືອເຂົ້າແຂ່ງຂັນ 3 ປະເພດຄື: ເຮືອໄວປະເພນີເພດຍິງ ມີ 16 ລໍາ, ເຮືອໄວປະເພນີເພດຊາຍມີ 20 ລໍາ ແລະ ເຮືອສູດມີ 7 ລໍາ. 


ຜົນການແຂ່ງຂັນເຮືອໄວເພດຍິງ ອັນດັບທີ I ເຮືອບ້ານນາຕໍໃຫຍ່ ໄດ້ຮັບຂັນເງິນ ນໍ້າໜັກ 1,5kg ພ້ອມເງິນສົດ 12 ລ້ານກີບ. ອັນດັບທີ II ເຮືອບ້ານທ່ານາ ໄດ້ຮັບຂັນເງິນ 1 kg ພ້ອມເງິນສົດ 7 ລ້ານກີບ, ທີ່ III ເຮືອບ້ານນາລາ ໄດ້ຮັບຂັນເງິນ 0,5kg ພ້ອມເງິນສົດ 5 ລ້ານກີບ. 

ເຮືອໄວເພດຊາຍ ອັນດັບທີ I ບ້ານສີເມືອງຄຸນ ໄດ້ຮັບຂັນເງິນ ນໍ້າໜັກ 1,5kg ພ້ອມເງິນສົດ 12 ລ້ານກີບ. ອັນດັບທີ II ເຮືອບ້ານສີເມືອງ ໄດ້ຮັບຂັນເງິນ 1 kg ພ້ອມເງິນສົດ 7 ລ້ານກີບ, ອັນດັບທີ III ເຮືອບ້ານນາລາ ໄດ້ຮັບຂັນເງິນ 0,5kg ພ້ອມເງິນສົດ 5 ລ້ານກີບ ແລະ ເຮືອສູດອັນດັບທີ I ເຮືອບໍລິສັດຈັນທະວົງ ໄດ້ຮັບຂັນເງິນ  1,5kg ພ້ອມເງິນສົດ 7 ລ້ານກີບ, ອັບດັບທີ II ເຮືອບໍລິສັດອຸທຸມພອນ ໄດ້ຮັບເງິນສົດ 6 ລ້ານກີບ, ອັນດັບທີ III ເຮືອບ້ານແກ້ງ ໄດ້ຮັບເງິນສົດ 5 ລ້ານກີບ, ອັນດັບທີ IV ເຮືອບໍລິສັດອຸທຸມພອນ 2 ໄດ້ຮັບເງິນສົດ 4 ລ້ານກີບ. 

ໃຫ້ກຽດມອບລາງວັນເຮືອຊະນະເລີດ ແລະ ຮອງຊະນະເລີດແຕ່ລະປະເພດໂດຍແມ່ນທ່ານ ສົມສະຫວາດ ເລັງສະຫວັດ ອາດີດຮອງນາຍົກລັດຖະມົນຕີແຫ່ງ ສປປ ລາວ ແລະ ທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີຕາມລໍາດັບ.

ຂ່າວ: ບຸນທີ

Post a Comment

0 Comments