ພະຍາດອະຫິວາໝູອາຟຣິກາ ລະບາດຢູ່ບ້ານ ໂຮມໄຊ ເມືອງເງິນ ແຂວງໄຊຍະບູລີ

 ຕາມການລາຍງານຈາກຫ້ອງການກະສິກໍາ ແລະ ປ່າໄມ້ເມືອງ ເງິນ ແຂວງ ໄຊຍະບູລີ ໄດ້ໃຫ້ຮູ້ວ່າ: ໃນວັນທີ 21 ກັນຍາ 2019 ຜ່ານມານີ້, ໄດ້ຮັບແຈ້ງຈາກອໍານາດການປົກຄອງ #ບ້ານໂຮມໄຊເມືອງເງິນ ວ່າມີໝູຕາຍຈໍານວນ 17 ໂຕໃວັນນດຽວ ແລະ ວັນຕໍ່ມາມີໝູທະຍອຍຕາຍອີກ 23 ໂຕ, ລວມໝູຕາຍເອງ 40 ໂຕ, ຈາກນັ້ນທີມງານ ຈາກພະແນກກະສິກໍາ ແລະ ປ່າໄມ້ແຂວງ ແລະ ຫ້ອງການກະສິກໍາ-ປ່າໄມ້ເມືອງໄດ້ລົງກວດກາ, ເກັບກໍາຂໍ້ມູນ ແລະ ໄດ້ນໍາເອົາເລືອດຂອງໝູທີ່ຕາຍສົ່ງໄປວິໄຈຢູ່ສູນວິໄຈພະຍາດສັດແຫ່ງຊາດ, ຜົນວິໄຈເຫັນວ່າມີເຊື້ອພະຍາດ ອະຫິວາໝູອາຟະລິກາ, ດັ່ງນັ້ນວິຊາການທີມງານຈາກພະແນກກະສິກໍາ ແລະ ປ່າໄມ້ແຂວງ ແລະ ຫ້ອງການກະສິກໍາ-ປ່າໄມ້ເມືອງ ອໍານາດການປົກຄອງເມືອງເງິນຈຶ່ງໄດ້ລົງເຜີຍແຜ່ຜົນຮ້າຍຂອງພະຍາດດັ່ງກ່າວ, ໃຫ້ປະຊາຊົນໃຫ້ເຂົ້າໃຈຕໍ່ເຫດການດັ່ງກ່າວ, ເມື່ອປະຊາຊົນເຂົ້າໃຈແຈ້ງແລ້ວກໍ່ໄດ້ໃຫ້ການຮ່ວມມື ແລະ ພ້ອມກັນທໍາລາຍໝູໃນຂອບເຂດບ້ານດັ່ງກ່າວ, ດ້ວຍການຂ້າໝູ ແລະ ຂຸດຂຸມຝັງໝູທັງໝົດ, ບ້ານ ໂຮມໄຊ ມີປະຊາຊົນລ້ຽງໝູທັງມົດ 57 ຄອບຄົວ, ມີໝູທັງໝົດ 197 ໂຕ, ໃນນີ້ມີໝູຕາຍເອງແຕ່ວັນທີ 21 ກັນຍາ ຫາ 2 ຕຸລາ ຈໍານວນ 40 ໂຕ, ປະຊາຊົນຂ້າຄົວກິນ 3 ໂຕ, ລະຫວ່າງວັນທີ 1-3 ຕຸລາ, ວິຊາການຂ້າທໍາລາຍຖີ້ມ 154 ໂຕ.


ດ້ວຍຄວາມເປັນຫ່ວງເປັນໄຍຂອງອໍານາດການປົກຄອງແຂວງ, ໃນວັນທີ່ 3 ຕຸລາ ທ່ານ ພົງສະຫວັນ ສິດທະວົງ ພ້ອມດ້ວຍທີມງານ ໄດ້ລົງກວດກາເບິ່ງສະຖານທີ່ເກີດພະຍາດ, ພ້ອມທັງໃຫ້ກໍາລັງໃຈປະຊາຊົນທີ່ໄດ້ຮັບຜົນກະທົບ ແລະ ພະນັກງານວິຊາການທີ່ລົງປະຕິບັດໜ້າທີ່ຕົວຈິງຢູ່ພື້ນທີ່ເກີດພະຍາດ, ໂອກາດດັ່ງກ່າວ ທ່ານ ເຈົ້າແຂວງ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງໃຫ້ຄວາມຮ່ວມມືໃນການທໍາລາຍໝູຖີ້ມ, ບໍ່ໃຫ້ເອົາໝູໄປຊຸກເຊື່ອງ, ທັງນີ້ກໍ່ເພື່ອກໍາຈັດພະຍາດນີ້ໃຫ້ໝົດໄປ, ບໍ່ໃຫ້ມີການແຜ່ລາມໄປສູ່ເຂດອື່ນ ແລະ ຫ້າມປະຊາຊົນລ້ຽງໝູໃນໄລຍະທີ່ພະຍາດພວມລະບາດ, ຮຽກຮ້ອງມາຍັງພະນັກງານທີ່ກ່ຽວຂ້ອງຂອງແຂວງ ແລະ ເມືອງ ສືບຕໍ່ນໍາພາປະຊາຊົນພາຍໃນບ້ານເຮັດອານາໄມ ແລະ ຂ້າເຊື້ອ ຕາມຄອກສັດ, ດ້ວຍການພົ່ນຢາຂ້າເຊື້ອ, ໂຮຍປູນຂາວ ໃຫ້ຖົ່ວເຖິງບໍລິເວນບ້ານ, ບ່ອນທີ່ໝູອາໄສຢູ່, ສືບຕໍ່ເຝົ້າລະວັງ ແລະ ອອກແຈ້ງການບ້ານດັ່ງກ່າວເປັນເຂດສີແດງ, ເຝົ້າລະວັງເຂດເຫຼືອງມົນທົນ 3 ກິໂລແມັດ ແລະ ບັນດາບ້ານໃນຂອບເຂດໃກ້ຄຽງ ຢ່າງໃກ້ສິດ.
 
ໂດຍ: ອຸ່ນເຮືອນ ໂພທິລັກ.

Post a Comment

0 Comments