ສຳເລັດໂຄງການ ທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ



ໃນວັນທີ 30 ຕຸລາ 2019  ນີ້ໄດ້ມີພິທີປິດໂຄງການທຳມະຍາຕາ 5 ແຜ່ນດີນລຸ່ມແມ່ນໍ້າຂອງ ຢູ່ ຣາຊະອານາຈັກ ກຳປູເຈຍ ພາຍຫລັງດຳເນີນມາເປັນເວລາ 17 ມື້ ໂດຍມີ ສົມເດັດອັກຄະຣະມາຫາສັງຄະຣາຊາ ເທບວົງ ແຫ່ງ ຣາຊະອານາຈັກ ກຳປູເຈຍ ເປັນປະທານຝ່າຍສົງ ແລະ ສົມເດັດ ພິໄຊເສນາ ພົນເອກ ເຕຍບັນ ຮອງນາຍົກລັດຖະມົນຕີ ແລະ ລັດຖະມົນຕີ ກະຊວງປ້ອງກັນປະເທດ ແຫ່ງ ຣາຊະອານາຈັກ ກຳປູເຈຍ ເປັນປະທານ ຝ່າຍຄາລະວາດ ໃນນັ້ນຝ່າຍລາວມີ ທ່ານ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.




 ໂຄງການທຳມະຍາຕາ 5 ແຜ່ນດິນ ລຸ່ມແມ່ນໍ້າຂອງຄັ້ງທີ 2  ໄດ້ດຳເນີນກິດຈະກຳທາງພຸດທະສາສະໜາ ແຕ່ວັນທີ 14-30 ຕຸລາ 2019 ເຊິ່ງມີພິທີເປີດ ທີ່ວັດພະທາດຜາເງົາ ເມືອງຊຽງແສນ ແຂວງຊຽງລາຍ ປະເທດໄທ ໃນວັນທີ 15 ຕຸລາ 2019 ໂດຍມີພະສົງພາກສ່ວນກ່ຽວຂ້ອງ ແລະ ພຸດທະສາສະນິກະຊົນ ຂອງປະເທດ ລາວ, ໄທ, ຫວຽດນາມ, ກຳປູເຈຍ ແລະ ມຽນມາເຂົ້າຮ່ວມ100 ກວ່າຄົນ, ຂະບວນທຳມະຍາດຕາຄັ້ງນີ້ໄດ້ເຄື່ອນໄຫວກິດຈະກຳຕ່າງໆຢູ່ຕາມວັດ ແລະ ສະຖານທີ່ສຳຄັນທາງສາສະໜາຂອງແຕ່ລະປະເທດ ເປັນຕົ້ນ ແມ່ນໃສ່ບາດ, ປູກຕົ້ນພະສີມະຫາໂພ ຫລື ຕົ້ນໂພ, ຢ້ຽມຊົມສະຖານທີ່ສຳຄັນທາງສາສະໜາ ແລະ ວັດທະນະທຳ, ສວດມົນ ແລະ ສະແດງທຳ, ປະຕິບັດກຳມະຖານ ແລະ ອື່ນໆ ເຊິ່ງພາຍຫລັງເປີດພິທີທາງການແລ້ວ ຄະນະດັ່ງກ່າວ ໄດ້ໄປວັດພະທາດສາຍເມືອງ ເມືອງທ່າຂີເຫລັກ, ວັດພະທາດມະຫາມຸນີ, ໂຮງຮຽນຫົວຂ່ວງປະລິຍະຕິທຳ ກຳລັງກໍ່ສ້າງເປັນໂຮງຮຽນສົງ, ວັດພະທາດຈອມຄຳ, ວັດຊຽງຢືນ ເມືອງຊຽງຕຸງ ປະເທດມຽນມາ; ເດີນທາງໄປ ວັດຫລິນກວາງ, ວັດຫລິ່ນເຊີນ, ຢ້ຽມຊົມສານເຈົ້າແຖນບານຟູ, ສວດອຸທິດສວນກຸສົນແກ່ຜູ້ເສຍຊີວິດໃນສົງຄາມດຽນບຽນຟູ ຢູ່ພິພິທະພັນດຽນບຽນຟູ ສສ ຫວຽດນາມ; ທັດສະນະສຶກສາສະຖານທີ່ສຳຄັນຢູ່ແຂວງຫລວງພະບາງ, ວັດຊຽງທອງ, ວັດວິຊຸນນະຣາດ ຫລື ພະທາດໝາກໂມ, ວັດຜາໂອ ເຊິ່ງມີໂຮງຮຽນພະປາຣິຍັດທຳ;  ຢູ່ນະຄອນຫລວງວຽງຈັນ ໄດ້ມີພິທີຕ້ອນຮັບຢ່າງເປັນທາງການຢູ່ວັດພະທາດຫລວງ ແລະ ໄປຢ້ຽມຊົມສະຖານທີ່ສຳຄັນທາງສາສະໜາ ເຊັ່ນ ປະຕູໄຊ, ຫໍພະແກ້ວ, ວັດສີສະເກດ ໄດ້ສະແດງທຳ ແລະ ຈະເລີນກຳມະຖານທີ່ວັດອົງຕື້; ເດີນທາງຈາກນະຄອນຫລວງວຽງຈັນໄປ ວັດປ່າ (ວັງນາຄິນ) ຄຳສະໂໜດ ພ້ອມຊົມສິລະປະວັດທະນະທຳທ້ອງຖິ່ນ ແຂວງອຸດອນທານີ, ວັດພະທາດເຊິງຊຸມວໍລະວິຫານ ແຂວງສະກົນນະຄອນ, ຢ້ຽມຊົມໂບດເຈດີ ແລະ ສິລະປະວັດຖຸໃນວັດມະຫາທາດ, ຢ້ຽມຊົມຊຸມຊົນຊາວໄທເຊື້ອສາຍຫວຽດນາມ ແລະ ບ້ານລຸງໂຮ່ຈິມິນ ແຂວງນະຄອນພະນົມ, ສວດບູຊາພະທາດພະນົມວໍລະວິຫານ, ຢ້ຽມຊົມອານຸສາວະລີພະຍາສີສັດຕະນະຄະລາດ ແລະ ເດີນທາງໄປຣາຊະອານາຈັກ ກຳປູເຈຍ ເພື່ອດຳເນີນພິທີປິດໂຄງການຢູ່ບໍລິເວນສານຫລັກເມືອງ ແຂວງສຽມລຽບ.
 ພາຍຫລັງສຳເລັດພິທີປິດໂຄງການຢ່າງເປັນທາງການແລ້ວ ຂະບວນທຳມະຍາຕາ 5 ແຜ່ນດິນ ກໍ່ໄດ້ເດີນທາງໄປທີ່ ປະສາດບາຍອນ ສວດມົນຖວາຍເປັນພະກຸສົນແດພະເຈົ້າໄຊຍະວໍລະມັນທີ 7 ແລະ ໄປທັດສະນະສຶກສາທີ່ປະສາດນະຄອນວັດ, ຫລັງຈາກນັ້ນໃນວັນທີ 31 ຕຸລາ 2019 ຜູ້ເຂົ້າຮ່ວມໂຄງການດັ່ງກ່າວ ຕ່າງກໍ່ໄດ້ເດີນທາງກັບຄືນປະເທດຂອງຕົນດ້ວຍຄວາມສະຫວັດດີພາບ.
ຂ່າວ-ພາບ: medialaos vientiane capital

Post a Comment

0 Comments