ສະຫວັນນະເຂດ ເອົາໃຈໃສ່ຕິດຕາມປະເມີນຜົນ ຄວາມເປັນຢູ່ຂອງກຸ່ມແຮງງານນອກລະບົບ


ສະຫະພັນກຳມະບານແຂວງສະຫວັນນະເຂດ 
ເອົາໃຈໃສ່ຕິດຕາມປະເມີນຜົນ ຄວາມເປັນຢູ່ຂອງກຸ່ມແຮງງານນອກລະບົບ

ເພື່ອເປັນການຕິດຕາມປະເມີນຜົນ ຄວາມຄືບໜ້າຂອງການຈັດຕັ້ງປະຕິບັດໂຄງການ SGRA ເພື່ອປັບປຸງ-ຍົກລະດັບຄວາມເປັນຢູ່ຂອງແຮງງານນອກລະບົບໃນໄລຍະຜ່ານມາ. ສະນັ້ນມາໃນທ້າຍເດືອນ ກັນຍາ 2019 ສະຫະພັນກຳມະບານແຂວງສະຫວັນນະເຂດ ຮ່ວມກັບ ອົງການຈີລາບ ( JILAF ) ໄດ້ມີການຈັດກອງປະຊຸມ ສຳມະນາຄະນະຮັບຜິດຊອບສາມຝ່າຍຂັ້ນແຂວງ ໃຫ້ກຸ່ມກຳມະກອນປູກຜັກປອດສານພິດ ໃນໂຄງການ SGRA ຂຶ້ນຢ່າງເປັນທາງການ ທີ່ສະພາບ້ານໂພນສິມ ນະຄອນໄກສອນພົມວິຫານ ແຂວງສະຫວັນນະເຂດ, 


ໂດຍການເຂົ້າຮ່ວມຂອງທ່ານ ບຸນລ້ຽງ ຈັນວັນເພັງ ປະທານຄະນະບໍລິຫານງານສະຫະພັນກຳມະບານແຂວງ, ມີ ທ່ານ ກູນາ ເຫຼື່ອມເທພາ ຄະນະປະຈຳພັກນະຄອນ, ທ່ານ ນາງ ຢູກິ ອອັດສະຈິ ຜູ້ຕາງໜ້າອົງການຈີລາບ ປະຈຳປະເທດໄທ, ຕາງໜ້າຈາກສູນກາງສະຫະພັນກຳມະບານລາວ, ອົງການ 3 ຝ່າຍ ຂອງແຂວງສະຫວັນນະເຂດ, ແຂວງຄຳມ່ວນ ແລະ ກຸ່ມປູກຜັກປອດສານພິດ ບ້ານໂພນສິມ ເຂົ້າຮ່ວມຈຳນວນ 48 ທ່ານ, ຍິງ 20 ທ່ານ. 


ຊຶ່ງໃນພິທີ ທ່ານ ແສງສະຫວ່າງ ຫຼວງພະຈະເລີນ ຫົວໜ້າກຸ່ມປູກຜັກປອດສານພິດ ບ້ານໂພນສິມ ກໍ່ຍັງໄດ້ຍົກໃຫ້ເຫັນຄວາມເປັນມາຂອງການສ້າງຕັ້ງກຸ່ມຈົນເຖິງປະຈຸບັນຕື່ມອີກວ່າ: ນັບແຕ່ປີ 2012 ເປັນຕົ້ນມາ ໄດ້ມີອົງການຈັດຕັ້ງ ພັກ-ລັດ ໂດຍສະເພາະກໍ່ແມ່ນ ພະແນກກະສິກຳ-ປ່າໄມ້ແຂວງ ຮ່ວມກັບ ຫ້ອງການກະສິກຳ-ປ່າໄມ້ນະຄອນ ໄດ້ມີການລົງມາຊຸກຍູ້ໃຫ້ແກ່ປະຊາຊົນ ທຳການຜະລິດໃຫ້ເປັນກຸ່ມ ເພື່ອເປັນການສ້າງຜົນຜະລິດ ຕອບສະໜອງໃຫ້ແກ່ກຸ່ມຜູ້ບໍລິໂພກຜັກປອດສານພິດໃຫ້ໄດ້ຢ່າງທົ່ວເຖິງ, ໂດຍໃນເບື້ອງຕົ້ນມີຄອບຄົວ ເຂົ້າຮ່ວມ ໃນກິດຈະກຳສ້າງຕັ້ງກຸ່ມໃນຄັ້ງນັ້ນເຖິງ 37 ຄອບຄົວ ແລະ ພາກລັດກໍ່ໄດ້ມີການບຸກ ເບີກເນື້ອທີ່ດິນປູກຝັງໃຫ້ ຈຳ ນວນ 5 ເຮັກຕາ, ເຈາະນ້ຳບາດານ ແລະ ອື່ນໆ ເພື່ອເປັນການອຳນວຍຄວາມສະດວກໃຫ້ແກ່ການຜະລິດ, ແຕ່ການບຸກເບີກເນື້ອທີ່ດິນດັ່ງກ່າວ ໃຊ້ເວລາບຸກເບີກຫຼາຍເດືອນພໍສົມຄວນ ມາຮອດທ້າຍປີ 2013 ຈຶ່ງສຳເລັດ ແລະ ເຮັດໃຫ້ບາງຄອບຄົວລົ້ມເລີກຄວາມຕັ້ງໃຈລາອອກຈາກກຸ່ມ ເຫຼືອພຽງແຕ່ 7 ຄອບຄົວ. 


ໂດຍການປູກຜັກ ໃນໄລຍະນັ້ນກໍ່ແມ່ນປູກແບບທຳມະຊາດ ບໍ່ທັນມີເຕັກນິກວິຊາການ ເຮັດໃຫ້ການຜະລິດດັ່ງກ່າວພໍແຕ່ກຸ້ມ ຢູ່ກຸ້ມກິນ ແລະ ເກັບໄປຂາຍໄດ້ພຽງ ມື້ໜຶ່ງ 200,000 ກີບ, ພໍມາເຖິງປີ 2017 ສະຫະພັນກຳມະບານແຂວງ ຮ່ວມກັບ ອົງການຈີລາບ ( JILAF ) ຈຶ່ງໄດ້ນຳເອົາຄູຝຶກຜູ້ຊ່ຽວຊານກ່ຽວ ກັບການປູກພຶດ ແລະ ການປະສົມ ປຸ໋ຍແບບອິນຊີ ມາຖ່າຍທອດບົດຮຽນ ແລະ ປະສົບການໃຫ້ພວກເຮົາ ຈຶ່ງເຮັດ ໃຫ້ການຜະລິດ ນັບມື້ນັບດີຂື້ນ ເປັນກ້າວໆ ຈາກມື້ໜຶ່ງ 200,000 ກີບມາເປັນມື້ໜຶ່ງ 400,000 ກີບ ແລະ ມີບາງຄອບຄົວມີລາຍໄດ້ເຖິງ 12 ລ້ານກີບຕໍ່ປີ, ເຮັດໃຫ້ຫຼາຍຄອບຄົວມີຄວາມສົນໃຈເຂົ້າຮ່ວມກຸ່ມໃນ ປັດຈຸບັນເຖິງ 21 ຄອບຄົວ. ມາໃນຕອນ ທ້າຍຂອງກອງປະຊຸມ ຄະນະຮັບຜິດຊອບສາມຝ່າຍຍັງໄດ້ມີການ ຢາຍໃບປະເມີນ ເພື່ອເປັນການຊີ້ວັດ ເຖິງຄວາມປ່ຽນແປງ ຂອງກຸ່ມປູກຜັກປອດສານພິດຈາກເມື່ອກ່ອນມາເຖິງປະຈຸບັນຕື່ມອີກດ້ວຍ.

ຂ່າວ - ພາບ:ວັນນະເລດ ມະນີວົງ.

Post a Comment

0 Comments