ມອບ-ຮັບໜ້າທີ່ ຫົວໜ້າຫ້ອງວ່າການ ແຂວງໄຊສົມບູນ ຜູ່ເກົ່າ ແລະ ຜູ່ໃໝ່


ໄຊສົມບູນ: ພິທີ ມອບຮັບໜ້າທີ່ ຫົວໜ້າຫ້ອງວ່າການແຂວງໄຊສົມບູນ ຜູ່ເກົ່າ ແລະ ຜູ່ໃໝ່ ລະຫວ່າງ ທ່ານ ແດງ ປະທຸມທອງ, ຫົວໜ້າຫ້ອງວ່າການຜູ່ເກົ່າ ແລະ ທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການຜູ່ໃໝ່ ໄດ້ຈັດຂື້ນໃນຕອນບ່າຍຂອງວັນທີ 3 ຕຸລາ 2019 ນີ້, ທີ່ສະໂມສອນເມືອງອະນຸວົງ. ໂດຍການເຂົ້າຮ່ວມເປັນປະທານ ຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ພ້ອມດ້ວຍພະແນກການ, ອົງການ-ກົມກອງ ອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ແດງປະທຸມທອງ, ຫົວໜ້າຫ້ອງວ່າການແຂວງຜູ່ເກົ່າ ໄດ້ຜ່ານບົດກ່າວລາໜ້າທີ່ ທັງລາຍງານວຽກງານຮອບດ້ານທີ່ຕົນໄດ້ຈັດຕັ້ງປະຕິບັດໃນໄລຍະທີ່ຜ່ານມາ ຊຶ່ງມີຜົນສຳເລັດ ແລະ ຂໍ້ຄົງຄ້າງ ຫລາຍດ້ານ ທີ່ຈະມອບຕໍ່ໃຫ້ຫົວໜ້າຫ້ອງວ່າການຜູ່ໃໝ່ ສືບຕໍ່ຈັດຕັ້ງປະຕິບັດໃນຕໍ່ໜ້າ. ຈາກນັ້ນ ໄດ້ມີພິທີ ເຊັນບົດບັນທຶກ ມອບ-ຮັບໜ້າທີ່ ລະຫວ່າງ ທ່ານ ແດງ ປະທຸມທອງ, ຫົວໜ້າຫ້ອງວ່າການຜູ່ເກົ່າ ແລະ ທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການຜູ່ໃໝ່ ຢ່າງເປັນທາງການ. ໂອກາດດັ່ງກ່າວທ່ານ ເຈົ້າແຂວງ ໄດ້ມີຄຳເຫັນໂອ້ລົມຕໍ່ພິທີ ຊຶ່ງທ່ານໄດ້ສະແດງຄວາມຍ້ອງຍໍ ຊົມເຊີຍ ຕໍ່ທ່ານຫົວໜ້າຫ້ອງວ່າການແຂວງຜູ່ເກົ່າ ທີ່ໄດ້ຜ່ານຜ່າທຸກຄວາມຫຍຸ້ງຍາກນາໆປະການ ຈັດຕັ້ງປະຕິບັດໜ້າທີ່ວຽກງານຂອງຕົນ ດ້ວຍຄວາມເອົາໃຈໃສ່ ຈົນມີບາດກ້າວພົ້ນເດັ່ນຫລາຍດ້ານ ໃນໄລຍະຜ່ານມາ ພ້ອມນີ້ ທ່ານໄດ້ຍົກໃຫ້ເຫັນ ເຫດຜົນຂອງການແຕ່ງຕັ້ງ ຍົກຍ້າຍ ຊັບຊ້ອນ ຂອງພະນັກງານ ຂັ້ນນຳພາຄຸ້ມຄອງ ຊຶ່ງເປັນວຽກປົກກະຕິ ໂດຍອີງໃສ່ຄວາມຮຽກຮ້ອງຕ້ອງການຕົວຈິງ ຂອງໜ້າທີ່ການເມືອງໃນໄລຍະໃໝ່ ພາຍໃຕ້ການຊີ້ນຳຂອງສູນກາງພັກ ພ້ອມດຽວກັນນັ້ນ ທ່ານຍັງໄດ້ເນັ້ນໜັກ ໃຫ້ຫົວໜ້າຫ້ອງວ່າການ ແຂວງຜູ່ໃໝ່ ຈົ່ງສືບຕໍ່ຈັດຕັ້ງປະຕິບັດໜ້າທີ່ການເມືອງ ທີ່ຂັ້ນເທິງມອບໝາຍ ດ້ວຍຄວາມຮັບຜິດຊອບສູງ ໂດຍການເພີ່ມທະວີບົດບາດການນຳພາຂອງຕົນຢ່າງຕັ້ງໜ້າ ແລະ ແຂງແຮງ ແລະ ສືບຕໍ່ພັດທະນາ ແຂວງໄຊສົມບູນ ໃຫ້ມີຄວາມຈະເລີນກ້າວໜ້າ ແລະ ຂະຫຍາຍຕົວຂື້ນເລື້ອຍໆ. 

-ພາບ: ນາງ ຕູດ ຄຳພໍໃຈ; 
ຂ່າວ: ສຸກສັນ ອ້ວນລິທິກຸນ

Post a Comment

0 Comments