ຢາເສບຕິດຍັງແຜ່ຫຼາຍ ແລະ ເປັນບັນຫາຮ້າຍແຮງໃນແຂວງຈໍາປາສັກ



ທ່ານ ພັນໂທ ສີວິໄລ ແກ້ວປະເສີດ ຮອງຫົວໜ້າກອງບັນຊາການ ປກສ ແຂວງຈໍາປາສັກ ລາຍງານວ່າ: ໃນປີ 2018 ແລະ 6 ເດືອນ ປີ 2019 ທົ່ວແຂວງຈໍາປາສັກ ສາມາດແກ້ໄຂ ແລະ ມ້າງຄະດີຢາເສບຕິດໄດ້ທັງໝົດ 484 ລາຍ, ກັກຕົວຜູ້ຕ້ອງຫາໄດ້ 983 ຄົນ, ຍິງ 89 ຄົນ, ຕ່າງປະເທດ 15 ຄົນ, ຍິງ 3 ຄົນ, ໃນນັ້ນ ຫວຽດນາມ 10 ຄົນ, ຍິງ 3 ຄົນ, ສັນຊາດໄທ 2 ຄົນ(ຊາຍ) ແລະ ສັນຊາດກໍາປູເຈຍ 3 ຄົນ(ຊາຍ);  ຢຶດເຄື່ອງຂອງກາງ ຢາບ້າ ໄດ້ 424.493 ເມັດ ກັບ 157 ກຼາມ, ຢາໄອ໊ສ໌ 2 ກິໂລກຼາມ ກັບ 16 ຖົງນ້ອຍ ແລະ 57 ຫຼອດນ້ອຍ, ກັນຊາບົດ 10ກິໂລກຼາມ ກັບ 2 ແທ່ງ ແລະ 7 ຖົງນ້ອຍ, ລົດໃຫຍ່ 29 ຄັນ, ລົດຈັກ 222 ຄັນ ແລະ ໂທລະສັບ 620 ໜ່ວຍ. ປະເພດອາວຸດເສິກ ມີ 14 ກະບອກ, ໃນນັ້ນ ປືນ K 59 ຈໍານວນ 3 ກະບອກ, ປືນສັ້ນ CZ 1 ກະບອກ,ປືນດັດແປງ 10 ກະອບກ, ປືນລ່າເນື້ອ(ປືນແກັບ) 17 ກະບອກ, ມີດ ແລະ ງ້າວ ຢ່າງລະ 3 ດວງ, ໝາກແຕກ 1 ໜ່ວຍ ແລະ ທາດລະເບີດ 1 ຊຸດ; ນອກນີ້ ຍັງມີ ປະເພດວັດຖຸມີຄ່າ ແລະ ເອກະສານອື່ນໆອີກ.


ຂໍ້ມູນດັ່ງກ່າວນີ້ ຖືກເປີດເຜີຍໃນວັນທີ 8 ຕຸລາ 2019, ໃນໂອກາດທີ່ແຂວງຈໍາປາສັກ ໄດ້ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 18 ປີ(12/10/2001-12/10/2019) ເຊິ່ງພິທີຈັດຂຶ້ນຢູ່ຫໍວັດທະນະທໍາບັນດາເຜົ່າ ຫຼັກ 7 ນະຄອນປາກເຊ ໂດຍການເຂົ້າຮ່ວມຂອງທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ປະທານຄະນະກໍາມະການກວດກາ ແລະ ຄວບຄຸມຢາເສບຕິດ(ກຄສ) ຂັ້ນແຂວງ, ທ່ານ ພັນໂທ ສີວິໄລ ແກ້ວປະເສີດ ຮອງຫົວໜ້າກອງບັນຊາການ ປກສ ແຂວງ, ພະອາຈານ ສຸວັນ ຈັນທະຣາຊ ປະທານ ອພສ ແຂວງ. ມີການນໍາຂົງເຂດປົກປ້ອງກົດໝາຍ ພ້ອມດ້ວຍການນໍາຈາກພາກສ່ວນກ່ຽວຂ້ອງຂອງແຂວງ, ການນໍາເມືອງ, ນະຄອນ, ນັກທຸລະກິດ, ຜູ້ປະກອບການ, ພະນັກງານນັກຮົບຖັນແຖວກໍາລັງປະກອບອາວຸດ, ຄູ, ອາຈານ ແລະ ນັກສຶກສາ ຈາກສະຖາບັນການສຶກສາພາຍໃນແຂວງ ເຂົ້າຮ່ວມ.


ສ່ວນວຽກງານການດໍາເນີນຄະດີ, ສໍານວນ-ສໍາເນົາ ແລະ ສັ່ງຟ້ອງ ນັ້ນ, ທ່ານ ພັນໂທ ສີວິໄລ ແກ້ວປະເສີດ ຮອງຫົວໜ້າກອງບັນຊາການ ປກສ ແຂວງ ໃຫ້ຮູ້ວ່າ: ໃນໄລຍະປີເຄິ່ງ ໄດ້ສະຫຼຸບຄະດີຢາເສບຕິດ ສົ່ງໃຫ້ອົງການໄອຍະການປະຊາຊົນແຂວງ ທັງໝົດ 506 ລາຍ, ມີຜູ້ຕ້ອງຫາ 882 ຄົນ, ຍິງ 15 ຄົນ, ຕ່າງປະເທດ 15 ຄົນ, ຍິງ 2 ຄົນ, ໃນນັ້ນ ຫວຽດນາມ 11 ຄົນ, ຍິງ 2 ຄົນ, ສັນຊາດໄທ 3 ຄົນ(ຊາຍ) ແລະ ກໍາປູເຈຍ 1 ຄົນ(ຊາຍ); ຄະດີຢາເສບຕິດທີ່ສານຕັດສິນແລ້ວ ມີ 377 ລາຍ, ມີ 618 ຄົນ, ຍິງ 68 ຄົນ, ເຄື່ອງຂອງກາງຄະດີຢາເສບຕິດ ທີ່ສານຕັດສິນແລ້ວ ມີຢາບ້າ 394.258 ເມັດ ນໍ້າໜັກ 38.286,2 ກຼາມ, ຢາໄອ໊ສ໌ 11 ກິໂລກຼາມ ກັບ 393 ກຼາມ ແລະ ກັນຊາ 302 ກຼາມ. ສໍາລັບວຽກງານບໍາບັດປິ່ນປົວຜູ້ຕິດຢາເສບຕິດ ຢູ່ສູນບໍາບັດຫຼັກ 21 ເມືອງປະທຸມພອນ ໃນ 1 ປີ ມີຄົນຕິດຢາເສບຕິດ ເຂົ້າມາບໍາບັດປິ່ນປົວ ແລະ ຟື້ນຟູສຸຂະພາບ ທັງໝົດ 250 ຄົນ, ຍິງ 30 ຄົນ, ໃນນັ້ນ ປິ່ນປົວດີ ແລະ ກັບຄືນສູ່ບ້ານເຮືອນ 197 ຄົນ, ຍິງ 30 ຄົນ, ຍັງສືບຕໍ່ປິ່ນປົວ 53 ຄົນ.

ໃນໂອກາດນີ້ ທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ປະທານ ກຄສ ຂັ້ນແຂວງ ກໍ່ໄດ້ໃຫ້ກຽດມີຄໍາເຫັນ, ເນື້ອໃນບາງຕອນ ທ່ານ ກ່າວວ່າ: ໃນນາມຕາງໜ້າອໍານາດການປົກຄອງແຂວງ ແລະ ໃນນາມສ່ວນຕົວ ຂໍຮຽກຮ້ອງໃຫ້ອໍານາດການປົກຄອງທຸກຂັ້ນ, ທຸກພາກສ່ວນ ແລະ ທຸກອົງການຈັດຕັ້ງໃນສັງຄົມ ຕະຫຼອດຮອດພໍ່ແມ່ປະຊາຊົນ ຕ້ອງເພີ່ມທະວີເອົາໃຈໃສ່ສຶກສາອົບຮົມຊາວໜຸ່ມ-ໄວໜຸ່ມ ແລະ ເຍົາວະຊົນ ໃຫ້ຮັບຮູ້ເຂົ້າໃຈ, ເຫັນໄດ້ເຖິງຜົນຮ້າຍຂອງຢາເສບຕິດ, ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງ ເພື່ອປ້ອງກັນບໍ່ໃຫ້ທຸກຄົນຕົກເປັນທາດຂອງຢາເສບຕິດ; ທັງໃຫ້ເອົາໃຈໃສ່ບໍາບັດປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບ ໃຫ້ຜູ້ທີ່ຕິດຢາເສບຕິດ ໃຫ້ມີສຸຂະພາບແຂງແຮງ ທັງດ້ານຮ່າງກາຍ-ຈິດໃຈ ເພື່ອໃຫ້ກັບຄືນເປັນຄົນດີຂອງສັງຄົມ; 
ຕອນທ້າຍພິທີ ທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈໍາປາສັກ ພ້ອມດ້ວຍການນໍາແຂວງ ແລະ ການນໍານະຄອນປາກເຊ ກໍ່ໄດ້ຮ່ວມຈູດທໍາລາຍຢາເສບຕິດ ປະເພດຢາບ້າ ຈໍານວນ 394.258 ເມັດ ແລະ ຢາໄອ໊ສ໌ 11 ກິໂລກຼາມ ກັບ 393 ກຼາມ ແລະ ກັນຊາ 302 ກຼາມ ເຊິ່ງເປັນເຄື່ອງຂອງກາງຄະດີຢາເສບຕິດ ທີ່ສານຕັດສິນແລ້ວ. 

ແຫລ່ງຂ່າວ:ຫນັງສືພິມຈຳປາໃຫມ່
*** ຂ່າວ-ພາບ: ທູນທອງໃຈ ***

Post a Comment

0 Comments