ເຈົ້າແຂວງໄຊຍະບູລີ ຕິດຕາມໂຄງການ ກໍ່ສ້າງອາຄານຮຽນ ມສ ນາປຸ່ງ ເມືອງຫົງສາ



ໄຊຍະບູລີ: ເມື່ອບໍ່ດົນມານີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະນຳຂອງແຂວງ ໄດ້ລົງຢ້ຽມຢາມໂຄງການກໍ່ສ້າງອາຄານໂຮງຮຽນ ມສ ນາປຸ່ງ ເມືອງຫົງສາ ໂດຍທ່ານໄດ້ເນັ້ນໃຫ້ຜູ້ຮັບຜິດຊອບໂຄງການ ຈົ່ງຮີບຮ້ອນໃນການກໍ່ສ້າງອາຄານໂຮງຮຽນ ມສ ນາປຸ່ງໃຫ້ສຳເລັດຕາມສັນຍາທີ່ໄດ້ກຳນົດໄວ້, ສ່ວນພາກລັດຈະສ້າງສິ່ງອຳນວຍຄວາມສະດວກ ດ້ານການພົວພັນຮ່ວມມື ແລະ ປະສານສົມທົບວຽກງານທີ່ປິ່ນອ້ອມ ເພື່ອເຮັດໃຫ້ໂຄງການໄດ້ດຳເນີນຕາມແຜນການ.



ໃນໂອກາດນີ້, ຜູ້ຕາງໜ້າບໍລິສັດ ສົມປະສົງ ກໍ່ສ້າງ ໃນນາມຜູ້ຮັບເໝົາໂຄງການ ໄດ້ໃຫ້ຮູ້ວ່າ: ການກໍ່ສ້າງອາຄານໂຮງຮຽນ ມສ ນາປຸ່ງ ໄດ້ເລີ່ມລົງມືແຕ່ກາງເດືອນເມສາ ມາຮອດປັດຈຸບັນມີຄວາມຄືບໜ້າ 85% ແລະ ຄາດວ່າຈະໃຫ້ສຳເລັດ 100% ໃນທ້າຍເດືອນຕຸລານີ້, ໂດຍປະຕິບັດຕາມບົດບັນທຶກທີ່ໄດ້ເຊັນຮ່ວມກັນໃນຄັ້ງວັນທີ 12 ມີນາ 2019 ໂດຍແມ່ນອຳນາດການປົກຄອງ ແລະ ປະຊາຊົນແຂວງເຊີນລາ ສສ ຫວຽດນາມ ເປັນຜູ້ໃຫ້ທຶນຊ່ວຍເຫລືອລ້າ ມູນຄາ 5 ຕື້ດົງ. ໂຮງຮຽນດັ່ງກ່າວ ສ້າງເປັນອາຄານ 2 ຊັ້ນ, ຂະໜາດ 9x43,5 ແມັດ, ສູງ 10,5 ແມັດ, ໂຄງສ້າງເບຕົງເສີມເຫລັກ, ຝາກໍ່ດ້ວຍດິນຈີ່ພ້ອມໂບກ, ໂຄງຫລັງຄາໄມ້, ມຸງດ້ວຍກະເບື້ອງ, ປະກອບມີ 10 ຫ້ອງຮຽນ ແລະ ຫ້ອງນ້ຳ 4 ຫ້ອງ.

ຂ່າວ: ກິດຕິສັກ ບົວໄລ

Post a Comment

0 Comments