ຊົມເຊີຍ! ກຽມເປີດທົດລອງ ການທ່ອງທ່ຽວ ແບບອະນຸລັກ ເຂດໂອງ-ມັ່ງ ເມືອງຊົນນະບູລີ




ສະຫວັນນະເຂດ: ຫລາຍພາກສ່ວນທັງພາກລັດ ແລະ ເອກະຊົນ ໄດ້ເຂົ້າຮ່ວມໃນກອງປະ ຊຸມຜ່ານແຜນການຈັດສັນ, ຄຸ້ມຄອງການທ່ອງທ່ຽວ ແລະ ວາງແຜນກິດຈະກຳການທ່ອງທ່ຽວທຳມະຊາດແບບອະນຸລັກໂອງ-ມັ່ງ ແລະ ເຂດສູນອະນຸລັກລະບົບນິເວດປ່າໂຄກ ທີ່ເມືອງຊົນນະບູລີ ແຂວງສະຫວັນນະເຂດ ແນໃສ່ຊຸກຍູ້ສົ່ງເສີມການທ່ອງທ່ຽວໃນເຂດດັ່ງກ່າວ ໃຫ້ເປັນຮູບປະທຳຫລາຍຂຶ້ນ ເຊິ່ງຄາດວ່າຈະເປີດທົດລອງການ ທ່ອງທ່ຽວໃນທ້າຍປີ 2019 ແລະ ຈະເປີດເປັນທາງການໃນຕົ້ນປີ 2020. 



ທ່ານ ຄຳໄພ ໄຊຍະລາດ ຫົວໜ້າສູນອະນຸລັກລະບົບນິເວດປ່າໂຄກ ໃຫ້ສຳພາດຕໍ່ສື່ມວນຊົນວ່າ: ເຂດທີ່ພົບເຫັນໂຕໂອງ-ມັ່ງຫລາຍທີ່ສຸດແມ່ນຢູ່ໃນບໍລິເວນບໍ່ເອືອດ ທີ່ຢູ່ໃນເຂດຫວງຫ້າມເດັດຂາດ ເຊິ່ງເປັນເຂດປ່າໂຄກຂອບເຂດບ້ານສະໜາມໄຊ, ຕັ່ງຫວາຍນ້ຳ ແລະ ບ້ານໜອງສອງຫ້ອງ ເຊິ່ງມັກຈະພົບເຫັນເປັນປະຈຳ




 ໂດຍສະເພາະຕອນເຊົ້າ ແລະ ແລງ ເຊິ່ງພວກເຮົາໄດ້ກຳນົດເອົາຈຸດນີ້ ເປັນບ່ອນຕັ້ງຫໍຄອຍ ເພື່ອເບິ່ງໂອງ-ມັ່ງ, ສັດປີກ ແລະ ສັດປ່າປະເພດຕ່າງໆ, ອີງຕາມສະຖິຕິຂອງນັກຄົ້ນຄວ້າເຫັນວ່າມີໂຕໂອງ-ມັ່ງ ປະມານ 170 ໂຕ, ເຊິ່ງຄວາມຫວັງພົບໂອງ-ມັ່ງຂອງນັກທ່ອງທ່ຽວແມ່ນສູງເຖິງ 70-80% ເຊິ່ງຕາມຄວາມເຊື່ອຂອງປະຊາຊົນໃນເຂດນີ້ ໂຕໂອງໂຕງມັ່ງ ແມ່ນເປັນສັດແຫ່ງຄວາມໂຊກດີ ໃຜໄດ້ພົບຖືວ່າມີວາດສະໜາ.

Post a Comment

0 Comments