ປະທານສະຫະພັນບານເຕະນາຯຊາດ ໄດ້ເດີນທາງຢ້ຽມຢາມ​ ສປປ​ ລາວ



ວັນເສົາ​ 19​ ຕຸລາ​ 2019​ ທ່ານ Gianni Infantino ປະທານສະຫະພັນບານເຕະນາຯຊາດ​ ຫລື​ ຟີຟາ​ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ​ ລາວ​ ຢ່າງເປັນທາງການ ເຊິ່ງໃນຕອນເຊົ້າ​ ວັນດຽວກັນນັ້ນ​ ໄດ້ເຂົ້າພົບປະກັບ ພະນະທ່ານ  ທອງລຸນ ສີສຸລິດ ນາຍົກລັດຖະມົນຕີ​ ສປປ​ ລາວ​ ຫລັງຈາກນັ້ນແມ່ນໄດ້ເດີນທາງໄປສະຫນາມກິລາແຫ່ງຊາດຫລັກ 16​ ແລະ​ ໃນຕອນແລງແມ່ນໄດ້ເຂົ້າມາຢ້ຽມຢາມ ຫ້ອງການ​ ສະຫະພັນບານເຕະແຫ່ງຊາດລາວ​ ແລະ​ ເຂົ້າຮ່ວມພິທີເປີດ​ ການແຂ່ງຂັນບານເຕະເຍົາວະຊົນ ຊີງ​ຂັນ ສ​ຕ​ລ ລຸ້ນ​ອາ​ຍຸ​ 15 ປີ ປະ​ຈຳ​ປີ 2019.​




ຈຸດປະສົງມາໃນຄັ້ງນີ້ກໍເພື່ອມາຢ້ຽມຢາມບັນດາແຕ່ລະປະເທດທີ່ເປັນສະມາຊິກສະຫະພັນບານເຕະນາຯຊາດ ເຊິ່ງ​ ສປປ​ ລາວ​ ເປັນປະເທດທີ​ 6 ທີ່​ ປະທານ ສະຫະພັນບານເຕະນາຯຊາດມາຢ້ຽມຢາມຕໍ່ຈາກ ເລບານອນ,​ ສປປ ເກົາຫລີ, ມົງໂກລີ,​ ບັງກະລາເທດ, ສປ ຈີນ​ ແລະ​ ສປປ ລາວ.​



ທ່ານ Gianni Infantino ປະທານສະຫະພັນບານເຕະນານາຊາດ (FIFA) ແມ່ນຢ້ຽມຢາມ ສປປ ລາວ ເປັນຄັ້ງທໍາອິດເຊິ່ງເປັນຄົນສັນຊາດ: ສະວິດ​ ຖືກເລືອກຕັ້ງເປັນປະທານສະຫະພັນບານເຕະນານາຊາດ (FIFA) ກາງສະໄໝ ໃນປີ 2016-2019​ ແລະ​ ຖືກເລືອກຕັ້ງອີກຄັ້ງ ໃນປີ 2019-2023,​ ຄັ້ງລ່າສຸດທີ່ປະທານ​ ສະຫະພັນບານເຕະນາຯຊາດ (FIFA) ໄດ້ມາຢ້ຽມຢາມ ສປປ ລາວ ແມ່ນປີ 2011 ໂດຍທ່ານ Joseph Blatter ສັນຊາດສະວິດ.



ສຳລັບ​ ໂຄງການໂຄງລ່າງພື້ນຖານທີ່ສະຫະພັນບານເຕະແຫ່ງຊາດລາວ ໄດ້ຮັບການຊ່ວຍເຫຼືອຈາກສະຫະພັນບານເຕະນານາຊາດ (FIFA). 

- ໂຄງການ FIFA Goal Project I: ສ້າງອາຄານຫໍພັກຊາຍ ແລະ ຫ້ອງອາຫານ (2001) ຈໍານວນ 300,000 ໂດລ່າສະຫະລັດ.​
- ໂຄງການ FIFA Goal Project II: ສ້າງອາຄານພະແນກເຕັກນິກວິທະຍາ ແລະ ພັດທະນາ ແລະ ເດີ່ນຟຸດຊໍໃນຮົ່ມ (2007) ຈໍານວນ 300,000 ໂດລ່າສະຫະລັດ.​
- ໂຄງການ FIFA Goal Project III: ສ້າງອາຄານຫໍພັກຍິງ (2009) ຈໍານວນ 300,000 ໂດລ່າສະຫະລັດ.​
- ໂຄງການ FIFA Goal Project IV: ສະໜາມຫຍ້າທຽມ ຢູ່ຫ້ວຍຫົງ (2012) ຈໍານວນ 300,000 ໂດລ່າສະຫະລັດ
- ໂຄງການ FIFA Challenger Project: ສະໜາມຫຍ້າທຽມ ຢູ່ຫ້ວຍຫົງ (2014) ຈໍານວນ 250,000 ໂດລ່າສະຫະລັດ.​
- ໂຄງການ FIFA Goal Project V: ສ້າງອາຄານຫ້ອງການບໍລິຫານ (2015) ຈໍານວນ 550,000 ໂດລ່າສະຫະລັດ
- ໂຄງການ FIFA Goal Project VI: ສ້າງຫໍພັກນັກກິລາ ແລະ ຄູຝຶກ ຢູ່ເຂດຫຼັກ 16 (2015) ຈໍານວນ 550,000 ໂດລ່າສະຫະລັດ.​




ຟີຟ່າ ໄດ້ຊ່ວຍເຫຼືອງົບປະມານບໍລິຫານສະຫະພັນບານເຕະແຫ່ງຊາດລາວ ກໍຄືສະຫະພັນບານເຕະປະເທດອື່ນໆທີ່ເປັນສະມາຊິກ ຈໍານວນ 1,000,000 ໂດລ່າສະຫະລັດ ເຊິ່ງຕ້ອງນໍາໃຊ້ງົບປະມານດັ່ງກ່າວເຂົ້າໃນໜ້າວຽກດັ່ງນີ້: ການຈັດການແຂ່ງຂັນບານເຕະຊາຍ ແລະ ຍິງ,​ ການສົ່ງທີມຊາດຊາຍ ແລະ ຍິງ ເຂົ້າຮ່ວມການແຂ່ງຂັນລະດັບພາກພື້ນ ແລະ ສາກົນ,​ ການຈັດການແຂ່ງຂັນບານເຕະເຍົາວະຊົນຊາຍ ແລະ ຍິງ,​ ການສົ່ງທີມຊາດລຸ້ນເຍົາວະຊົນຊາຍ ແລະ ຍິງ ເຂົ້າຮ່ວມການແຂ່ງຂັນລະດັບພາກພື້ນ ແລະ ສາກົນການນໍາໃຊ້ລະບົບໄອທີໃນການລົງທະບຽນ ແລະ ຈັດການແຂ່ງຂັນ,​ ການພັດທະນາກໍາມະການຕັດສິນ, ການພັດທະນາຄູຝຶກ​ ແລະ​ ການພັດທະນາບານເຕະຂັ້ນພື້ນຖານ



Post a Comment

0 Comments