ເລຂາທິການ ສະຫະພັນບານເຕະແຫ່ງຊາດລາວ ໄດ້ຖືກແຕ່ງຕັ້ງຈາກ FIFA ໃຫ້ເປັນຜູ້ຄວບຄຸມການແຂ່ງຂັນບານໂລກ 2022 ຮອບຄັດເລືອກຮອບ 2 ນັດ


ເລຂາທິການ ສະຫະພັນບານເຕະແຫ່ງຊາດ ໄດ້ຖືກແຕ່ງຕັ້ງຈາກ FIFA ໃຫ້ເປັນຜູ້ຄວບຄຸມການແຂ່ງຂັນບານໂລກ2022 ຮອບຄັດເລືອກຮອບ 2 ນັດແຂ່ງຂັນລະຫວ່າງ ທີມ ຊາດສິງກະໂປ ພົບກັບ ທີມຊາດອຸສເບກິສຖານ ທີ່ສະໜາມກິລາແຫ່ງຊາດສິງກະໂປ ໃນວັນອັງຄານທີ 15 ຕຸລາ 2019 ໂດຍເປັນຄົນລາວຄົນທໍາອິດ ແລະ ຄົນດຽວໃນຕໍາແໜ່ງຜູ້ຄວບຄຸມການແຂ່ງຂັນຂອງ FIFA ແລະ AFC ເຊິ່ງເປັນຕໍາແໜ່ງສໍາຄັນໃນການຈັດການແຂ່ງຂັນບານເຕະ ທີ່ຕ້ອງມີຫນ້າທີ່ເປັນຕົວແທນ FIFA ແລະ AFC ຈັດການແຂ່ງຂັນໃຫ້ເປັນໄປຕາມລະບຽບການແຂ່ງຂັນທີ່ FIFA ແລະ AFC ວາງອອກທຸກໆຂັ້ນຕອນ.​

ທັງນີ້ ທ່ານ ນາງ ກັນຍາ ແກ້ວມະນີ ເປັນ 1 ໃນຜູ້ຄວບຄຸມການແຂ່ງຂັນຍິງ ຈໍານວນ 4 ທ່ານຈາກທະວີບອາຊີ  ທີ່ໄດ້ຮັບການໄວ້ວາງໃຈຈາກ FIFA ໃຫ້ເປັນຜູ້ຄວບຄຸມການແຂ່ງຂັນບານໂລກ 2022 ຮອບຄັດເລືອກໃນຄັ້ງນີ້ ເຊິ່ງຖືວ່າເປັນຄັ້ງປະຫວັດສາດທີ່ FIFA ໄດ້ຄັດເລືອກຜູ້ຄວບຄຸມການແຂ່ງຂັນຍິງເປັນຜູ້ບໍລິຫານຈັດການແຂ່ງຂັນບານໂລກຊາຍໃນໂຊນອາຊີ.




ປະຫວັດການເປັນຜູ້ຄວບຄຸມການແຂ່ງຂັນ ຫລື Match Commissioner ຂອງທ່ານ ນາງກັນຍາ ແກ້ວມະນີ ແມ່ນເລີ່ມຕົ້ນມາຕັ້ງແຕ່ປີ 2007 ຈົນເຖິງປັດຈຸບັນ ເຊິ່ງມີຜົນງານໃນການຄວບຄຸມການແຂ່ງຂັນ ທັງບານເຕະຊາຍ ແລະ ຍິງ ບໍ່ວ່າຈະເປັນການຄວບຄຸມການແຂ່ງຂັນບານເຕະລາຍການ AFC Champions League, AFC Cup, AFC Futsal Club Championship ນອກນັ້ນຍັງມີ AFC Women’s Asian Cup Finals, AFC Women’s Futsal Champshioship, ແລະ ທຸກໆການແຂ່ງຂັນບານເຕະຍິງລຸ້ນອາຍຸຂອງ AFC. ນອກຈາກນັ້ນຍັງໄດ້ຮັບຄັດເລືອກໃຫ້ເປັນ ຜູ້ຄວບຄຸມການແຂ່ງຂັນບານເຕະຍິງ ທີ່ກິລາAsian Games 3 ສະໄຫມຕິດຕໍ່ກັນຄື Guangzhou Asian Games 2010, Incheon Asian Games 2014, Jakartar Palembang Asian Games 2018 ຕະຫລອດຮອດ ການແຂ່ງຂັນ AFF SUZUKI CUP ແລະ ກິລາຊີເກມສອີກດ້ວຍ.​ 

ໃນປີ 2009​ ທ່ານ ນາງກັນຍາ ແກ້ວມະນີ ໄດ້ຮັບການໂຫວດໃຫ້ເປັນ ຜູ້ຄວບຄຸມການແຂ່ງຂັນດີເດັ່ນໃນອາຊີ ແລະ ໄດ້ຮັບລາງວັນ AFC Match Commissioner of the Year 2009. 

ໃນໄວໆນີ້ ທາງ AFC ຍັງໄດ້ແຕ່ງຕັ້ງ ທ່ານ ນາງ ກັນຍາ ໃຫ້ຮັບຫນ້າທີ່ເປັນຜູ້ຄວບຄຸມການແຂ່ງຂັນ AFC CUP Final 2019 ຈະເປັນການຊິງແຊ້ມຄັ້ງທີ 16 ນັບຕັ້ງແຕ່ມີການແຂ່ງຂັນລາຍການນີ້ຂຶ້ນມາ.​ ໃນປີນີ້ຈະເປັນການພົບການລະຫວ່າງທີມຊະນະເລີດຈາກໂຊນອາຊີຕາເວັນຕົກ ຄືສະໂມສອນ Al-Ahed ຈາກ ເລບານອນ ພົບກັບ ທີມຊະນະເລີດຈາກອິນເຕີໂຊນ ຄືສະໂມສອນ 4.25 ຈາກ ສປປ ເກົາຫລີ ເຊິ່ງການແຂ່ງຂັນນັດຊີງແຊ໋ມນີ້ຈະຈັດຂຶ້ນທີ່ ນະຄອນຫຼວງປຽງຢາງ ປະເທດ ສປປ ເກົາຫລີ ໃນວັນທີ 2 ພະຈິກ 2019 ນີ້.

ໂດຍ: ສະຫະພັນບານເຕະແຫ່ງຊາດລາວ

Post a Comment

0 Comments