ອົງການໄອຍະການປະຊາຊົນແຂວງໄຊຍະບູລີຖອດຖອນບົດຮຽນໃນການຕິດຕາມກວດກາການດໍາເນີນຄະດີຄ້າມະນຸດ




 ໃນວັນທີ 29 ຕຸລາ 2019 ນີ້ທີ່ຫ້ອງປະຊຸມອົງການໄອຍະການປະຊາຊົນແຂວງໄຊຍະບູລີ ໄດ້ຈັດກອງປະຊຸມແລກປ່ຽນ, ຖອດຖອນບົດຮຽນໃນການຕິດຕາມກວດກາ ການດໍາເນີນຄະດີຄ້າມະນຸດຂຶ້ນ, ໂດຍໃຫ້ກຽດເຂົ້າຮ່ວມມີ ທ່ານ ບຸນຍັງ ຈັນດາລະສານ ຮອງປະທານອົງການໄອຍະການປະຊາຊົນສູງສຸດ, ທ່ານ ສົມເພັດ ຫຼຽນທອງ ປະທານອົງການໄອຍະການປະຊາຊົນແຂວງ, ມີຄະນະອົງການໄອຍະການເຂດ I, ເຂດ II ແລະ  ເຂດ III ພ້ອມທັງຄະນະທີມງານອົງການໄອຍະການປະຊາຊົນສູງສຸດເຂົ້າຮ່ວມ.


 ທ່ານ ສົມເພັດ ຫຼຽນທອງ ປະທານອົງການໄອຍະການປະຊາຊົນແຂວງໄຊຍະບູລີ ໄດ້ລາຍງານຕໍ່ກອງປະຊຸມວ່າ: ອົງການໄອຍະການປະຊາຊົນແຂວງ ແມ່ນໄດ້ເອົາໃຈໃສ່ເຮັດໜ້າທີ່ຕິດຕາມການເຄົາລົບ ແລະ ປະຕິບັດກົດໝາຍເປັນຂັ້ນຕົ້ນ ແລະ ຂັ້ນອຸທອນຄື: ການຕິດຕາມກວດກາການປະຕິບັດກົດໝາຍທົ່ວໄປ, ຕິດຕາມກວດກາການປະຕິບັດກົດ ໝາຍຂອງອົງການສືບສວນ-ສອບສວນ, ຕິດຕາມກວດກາການປະຕິບັດກົດໝາຍໃນການດໍາເນີນຄະດີຢູ່ສານ, ຕິດຕາມກວດກາການປະຕິບັດຄໍາຕັດສິນຂອງສານ ແລະ ຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ. ໃນ 9 ເດືອນມີຜູ້ຖືກຫາທັງໝົດທົ່ວແຂວງ 696 ຄົນ, ຍິງ 95 ຄົນ, ນັກໂທດ 883 ຄົນ, ຍິງ 133 ຄົນ, ຜູ້ຖືກດັດສ້າງ 980 ຄົນ, ຍິງ 46 ຄົນ ແລະ ໄດ້ຮັບຄະດີອາຍາມາກວດກາທັງໝົດ 487 ເລື່ອງ, ແກ້ໄຂແລ້ວ 430 ເລື່ອງ ເທົ່າກັບ 88,30% (ໃນນີ້ມີຄະດີການຄ້າມະນຸດ 2 ເລື່ອງ), ໄດ້ຄົ້ນຄວ້າແກ້ໄຂດ້ວຍການຖະແຫຼງສັ່ງຟ້ອງຜູ້ຖືກຫາຂຶ້ນສານຕາມກົດໝາຍໄດ້ທັງໝົດ 334 ເລື່ອງ, 


ຄະດີສັ່ງຟ້ອງທີ່ພົ້ນເດັ່ນຫຼາຍກວ່າໝູ່ແມ່ນ: ການຄ້າຂາຍ, ການມີຢາເສບຕິດໄວ້ຄອບຄອງ ແລະ ກ່ຽວເຖິງມາດຕະການຕໍ່ຜູ້ອອກຢາເສບຕິດແລ້ວມາເສບ ໃໝ່ມີ 261 ເລື່ອງ, ກວມ 78,14%, ການລັກຊັບຂອງພົນລະເມືອງມີ 44 ເລື່ອງ, ກວມ 13,17% ແລະ ການທໍາມິດສະຈານມີ 33 ເລື່ອງ ກວມ 9,88%, ໄດ້ຄົ້ນຄວ້າອອກມາດຕະການໃຫ້ເຈົ້າໜ້າທີ່ໄປຈັດຕັ້ງປະຕິບັດທັງໝົດ 989 ສະບັບຄື: ອອກຄໍາສັ່ງແນະນໍາ 50 ສະບັບ, ອອກຄໍາສັ່ງຈັບຕົວ 11 ສະບັບ, ອອກຄໍາສັ່ງກັກຂັງພາງ 496 ສະບັບ, ອອກຄໍາສັ່ງຕໍ່ກັກຂັງພາງ 241 ສະບັບ, ອອກຄໍາສັ່ງກວດຄົ້ນເຄຫາສະຖານ 57 ສະບັບ, ອອກຄໍາສັ່ງຍຶດ ແລະ ອາຍັດຊັບ 8 ສະບັບ, ອອກຄໍາສັ່ງປ່ອຍຕົວພາງ 6 ສະບັບ, ອອກຄໍາສັ່ງເປີດການສືບສວນ-ສອບສວນ 5 ສະບັບ, ອອກຄໍາສັ່ງປ່ອຍຕົວນັກໂທດ 92 ສະບັບ, ອອກຄໍາສັ່ງປ່ອຍຕົວຜູ້ຖືກຫາ 23 ສະບັບ. 


ໃນໂອກາດນີ້ຜູ້ເຂົ້າຮ່ວມແມ່ນໄດ້ຮູ້ເຖິງການຕດຕາມກວດກາການດໍາເນີນຄະດີຕ້ານການຄ້າມະນຸດຂັ້ນພະຍາຍາມ, ກໍລະນີສຶກສາຄະດີຄ້າມະນຸດ, ການຕິດຕາມກວດກາໃນການປະຕິບັດກົດໝາຍ ແລະ ການດໍາເນີນຄະດີອາຍາ ຂອງອົງການສືບສວນ-ສອບສວນ, ແນະນໍາບາງວຽກງານກ່ຽວກັບການຕິດຕາມກວດກາໃນການປະຕິບັດກົດໝາຍ ແລະ ການດໍາເນີນຄະດີອາຍາ ຂອງອົງການສືບສວນ-ສອບສວນ.  ກອງປະຊຸມຈະໄດ້ດໍາເນີນເປັນເວລາ 2 ວັນ.

.  ຂ່າວ: ມະໄລວັນ.

Post a Comment

0 Comments