ນາຍົກເນັ້ນໜັກ "ຢາກພັດປະເທດຊາດໃຫ້ມີຄວາມກ້າວໜ້າ ຕ້ອງພັດທະນາຄົນ"


ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຮຽກຮ້ອງມາຍັງຜູ້ບໍລິຫານການສຶກສາທຸກຂັ້ນ ໃຫ້ເອົາໃຈໃສ່ສືບຕໍ່ພັດທະນາລະບົບການສຶກສາ ແລະ ພັດທະນາຄູ ໃຫ້ທັນຍຸກທັນໄໝ ແລະ ມີການພັດທະນາຢ່າງຕໍ່ເນື່ອງ ເພື່ອຮັບປະກັນໃຫ້ແທດເໝາະກັບຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງປະເທດ ໃນໂອກາດເຂົ້າຮ່ວມພິທີສະເຫລີມສະຫລອງວັນຄູແຫ່ງຊາດ (7 ຕຸລາ 2019) ຄົບຮອບ 25 ປິ ທີ່ມະຫາວິທະຍາໄລແຫ່ງຊາດ ໃນຕອນບ່າຍມື້ນິ້.

ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຂ່ຳນັບຊົມເຊີຍວັນຄູແຫ່ງຊາດ ຄົບຮອບ 25 ປີ ແລະ ຝາກຄຳຢື້ຢາມຖາມຂ່າວ ຄູ-ອາຈານ ໃນຂອບເຂດທົ່ວປະເທດ ແລະ ໄດ້ຕາງໜ້າໃຫ້ສູນກາງພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ມາຍັງຂະແໜງການສຶກສາ ກໍຄືບັນດາຄູ-ອາຈານ ທີ່ໄດ້ເສຍສະຫລະທຸກກຳລັງໃນການພັດທະນາການສຶກສາ ແລະ ຊັບພະຍາກອນມະນຸດ ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ. 

 “ຢາກພັດປະເທດຊາດໃຫ້ມີຄວາມກ້າວໜ້າ ຕ້ອງພັດທະນາຄົນ ເພາະວ່າຄົນເປັນກຳລັງແຮງໃນການຂັບເຄື່ອນໃນການພັດທະນາປະເທດຊາດ, ແລະ ຢາກໄດ້ຊັບພະຍາກອນມະນຸດທີ່ດີ ຕ້ອງມີລະບົບການສຶກສາທີ່ດີ, ມີການປະຕິຮູບ ແລະ ການປ່ຽນແປງໃຫ້ທັນຍຸກທັນສະໄໝ”.

 ເພື່ອເຮັດໃຫ້ຂະແໜງການສຶກສາມີການພັດທະນາຢ່າງຕໍ່ເນື່ອງ, ລະບົບການສຶກສາ ຕ້ອງເປັນລະບົບທີ່ໄດ້ຮັບການປະຕິຮູບ, ປ່ຽນແປງ ໃຫ້ທັນຍຸກທັນສະໄໝ ແລະ ທັນກັບຄວາມຮຽກຮ້ອງຕ້ອງການຂອງການປ່ຽນແປງໃໝ່. ໃນຂະນະດຽວກັນ ຕ້ອງມີຄູ-ອາຈານ ຜູ້ທີ່ມີຄວາມຮູ້, ຄວາມສາມາດ ແລະ ຜູ້ທີ່ໃຫ້ຄວາມຮູ້ທີ່ດີ ແລະ ເກັ່ງ, ທັນຍຸກ, ທັນສະໄໝ ແລະ ເປັນຜູ້ທີ່ໃຝ່ຮູ້ໃຝ່ຮຽນຢູ່ຕະຫລອດເວລາ.

 ການສຶກສາຕ້ອງມີການປະຕິຮູບແລ້ວປະຕິຮູບອີກ, ປ່ຽນແປງແລ້ວປ່ຽນແປງອີກ ເພາະວ່າຄວາມຮຽກຮ້ອງຕ້ອງການເກີດຂຶ້ນໃໝ່ເລື້ອຍໆ ໃນຍຸກແຫ່ງການເຊື່ອມໂຍງ, ຍຸກໂລກາພິວັດ, ຍຸກ 4.0 ແລະ ແຫ່ງການແຂ່ງຂັນ.

ຂ່າວໂດຍ: ຂປລ

Post a Comment

0 Comments