ໂຮງຮຽນກຽດຕິສັກນາໆຊາດ ມອບເຄື່ອງຊ່ວຍເຫຼືອ ໃຫ້ຜູ້ປະສົບໄພນ້ຳຖ້ວມ ຢູ່ແຂວງສະຫວັນນະເຂດ


 ສະຫວັນນະເຂດ: ເມື່ອທ້າຍອາທິດທີ່ຜ່ານມາ ໂຮງຮຽນກຽດຕິສັກນາໆຊາດ ຮ່ວມກັບ ມູນນິທິກຽດຕິສັກ, ສະມາຄົມຜູ້ປົກຄອງ ແລະ ນັກຮຽນໂຮງຮຽນກຽດຕິສັກນາໆຊາດ ພ້ອມດ້ວຍ ສະຫະພັນບານບ້ວງ ແຫ່ງຊາດລາວ ແລະ ສະໂມສອນບານບ້ວງລາວບອນເລີ ໄດ້ນຳເອົາເຄື່ອງອຸປະໂພກ-ບໍລິໂພກ ເປັນ ຕົ້ນ ເຂົ້າສານ, ນ້ຳດື່ມ, ປ່ອງປາ ແລະ ອື່ນໆ ໄປມອບໃຫ້ໃຫ້ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ 5 ບ້ານ ຂອງເມືອງຊົນນະບູລີ ແຂວງສະຫວັນນະເຂດ, ລວມມູນຄ່າ 40 ລ້ານກວ່າກີບ.



 ທ່ານ ນາງ ຈັນແດງ ແສງວໍລະວົງ ຮອງຜູ້ອຳນວຍການໂຮງຮຽນກຽດຕິສັກນາໆຊາດ ໄດ້ໃຫ້ສຳພາດ ໃນວັນທີ 8 ຕຸລາ 2019 ນີ້ ວ່າ: ເນື່ອງໃນໂອກາດວັນຄູແຫ່ງຊາດ 7 ຕຸລາ  ໂຮງຮຽນກຽດຕິສັກນາໆຊາດ ໄດ້ນໍາເອົາເຂົ້າສານ ຈໍານວນ 3 ໂຕນ, ນໍ້າດື່ມ 300 ແກັດ, ໜີ່ 20 ແກັດ, ປ໋ອງປາ 10 ແກັດ, ຢາສີຟັນ 4 ແກັດ, ແຟັບສັກເຄື່ອງ 6 ແກັດ, ສະບູອາບນໍ້າ 7 ແກັດ ພ້ອມທັງປື້ມຂຽນ, ເກີບ, ເຄື່ອງນຸ່ງ ແລະ ອື່ນໆ ໄປມອບໃຫ້ປະຊາຊົນໂດຍກົງ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ 5 ບ້ານ ຂອງເມືອງຊົນນະບູລີ ຄື: 




ບ້ານລຳພຽນ 172 ຄອບຄົວ, ບ້ານປະໄຢ 39 ຄອບຄົວ, ບ້ານກຸດຕະພານ 47 ຄອບຄົວ, ບ້ານບຶງຊ້າງ 5 ຄອບຄົວ, ບ້ານໜອງບົວລາວ ແລະ  ອີກ 3 ວັດ ຢູ່ເມືອງຊົນນະບູລີ ແຂວງສະຫວັນນະເຂດ. ທັງນີ້, ແນ່ໃສ່ປະກອບສ່ວນເຮັດໃຫ້ຊີວິດການເປັນຢູ່ ຂອງປະຊາຊົນທີ່ໄດ້ຮັບຜົນກະທົບ ດີຂຶ້ນເທື່ອລະກ້າວ ແລະ ກັບຄືນສູສະພາບປົກກະຕິໂດຍໄວ. 



 ໃນໄລຍະຜ່ານມາໂຮງຮຽນກຽດຕິສັກນານາຊາດ ກໍໄດ້ປະກອບສ່ວນຊ່ວຍເຫລືອສັງຄົມ ໂດຍຕະຫລອດ ໂດຍສະເພາະ ດ້ານການສຶກສາ, ດ້ານໄພພິບັດຕ່າງໆ ແລະ ດ້ານອື່ນໆ ທີ່ສັງຄົມມີຄວາມຕ້ອງການ. ພ້ອມດຽວກັນນັ້ນ, ໃນອະນາຄົດ ໂຮງຮຽນກຽດຕິສັກນາໆຊາດ ຍັງຈະສືືບຕໍ່ຊ່ວຍເຫລືອສັງ ຄົມ ໂດຍຜ່ານໂຄງການຕ່າງໆ ຕື່ມອີກ.

Post a Comment

0 Comments