ພະແນກຕໍາຫຼວດ ປກສ ເມືອງນາຊາຍທອງ ຕ້ອງປັບປຸງແບບແຜນວິທີເຮັດວຽກ ເພື່ອເຮັດໃຫ້ເມືອງມີຄວາມສະຫງົບຫຼາຍຂຶ້ນກວ່າເກົ່າ


ນະຄອນຫຼວງວຽງຈັນ:   ສະຫາຍ ພັທ ປອ ໄຊເພັດ ບຸດດີ ຄະນະປະຈໍາພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ກ່າວໃນກອງປະຊຸມໃຫຍ່ຄັ້ງທີ IV ຂອງໜ່ວຍພັກພະແນກຕໍາຫຼວດ ປກສ ເມືອງນາຊາຍທອງ ນະຄອນຫຼວງວຽງຈັນ ວ່າ: ບັນດາຄະນະພັກ, ສະມາຊິກພັກ  ພະແນກຕໍາຫຼວດ ປກສ ເມືອງນາຊາຍທອງ ນວ ຕ້ອງເອົາໃຈໃສ່ປັບປຸງແບບແຜນວິທີການເຮັດວຽກ ໃຫ້ຖືກຕ້ອງ, ສອດຄ່ອງຕາມຫຼັກການລວມສູນປະຊາທິປະໄຕຢ່າງເຂັ້ມງວດ, ນໍາພາເປັນໝູ່ຄະນະ, ໂດຍມີການແບ່ງງານໃຫ້ບຸກຄົນຮັບຜິດຊອບລະອຽດ, ການເຮັດວຽກຕ້ອງມີແບບແຜນ, ມີການກວດກາປະເມີນຜົນ ແລະ ມີການສ່ອງແສງລາຍງານ ໃຫ້ຂັ້ນເທິງໄດ້ຮັບຮູ້ຢ່າງເປັນປົກກະຕິ ເພື່ອເຮັດໃຫ້ວຽກງານວິຊາສະເພາະ ມີປະສິດທິພາບສູງຂຶ້ນກວ່າເກົ່າ ແລະ ຕອບສະໜອງແນວທາງຂອງພັກ ໃນການຕ້ານ ແລະ ສະກັດກັ້ນ ບັນດາປະກົດການຫຍໍ້ທໍ້ຕ່າງໆໃນສັງຄົມ, ຕ້ານແນວຄິດສວຍໃຊ້ໂອກາດ, ສວຍໃຊ້ໜ້າທີ່ຕໍາແໜ່ງ, ສໍ້ລາດບັງຫຼວງ, ຫຼິ້ນກິນຟຸ້ມເຟືອຍ ແລະ ຂາດຄວາມຮັບຜິດຊອບ ໃນໜ້າທີ່ວຽກງານທີ່ໄດ້ຮັບມອບໝາຍ; ພ້ອມທັງເພີ່ມທະວີກວດກາສະກັດກັ້ນກຸ່ມຄົນບໍ່ດີ ທີ່ເຄື່ອນໄຫວກໍ່ຄວາມບໍ່ສະຫງົບພາຍໃນເມືອງ ເພື່ອເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີຂຶ້ນກວ່າເກົ່າ. 

     ກອງປະຊຸມໃຫຍ່ຄັ້ງທີ IV ຂອງໜ່ວຍພັກພະແນກຕໍາຫຼວດ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ໄຂຂຶ້ນໃນຕອນເຊົ້າຂອງວັນທີ 24 ຕຸລາ 2019, ຢູ່ສະໂມສອນກອງບັນຊາການ ປກສ ເມືອງນາຊາຍທອງ ນວ, ໂດຍການເປັນປະທານຂອງ ສະຫາຍ ພັຕ ບຸນກອງ ພົມມະວົງສາ ເລຂາໜ່ວຍພັກພະແນກຕໍາຫຼວດ ປກສ ເມືອງນາຊາຍທອງ, ໃຫ້ກຽດເຂົ້າຮ່ວມຂອງ ສະຫາຍ ພັທ ປອ ໄຊເພັດ ບຸດດີ ຄະນະປະຈໍາພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງນາຊາຍທອງ ນວ, ມີບັນດາແຂກຖືກເຊີນ ແລະ ສະມາຊິກພັກສົມບູນ 40 ສະຫາຍ ເຂົ້າຮ່ວມ.

     ໃນກອງປະຊຸມບັນດາສະມາຊິກພັກໜ່ວຍພັກພາຍໃນໜ່ວຍພັກພະແນກຕໍາຫຼວດ ປກສ ເມືອງນາຊາຍທອງ ໄດ້ໃຊ້ສິດປ່ອນບັດເລືອກເອົາຄະນະໜ່ວຍພັກຊຸດໃໝ່; ໃນນີ້, ເລືອກໄດ້ ສະຫາຍ ພັຕ ບຸນກອງ ພົມມະວົງສາ ເປັນເລຂາໜ່ວຍພັກ, ສະຫາຍ ພັຕ ສູນເພັງ ສຸທໍາມະວົງ ເປັນຮອງເລຂາ, ພັຕ ທອງດໍາ ສຸວັນນະດາລາ ເປັນປະທານກວດກາ.

Post a Comment

0 Comments