ເມືອງອາດສະພອນ ຈັດງານບຸນຊ່ວງເຮືອປະຈຳປີ ພສ 2562



ໃນລະຫວ່າງວັນທີ 24-25 ຕຸລາ 2019 ຜ່ານມານີ້ ໄດ້ມີການຈັດງານບຸນຊ່ວງເຮືອປະຈຳປີ ພສ 2562 ຂຶ້ນທີ່ໜອງສະໃຫຍ່ ບ້ານທາດດອກແກ້ວ ເມືອງອາດສະພອນ ແຂວງສະຫວັນນະເຂດ, ໂດຍການເຂົ້າຮ່ວມຂອງ ທ່ານ ປອ ກົງຈັກ ໜໍ່ແກ້ວ ຄະນະປະຈຳພັກແຂວງ ຫົວໜ້າພະແນກການເງິນແຂວງສະຫວັນນະເຂດ, ພາຍໃຕ້ການເປັນປະທານຈັດງານຂອງ ທ່ານ ຄຳແພງ ເພັດທຸມພອນ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ມີບັນດາທ່ານການນຳຂອງເມືອງ, ແຂກຖືກເຊີນ, ການນຳເມືອງອ້ອມຂ້າງ, ຕະຫຼອດຮອດກຫົວໜ່ວຍທຸລະກິດເຂົ້າຮ່ວມຍ່າງເບີກບານມ່ວນຊື່ນ.


 ງານບຸນຊ່ວງເຮືອ ປະຈຳປີ 2562 ທີ່ເມືອງອາດສະພອນປີນີ້ ມີເຮືອເຂົ້າຮ່ວມແຂ່ງຂັນທັງໝົດ 25 ທີມສີພາຍ, ທີມຍິງ 7 ທີມ, ຜ່ານການແຂ່ງຂັນເປັນເວລາ 2 ວັນເຕັມເຫັນວ່າທີມທີ່ສາມາດຍາດໄດ້ທີໜຶ່ງ ປະເພດທີມຊາຍແມ່ນ: ເຮືອກອງພັນ94 ລອຍລຳເຂົ້າເສັ້ນໄຊເປັນອັ່ນດັບທີ 01 ໄດ້ຮັບຂັນໜຶ່ງໜ່ວຍ ພ້ອມດ້ວຍເງິນສົດ 3 ລ້ານກີບ, ຮອງຊະນະເລີດແມ່ນເຮືອຈາກຈຸດສຸມໂນນມີໄຊ ໄດ້ຮັບເງິນສົດ 2 ລ້ານກີບ, ອັນດັບທີສາມແມ່ນເຮືອ ປກສ ເມືອງ ໄດ້ຮັບເງິນສົດ 1 ລ້ານກີບ ແລະອັນດັບທີສີ່ແມ່ນເຮືອ ບ້ານວັງໄຮ1 ໄດ້ຮັບເງິນສົດ 5 ແສນກີບ, ອັ່ນດັບທີໜຶ່ງປະເພດທີມຍິງແມ່ນ ເຮືອເຈົ້າແມ່ມັງກອນແດງ ບ້ານວັງໄຮ1 ໄດ້ຮັບຂັນ 1 ໜ່ວຍພ້ອມດ້ວຍເງິນສົດ 3 ລ້ານກີບ, ຮອງຊະນະເລີດແມ່ນເຮືອຫ້ອງການສຶກສາທິການ ແລະກິລາເມືອງ ໄດ້ຮັບເງິນສົດ 2 ລ້ານກີບ, ອັນດັບທີສາມແມ່ນເຮືອຫ້ອງການສາທາລະນະສຸກເມືອງ ໄດ້ຮັບເງິນສົດ 1 ລ້ານກີບ ແລະອັນດັບທີສີ່ແມ່ນເຮືອຈາກບ້ານວັງໄຮ ໄດ້ຮັບເງິນສົດ 6 ແສນກີບ ໃຫ້ກຽດມອບຂອງຂວັນລາງວັນໂດຍ ທ່ານ ປອ ກົງຈັກ ໜໍ່ແກ້ວ ມອບໃຫ້ຢ່າງສົມກຽດ.

ພາບ ແລະ ຂ່າວ
ສົມຈິດ ແກ້ວສີຖາທິລາດ

Post a Comment

0 Comments