ວິທະຍາໄລກະສິກຳ ແລະປ່າໄມ້ແຂວງຈໍາປາສັກຈັດງານຕະຫຼາດນັດແຮງງານຄັ້ງທີ 2



ວິທະຍາໄລກະສິກຳ ແລະປ່າໄມ້ແຂວງຈໍາປາສັກຈັດງານຕະຫຼາດນັດແຮງງານຄັ້ງທີ 2 ຂຶ້ນ ໃນວັນທີ 29 ຕຸລາ 2019 ຢູ່ທີ່ສະໂມສອນຂອງວິທະຍາໄລ ໂດຍເປັນປະທານຂອງທ່ານ ຄໍາສະຫວ່າງ ສົມບູນຂັນ ຜູ້ອຳນວຍການວິທະຍາໄລກະສີກໍາ ແລະ ປ່າໄມ້ແຂວງຈໍາປາສັກ,ເຂົ້າຮ່ວມມີທ່ານ ເພັດສະໝອນ ຖະນາສັກ ຮອງຫົວໜ້າກົມຈັດຕັ້ງ  ພະນັກງານ ກະຊວງກະສິກຳ ແລະ ປ່າໄມ້,ທ່ານ ຄໍາໃບ ສິງສຸວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ,ມີຜູ້ປະກອບການທຸລະກິດພາກສ່ວນຕ່າງໆ ຕະຫຼອດຮອດພະນັກງານຄູອາຈານ,ນັກຮຽນນັກສຶກສາປີສຸດທ້າຍເຂົ້າຮ່ວມຢ່າງຫຼວງຫຼາຍ.
         ໃນພິທີ ທ່ານ ຄໍາສະຫວ່າງ ສົມບູນຂັນ ຜູ້ອຳນວຍການວິທະຍາໄລກະສີກໍາ ແລະ ປ່າໄມ້ແຂວງຈໍາປາສັກ ໄດ້ກ່າວໄຂງານຕະຫຼາດນັດແຮງງານຢ່າງເປັນທາງການ ໂດຍກ່າວວ່າ: ງານຕະຫຼາດນັດແຮງງານຄັ້ງທີ 2 ນີ້ ມີຄວາມສໍາຄັນຄັນຫຼາຍຕໍ່ນັກສຶກສາ ເພາະວ່າຈຸດປະສົງຂອງງານແມ່ນ ເພື່ອເປີດໂອກາດໃຫ້ນັກສຶກສາທີ່ຮຽນຈົບແລ້ວ ແລະ ກຳລັງຈະຮຽນຈົບໄດ້ລົງທະບຽນສະໝັກວຽກເຮັດງານທໍາ ຕາມຄວາມສາມາດ ແລະວິຊາການຂອງຕົນທີ່ໄດ້ຮຽນມາເຊັ່ນ: ພາກວິຊາທຸລະກິດກະສິກໍາ,ປູກຝັງ,ລ້ຽງສັດ,ການປະມົງ, ປ່າໄມ້,ວິທະຍາສາດ ແລະ ວິໄຈດິນ ,ເຮັດແນວໃດເພື່ອຫຼີກເວັ້ນບໍ່ໃຫ້ນັກສຶກສາທີ່ຮຽນຈົບໄປແລ້ວ ຂາດວຽກເຮັດງານທໍາຄືກັບໄລຍະທີ່ຜ່ານມາ,ຈາກນີ້ກໍເປັນທາງເລືອກທີ່ດີໃຫ້ແກ່ຫົວໜ່ວຍທຸລະກິດ,ບໍລິສັດຫ້າງຮ້ານຕ່າງໆ ຄັດເລືອກເອົາວິຊາການເຫຼົ່ານີ້ ເຂົ້າເຮັດວຽກຕາມຕໍ່າແໜ່ງງານທີ່ມີຄວາມຕ້ອງການອີກດ້ວຍ.
        ພາຍໃນງານຕະຫຼາດນັດແຮງງານຄັ້ງນີ້,ບັນດາຫົວໜ່ວຍທຸລະກິດ,ບໍລິສັດ ຫ້າງຮ້ານຍັງໄດ້ນໍາສະເໜີສະພາບການດໍາເນີນທຸລະກິດຂອງຕົນ,ຕໍາແໜ່ງງານ ຫຼືວີຊາການທີ່ຫົວໜ່ວຍທຸລະກິດຢາກໄດ້ ໃຫ້ແກ່ຜູ້ເຂົ້າຮ່ວມງານໄດ້ຮັບຊາບ ເຊີ່ງທຸລະກິດສ່ວນໃຫຍ່ແມ່ນເຮັດກິດຈະການການຜະລິດປູກຝັງ -ລ້ຽງສັດ ເຊັ່ນ:ການປູກ ແລະ ຜະລິດກາເຟ,ຖົ່ວລຽນ,ມັນຕົ້ນ,ເພາະພັນປາ,ກ້າເບ້ຍໄມ້,ລ້ຽງປາ ແລະອື່ນໆ .ຈາກນີ້ບັນດານັກສຶກສາທີ່ສົນໃຈຕໍາແໜ່ງງານໃດກໍລົງທະບຽນເຂົ້າເຮັດວຽກຕາມຄວາມສະໝັກໃຈຂອງຕົນ ພ້ອມທັງໄດ້ຮ່ວມກິດຈະກຳຖາມ-ຕອບຄວາມຮູ້ກ່ຽວກັບການປູກຝັງ,ລ້ຽງສັດ,ການດໍາເນີນທຸລະກິດຂອງພາກສ່ວນຕ່າງໆ ເພືອເອົາລາງວັນດ້ວຍບັນຍາກາດຟົດຟື້ນ.

ເກດສະໜາ ແກ້ວສຸວັນນະແສງ

Post a Comment

0 Comments