ພະແນກສຶກສາທິການ ແລະ ກິລາ ແຂວງຄຳມ່ວນ ສະເຫຼີມສະຫຼອງ ວັນຄູແຫ່ງຊາດ 7 ຕຸລາ ຄົບຮອບ 25 ປີ


ພະແນກສຶກສາທິການ ແລະ ກິລາ ແຂວງຄຳມ່ວນ ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ (07 ຕຸລາ 1994-07 ຕຸລາ 2019) ໂດຍການເຂົ້າຮ່ວມຂອງທ່ານ ຄຳສີ ອຸດທິວົງ ຮອງເຈົ້າ ແຂວງໆຄຳມ່ວນ, ທ່ານ ສີໄຮ ແກ້ວໄກຖິ່ນ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະ ພະແນກ, ແຂກຖືກເຊີນຈາກພະແນກ ການອ້ອມຂ້າງ, ພະນັກງານອາວຸໂສບຳນານ ຕະຫຼອດເຖິງພະນັກງານຄູ-ອາຈານ ແລະ ນ້ອງນັກຮຽນເຂົ້າຮ່ວມ.


 ທ່ານ ສີໄຮ ແກ້ວໄກຖິ່ນ ໄດ້ເລົ່າເຖິງປະຫວັດຄວາມເປັນມາຂອງວັນຄູແຫ່ງຊາດໂດຍສະເພາະແມ່ນປະຫວັດຂອງນາຍຄູຄຳ ເຊິ່ງເປັນຄູຄົນທຳອິດຂອງຊາດລາວ ພ້ອມທັງຍົກໃຫ້ເຫັນເຖິງຄວາມໝາຍຂອງຄຳວ່າ “ຄູ” ແລະ  ຊື່ສຽງຂອງຄູທີ່ໄດ້ຕິດພັນກັບຂະບວນວິວັດແຫ່ງການພັດທະນາປະເທດຊາດມາແຕ່ລະສະໄໝ. ເພື່ອເຮັດໃຫ້ມີຄວາມສຳນຶກເຖິງຄຸນງາມຄວາມດີຂອງຄູໃນທົ່ວສັງຄົມ ໄດ້ກາຍເປັນພຶດຕິກຳຕົວຈິງ ຈຶ່ງມີຄວາມຈຳເປັນຈະຕ້ອງກຳນົດໃຫ້ມີວັນຄູແຫ່ງຊາດ ໂດຍໄດ້ກຳນົດເອົາວັນເຂົ້າຮັບລາຊະການຂອງນາຍຄູຄຳ ຄື: ວັນທີ 7 ຕຸລາ ເປັນວັນຄູແຫ່ງຊາດ. ນອກນັ້ນຍັງໄດ້ຍົກໃຫ້ເຫັນເຖິງສະພາບການສຶກສາຂອງແຂວງຄຳມ່ວນໃນສົກປີທີ່ຜ່ານມາ ພ້ອມທັງຖືໂອກາດດັ່ງກ່າວປະດັບຫຼຽນກາ ແຮງງານໃຫ້ແກ່ທ່ານ ປອ ເພັດສະໝອນ ພອນວິໄລສັກ ທີ່ໄດ້ປະກອບສ່ວນສ້າງໂຮງຮຽນປະຖົມບ້ານປາກຊີມັງ ລວມມີ ມູນຄ່າ 400 ລ້ານກວ່າກີບ ແລະ ມອບໃບຍ້ອງຍໍຂັ້ນຫົວໜ້າພະແນກສຶກສາທິການ ແລະ ກິລາ ໃຫ້ແກ່ພະນັກງານຄູ-ອາຈານຜູ້ທີ່ມີຜົນງານດີເດັ່ນຈຳນວນ 8 ທ່ານ ແລະ ມອບກະຕ່າຂອງຂັວນໃຫ້ແກ່ພະນັກງານການນຳພະແນກ, ພະນັກ ງານອາວຸໂສບຳນານ ເພື່ອລະນຶກເຖິງຄຸນງາມຄວາມດີທີ່ໄດ້ປະກອບສ່ວນເຂົ້າໃນວຍກງານສຶກສາທິການ ແລະ ກິລາໃນໄລຍະຜ່ານມາ ໃຫ້ມີຄວາມກ້າວໜ້າ ແລະ ປະສົບຜົນສຳເລັດເປັນກ້າວໆມາ. 


 ໃນໂອກາດດັ່ງກ່າວ ທ່ານ ຄຳສີ ອຸດທິວົງ ໄດ້ໂອ້ລົມຕໍ່ພະນັກງານຄູ-ອາຈານ ຈົ່ງໄດ້ສືບຕໍ່ໃນການສ້າງຜົນງານ ໂດຍສະເພາະການຈັດຕັ້ງປະຕິບັດແຜນພັດທະນາການສຶກສາໃຫ້ມີຄວາມກ້າວໜ້າ ເຊິ່ງໃນນັ້ນຕ້ອງແມ່ນຄູເປັນຜູ້ຕັດສິນ ແລະ ຕ້ອງໄດ້ເອົາໃຈໃສ່ໃນການພັດທະນາວິຊາຊີບຂອງຕົນເອງຢ່າງຕໍ່ເນື່ອງ ເຮັດໃຫ້ການສິດສອນນັກຮຽນໃຫ້ມີຄວາມຫຼາກຫຼາຍ ໂດຍສະເພາະແມ່ນໃນຍຸກແຫ່ງໂລກາພິວັດທີ່ມີຂໍ້ມູນຂ່າວສານທີ່ກວ້າງໄກ ຄູຍິ່ງມີຄວາມຈຳເປັນ ແລະ ສຳຄັນທີ່ສຸດໃນການໃຈ້ແຍກ, ວິເຄາະວິໃຈຂໍ້ມູນ ເພື່ອນຳມາສິດສອນແກ່ນັກຮຽນ ເຮັດໃຫ້ນັກຮຽນເກີດການຮຽນຮູ້ຢ່າງແທດ ເໝາະກັບຍຸກສະໄໝ. 
 ໃນໂອກາດສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ ພະແນກສຶກສາທິການ ແລະ ກິລາ ຍັງໄດ້ຈັດການ ແຂ່ງຂັນກິລາ ເຊິ່ງມີ 3 ປະເພດຄື: ກິລາເປຕັງ, ບານເຕະ ແລະ ກິລາດຶງເຊືອກ ລະຫວ່າງພະແນກສຶກສາທິການ ແລະ ກິລາ ກັບບັນດາຂະແໜງການ ແລະ ໂຮງຮຽນອ້ອມຂ້າງ ເພື່ອສ້າງຂະບວນການເຮັດໃຫ້ການສະເຫຼີມສະຫຼອງມີບັນຍາ ກາດຟົດຟື້ນ ແລະ ສ້າງຄວາມສາມັກຄີມິດຕະພາບໃນຂົງເຂດພະນັກງານຄູ-ອາຈານດ້ວຍກັນຕື່ມອີກ.


Post a Comment

0 Comments