ຊົມເຊີຍ! ບໍລິຄຳໄຊ ເປີດບໍລິການຂາຍເຂົ້າລາຄາຖືກ ເພື່ອແຊກແຊງຕະຫຼາດເຂົ້າ ທີ່ມີການຖີບຕົວຂື້ນ


ແຂວງບໍລິຄຳໄຊ ເປີດບໍລິການຂາຍເຂົ້າລາຄາຖືກ ເພື່ອແຊກແຊງຕະຫຼາດເຂົ້າ ທີ່ມີການຖີບຕົວຂື້ນໃນປັດຈຸບັນ.
------------------------------------------------------

ພິທີເປີດຈຸດຂາຍເຂົ້າເພື່ອແຊກແຊງລາຄາ ແລະ ດັດສົມຕະຫຼາດ ພາຍໃນແຂວງບໍລິຄຳໄຊ ໄດ້ຈັດຂຶ້ນໃນຕອນບ່າຍຂອງວັນທີ 30 ກັນຍາ 2019 ຢູ່ຕໍ່ໜ້າອາຄານຫ້ອງການນັກທຸລະກິດໜຸ່ມ ກົງກັນຂ້າມກັບປ້ອມຍາມຕຳຫຼວດຈະລາຈອນ  ບ້ານສີວິໄລ ເມືອງປາກຊັນ ໂດຍການເຂົ້າຮ່ວມເປັນປະທານຂອງທ່ານ ພົນຈັດຕະວາ ຈວງຈັນ ລາດຊະວົງ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານແຂວງ, ທ່ານ ບຸນເພັງ ໄຊສົງຄາມ ຮັກສາການຫົວໜ້າພະແນກອຸດສາຫະກຳ ແລະ ການຄ້າ, ທ່ານ ໄຊຍະເພັດ ຈັນທິສອນ ປະທານສະພາການຄ້າ ແລະ ອຸດສາຫະກຳ ແຂວງບໍລິຄຳໄຊ  ພ້ອມດ້ວຍສະມາຄົມນັກທຸລະກິດໜຸ່ມແຂວງ ເຂົ້າຮ່ວມ.



  ເນື່ອງຈາກສະພາບການຂອງການຜະລິດຢູ່ພາຍໃນປະເທດ ໄດ້ຮັບຜົນກະທົບຈາກໄພພິບັດ ເຮັດໃຫ້ຜົນຜະລິດຂອງປະຊາຊົນບັນດາເຜົ່າ ໄດ້ຮັບການເສຍຫາຍຢ່າງມະຫາສານ ເຮັດໃຫ້ລາຄາສິນຄ້າຢູ່ຕາມທ້ອງຕະຫຼາດມີການເໜັງຕີງ ແລະ ກຸ່ມຄົນທີ່ສວຍໃຊ້ໂອກາດຂຶ້ນລາຄະສິນຄ້າ, ເພື່ອຕອບສະໜອງດ້ານສະບຽງອາຫານໃຫ້ແກ່ປະຊາຊົນບັນດາເຜົ່າໄດ້ບໍລິໂພກສິນຄ້າ ໂດຍສະເພາະແມ່ນເຂົ້າໃນລາຄາຖືກ ໂດຍແຂວງບໍລິຄຳໄຊ ໄດ້ມອບໃຫ້ສະພາການຄ້າ ແລະ ອຸດສາຫະກຳຂອງແຂວງ ນຳເຂົ້າລາຄາຖືກມາແຊກແຊງລາຄາເຂົ້າຢູ່ຕາມທ້ອງຕະຫຼາດທີ່ມີລາຄາແພງ ນັບມື້ນັບສູງຂຶ້ນ.

       ສະນັ້ນ ພັກ-ລັດ ກໍ່ຄືອຳນາດການປົກຄອງແຂວງຈຶ່ງໄດ້ຊີ້ນຳ ໃຫ້ພາກສ່ວນກ່ຽວຂ້ອງ ຊອກຫາທາງອອກເພື່ອຊ່ວຍເຫຼືອສັງຄົມ ໂດຍສະເພາະ ສະພາການຄ້າ ແລະ ອຸດສາຫະກຳແຂວງ ຊື່ງເປັນອົງການຈັດຕັ້ງສະມາຄົມນັກທຸລະກິດ ເປັນຂົວຕໍ່ລະຫວ່າງອົງການຂອງລັດ ແລະ ຫົວໜ່ວຍທຸລະກິດເປັນຕົວແທນໃຫ້ແກ່ຜູ້ໃຊ້ແຮງງານ ໄດ້ຕັດສິນໃຈນຳໃຊ້ທຶນຮອນຂອງຕົນເກັບຊື້ເຂົ້າ ເລີ່ມຫາທາງຊ່ວຍເຫຼືອສັງຄົມ, ການປະຕິບັດວຽກງານດັ່ງກ່າວນີ້ ເຖິງວ່າຈະໜ້ອຍ ແຕ່ກໍ່ແມ່ນຈິດໃຈຂອງພັກ-ລັດ ທີ່ຢາກຊ່ວຍເຫຼືອສັງຄົມໃຫ້ໄດ້ແບ່ງເບົາສະພາບທາງດ້ານລາຄາເຂົ້າໃຫ້ມີຜົນຕອບແທນທີ່ດີຂຶ້ນ.

     ຈຸດຂາຍເຂົ້າໃນຄັ້ງນີ້ ມີທັງໝົດ 3 ຈຸດ ຄື: ຈຸດທີ 1 ຕັ້ງຢູ່ສຳນັກງານນັກທຸລະກິດໜຸ່ມແຂວງ ແຄມທາງເລກທີ 13 ໃຕ້ ໃກ້ກັບສົ້ນຂົວນ້ຳຊັນ, ຈຸດທີ 2 ຢູ່ຫ້ອງການສະຖານີຂົນສົ່ງໂດຍສານທາງແບ່ງວຽງຄຳ ເມືອງປາກກະດິງ ແລະ ຢູ່ຕະຫຼາດບ້ານເວີນທາດ ເມືອງທ່າພະບາດ ແຂວງບໍລິຄຳໄຊ, ສຳລັບເຂົ້າສານໜຽວ ແມ່ນ 6.800 ກີບຕໍ່ໜຶ່ງກິໂລ ແລະ ເຂົ້າສານຈ້າວ 4.800 ກີບຕໍ່ໜຶ່ງກິໂລ.

Post a Comment

0 Comments