ເມືອງສະໝ້ວຍ ມອບຮັບເລຂາພັກເມືອງ-ຮັກສາການເຈົ້າເມືອງ ຄົນໃໝ່



 ວັນທີ 22 ຕຸລາ 2019 ນີ້, ຢູ່ທີ່ຫ້ອງວ່າການປົກຄອງເມືອງສະໝ້ວຍ ແຂວງສາລະວັນ ໄດ້ມີພິທີມອບ-ຮັບໜ້າທີ່ ເລຂາພັກເມືອງ-ຜູ້ຮັກສາການເຈົ້າເມືອງ ຄົນໃຫມ່ ລະຫວ່າງ ສະຫາຍ ບຸນນານ ປັນຍາຈັກ ຮັກສາການເລຂາພັກເມືອງ ເຈົ້າເມືອງສະໝ້ວຍ ຜູ້ເກົ່າ ກັບ ສະຫາຍ ບຸນເຕີ້ຍ ດວງສຸລິຍະວົງສາ ເລຂາພັກເມືອງ ຜູ້ຮັກສາການເຈົ້າເມືອງ ຄົນໃໝ່, ໂດຍໃຫ້ກຽດເຂົ້າຮ່ວມຂອງ ສະຫາຍ ບົວທອງ ຄຸນຍອດປັນຍາ ຮອງເລຂາພັກແຂວງ ຮອງເຈົ້າແຂວງສາລະວັນ, ມີການນຳຂັ້ນແຂວງ, ພະນັກງານກໍ່ສ້າງຮາກຖານ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດການນຳຂັ້ນເມືອງ, ພະນັກງານຫຼັກແຫຼ່ງພາຍໃນເມືອງເຂົ້າຮ່ວມ.

 ໂດຍປະຕິບັດຕາມຂໍ້ຕົກລົງຂອງຄະນະປະຈຳພັກແຂວງສາລະວັນ ເລກທີ 405/ຄຈພຂ.ສວ ລົງວັນທີ 4 ຕຸລາ 2019 ວ່າດ້ວຍການຮັບຮອງເອົາຜົນສຳເລັດການເລືອກຕັ້ງເອົາຄະນະບໍລິຫານງານພັກເມືອງສະໝ້ວຍ ຊຸດໃໝ່ ຄັ້ງທີ VIII ແລະ ຂໍ້ຕົກລົງຂອງທ່ານເຈົ້າແຂວງໆສາລະວັນ ສະບັບເລກທີ 651/ຈຂ.ສວ ລົງວັນທີ 18 ຕຸລາ 2019 ວ່າດ້ວຍການແຕ່ງຕັ້ງ ສະຫາຍ ບຸນເຕີ້ຍ ດວງສຸລິຍະວົງສາ ເລຂາພັກເມືອງ ເປັນຜູ້ຮັກສາການເຈົ້າເມືອງສະໝ້ວຍ ຄົນໃໝ່.

 ຈາກນັ້ນ, ສະຫາຍ ບຸນນານ ປັນຍາຈັກ ຮັກສາການເຈົ້າເມືອງສະໝ້ວຍ ຜູ້ເກົ່າ ກໍ່ໄດ້ຜ່ານບົດລາຍງານການຈັດຕັ້ງປະຕິບັດວຽກງານໃນໄລຍະ 5 ເດືອນຜ່ານມາ ທີ່ໄດ້ຮັບໜ້າທີ່ໃນການຊີ້ນຳໆພາ ເຊີ່ງມີຜົນສຳເລັດຫຼາຍດ້ານ ໂດຍສະເພາະແມ່ນໄລຍະການສຸມໃສ່ກະກຽມກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ VIII ທີ່ໄດ້ຮັບຜົນສຳເລັດຫຼາຍດ້ານ, ພ້ອມທັງໄດ້ມອບສິດ ແລະ ໜ້າທີ່ ໃຫ້ຜູ້ຮັກສາການເຈົ້າເມືອງຄົນໃໝ່ ສືບຕໍ່ຈັດຕັ້ງປະຕິບັດ ແລະ ຊີ້ນຳໆພາ, ຊຸກຍູ້ການພັດທະນາເມືອງສະໝ້ວຍ ໃຫ້ກ້າວໄປເລື້ອຍໆ. 

ພ້ອມດຽວກັນນີ້ ສະຫາຍ ບຸນເຕີ້ຍ   ດວງສຸລິຍະວົງສາ ກໍ່ໄດ້ຂຶ້ນຮັບໜ້າທີ່ ພ້ອມທັງໃຫ້ຄຳໝັ້ນສັນຍາວ່າ: ຈະສຸມທຸກເຫື່ອແຮງ, ສະຕິປັນຍາ ແລະ ຄວາມສາມາດ ສືບຕໍ່ເອົາໃຈໃສ່ຊີ້ນຳໆພາໃຫ້ເມືອງສະໝ້ວຍ ໄດ້ຮັບການພັດທະນາດີຂຶ້ນເລື້ອຍໆ, ເພີ່ມທະວີເຕົ້າໂຮມຄວາມສາມັກຄີເປັນປຶກແຜ່ນໃນໝູ່ຄະນະ, ຍອມຮັບຄຳຕຳນິຕິຊົມ ເພື່ອຖອດຖອດບົດຮຽນເຊີ່ງກັນ ແລະ ກັນ ເພື່ອປັບປຸງລະບົບການຈັດຕັ້ງໃຫ້ດີ ແນໃສ່ຊຸກຍູ້ການພັດທະນາເສດຖະກິດສັງຄົມຂອງເມືອງ ໃຫ້ຂະຫຍາຍຕົວຢ່າງຕໍ່ເນື່ອງ ແລະ ນຳພາປະຊາຊົນ ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.

ໂດຍ: ວິໄລວອນ

Post a Comment

0 Comments