ສະຖາບັນການເງິນຈຸລະພາກ ຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ



 ໃນວັນທີ 19 ຕຸລາ 2019 ທີ່ຜ່ານມານີ້ ພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງສະຫວັນນະເຂດ ໄດ້ລົງເຄື່ອນໄຫວຝຶກອົບຮົມວຽກງານສະກັດກັ້ນ ແລະ ຕ້ານອັກຄີໄພ ໃຫ້ສະຖາບັນການເງິນຈຸລະພາກພອນມະນີ, ເທບທິດາຄຳ, ສາຍໃຍສຳພັນ ໂດຍມີ ທ່ານ ຮອ ເຂືອງຄຳ ພົມມະລາດ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ພ້ອມດ້ວຍຄະນະ, ມີຄະນະຜູ້ບໍລິຫານ ແລະ ພະນັກງານງານວິຊາການ ທັງ 3ສາຂາເຂົ້າຮ່ວມ


 ທ່ານ ຮອ ເຂືອງຄຳ ພົມມະລາດ ຮອງຫົວໜ້າພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ໄດ້ຂື້ນຜ່ານກົດໝາຍ ວ່າດ້ວຍ ການສະກັດກັ້ນ ແລະ ຕ້ານອັກຄີໄພ, ຍົກໃຫ້ເຫັນບັນຫາທີ່ມັກພາໃຫ້ເກີດອັກຄີໄພຢູ່ຕາມບັນດາໂຮງຈັກໂຮງງານ, ຕະຫຼາດ, ຫ້າງຮ້ານຕ່າງໆ ຕະຫຼອດຮອດບ້ານເຮືອນປະຊາຊົນ ພ້ອມດຽວກັນນີ້ພະນັກງານວິຊາການພະແນກສະກັດກັ້ນ ແລະ ຕ້ານອັກຄີໄພ ກໍ່ໄດ້ອະທິບາຍທິດສະດີເບື້ອງຕົ້ນໃນການປ້ອງກັນ, ການຊ່ວຍເຫຼືອຕົນເອງ ແລະ ຄົນອື່ນໃນຍາມເກີດອັກຄີໄພ, ຍົກໃຫ້ເຫັນຊະນິດໄຟຕ່າງໆ ອົງປະກອບການເກີດໄຟ ແລະ ການນຳໃຊ້ບັ້ງມອດໄຟໃຫ້ຖືກຕ້ອງຕາມແຕ່ລະຊະນິດຂອງໄຟ 


ພ້ອມທັງລົງປະຕິບັດຕົວຈິງໃນການດັບມອດໄຟທີ່ເກີດຈາກແກັສຮົ່ວດ້ວຍມືເປົ່າ, ການດັບມອດໄຟຈາກສາຍແກັສຫຼຸດ, ຮຽນຮູ້ວິທີເຂົ້າຫາຈຸດເກີດໄຟໄໝ້ ແລະ ທິດທາງການເຂົ້າປິດແກັສທີ່ຕິດໄຟໃຫ້ຖືກຕ້ອງແມ່ນໃຫ້ເຂົ້າຈາກທິດເໜືອລົມສະເໜີ, ມີການໃຊ້ບັ້ງມອດໄຟເຂົ້າມອດໄຟຈາກເຕົາແກັສ ແລະ ມອດໄຟຈາກນ້ຳມັນ ທັງນີ້ກໍ່ເພື່ອເຮັດໃຫ້ພະນັກງານ, ກຳມະກອນ ມີຄວາມຮູ້ພື້ນຖານໃນການປ້ອງກັນສະກັດກັ້ນອັກຄີໄພ, ມີຄວາມຮັບຜິດຊອບເປັນເຈົ້າການ ເມື່ອມີໄຟໄໝ້ເກີດຂື້ນສາມາດແກ້ໄຂໄດ້ຢ່າງທັນການ, ມີຜົນເສຍຫາຍນ້ອຍທີ່ສຸດ, ເພື່ອສະກັດກັ້ນອັກຄີໄພ ຢູ່ຕາມສຳນັກງານອົງການ, ໂຮງຈັກໂຮງງານ ຫົວໜ່ວຍທຸລະກິດ,  ຕະຫຼອດຮອດບ້ານເຮືອນປະຊາຊົນ, ເພື່ອປົກປັກຮັກສາຊັບສິນ ຂອງພັກ-ລັດ, ຂອງສ່ວນລວມ ນິຕິບຸກຄົນ ແລະ ຊີວິດຂອງທຸກຄົນ ເຮັດໃຫ້ສັງຄົມໃຫ້ມີຄວາມສະຫງົບປອດໄພ. 

ພາບ-ຂ່າວ : ປກສ ແຂວງ

Post a Comment

0 Comments