ບຸນຊ່ວງເຮືອ ເມືອງວຽງຄໍາ ຈະຈັດວັນທີ 26-27/10/2019



ພິທີດັ່ງກ່າວຈັດຂື້ນ ໃນຕອນເຊົ້າ ວັນທີ 09 ຕຸລາ 2019, ທີ່ຫ້ອງປະຊຸມ ຫ້ອງວ່າການປົກຄອງເມືອງວຽງຄຳ ໂດຍພາຍໃຕ້ການເປັນປະທານຂອງທ່ານ ບຸນສອນ ເພັດລາວັນ ຮອງເຈົ້າແຂວງ ໆ ວຽງຈັນ, ທ່ານ ພອນແກ້ວ ຂຸນພົນ ເຈົ້າເມືອງໆ ວຽງຄຳ, ທ່ານ ແກ້ວເພັດ ເສນາຄຳ ຮອງຫົວໜ້າພະແນກສຶກສາທິການ ແລະ ກິລາ ແຂວງ ວຽງຈັນ, ມີບັນດາອະນຸກຳມະການຕ່າງໆເຂົ້າຮ່ວມ.

​ທ່ານ ແກ້ວເພັດ ເສນາຄຳ ຮອງຫົວໜ້າພະແນກສຶກສາທິການ ແລະ ກິລາ ແຂວງ ວຽງຈັນ ໄດ້ຂື້ນລາຍງານການກະກຽມຄວາມພ້ອມດ້ານຕ່າງໆ ໃນການຈັດງານ ບຸນຊ່ວງເຮືອປະຈຳປີ 2019 ຂອງແຂວງ ວຽງຈັນ.




​ເພື່ອເປັນການສົ່ງເສີມ ແລະ ອະນຸລັກວັດທະນະທຳຮີດຄອງປະເພນີອັນດີງາມຂອງປະຊາຊົນຊາວແຂວງວຽງຈັນ ເວົ້າສະເພາະປະຊາຊົນຊາວລ້ອງງື່ມ ທີ່ເຄີຍປະຕິບັດກັນມາ ທັງເປັນການສົ່ງເສີມການທ່ອງທ່ຽວທາງດ້ານວັດທະນະທຳ - ຮີດຄອງປະເພນີ ຢູ່ພາຍໃນແຂວງ ວຽງຈັນໃຫ້ມີບັນຍາກາດ ຟົດຟື້ນມ່ວນຊື່ນ ແລະ ທັງເປັນການຜູກແໜ້ນຄວາມສາມັກຄີ ສ້າງຄວາມສະໜິດສະໜົມ ເຊິ່ງກັນ ແລະ ກັນ ທັງເປັນການຝຶກແອບນັກກິລາພາຍເຮືອຂອງແຂວງ ວຽງຈັນ ເພື່ອກະກຽມເຂົ້າຮ່ວມໃນງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງ ຊຽງຂວາງ.

​ງານບຸນຊ່ວງເຮືອ ປະຈຳປີ 2019 ທີ່ແຂວງວຽງຈັນປີນີ້ ມີ 3 ລາຍການຄື : ເຮືອປະເພນີ ຊາຍ 55 ສີພາຍ, ເຮືອກິລາ 12 ສີພາຍ ຍິງ ແລະ 12 ສີພາຍຊາຍ ໂດຍເປັນການເປີດກວ້າງ ບໍ່ກຳນົດເຮືອ ແລະ ບໍ່ກຳນົດສີພາຍ ແຕ່ຕ້ອງເປັນຄົນລາວ ຖືສັນລາວ, ສຳລັບສະຖານທີ່ແຂ່ງຂັນແມ່ນກຳນົດເອົາ ສາຍນໍ້າງື່ມ ເຂດທ່ານໍ້າງື່ມ ຫ້ອງວ່າການປົກຄອງແຂວງວຽງຈັນ ໂດຍເລີ່ມຈະເລີ່ມຂື້ນ ໃນວັນທີ 26 – 27 ຕຸລາ 2019 ນີ້.

ໃນຕອນທ້າຍ ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ ຍັງໄດ້ເຊີນຊວນ ພໍ່ແມ່ພີ່ນ້ອງ ລຸງປ້ານ້າອາ ກໍຄືແຂກທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມງານບຸນຊ່ວງເຮືອປະຈຳປີ ທີ່ແຂວງວຽງຈັນໃນປີນີ້, ແນ່ນອນວ່າມີຫລາຍກິດຈະກຳພາຍໃນງານ ເພື່ອເປັນການຮັດແໜ້ນຄວາມສາມັກຄີ ແລະ ເປັນການສະເຫຼີມສະຫຼອງວັນສຳຄັນຕ່າງໆຂອງພັກ ຂອງຊາດນໍາອີກ.


Post a Comment

0 Comments