ອົງຄະນະພັກ ກອງບັນຊາການທະຫານ ແຂວງວຽງຈັນ ສຳເລັດກອງປະຊຸມໃຫຍ່ຄັ້ງທີ V



ກອງປະຊຸມໃຫຍ່ຄັ້ງທີ V ຂອງອົງຄະນະພັກກອງບັນຊາການທະຫານແຂວງວຽງຈັນ ໄດ້ໄຂຂຶ້ນ ແລະ ສຳເລັດລົງ ໃນວັນທີ 24 ຕຸລາ 2019 ຜ່ານມາ ໂດຍການເປັນກຽດເຂົ້າຮ່ວມມີ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ສະຫາຍ ພົນຕີ ແອສະໄໝ ເລືອງວັນໄຊ, ຄະນະປະຈຳພັກ, ຮອງລັດຖະມົນຕີກະຊວງປ້ອງກັນປະເທດ, ພ້ອມດ້ວຍຜູແທນສົມບູນເຂົ້າຮ່ວມ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມ ໄດ້ຮັບຟັງ ແລະ ປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ ແລະ ທິດທາງແຜນການໃນຕໍ່ໜ້າ ທີ່ສະເໜີໂດຍ ສະຫາຍ ພົນຈັດຕະວາ ບຸນມາ ວົງດາລາແສນ ເລຂາຄະນະພັກກອງບັນຊາການທະຫານແຂວງວຽງຈັນ ເຊິ່ງຕະຫຼອດໄລຍະຜ່ານມາ ອົງຄະນະພັກໄດ້ເປັນຫຼັກແຫຼ່ງແກ່ນສານໃນການເຕົ້າໂຮມຄວາມສາມັກຄີ, ເປັນເຈົ້າການຊີ້ນຳ-ນຳພາໃນການເສີມຂະຫຍາຍບົດບາດຂອງພັກ, ສຸມໃສ່ເຮັດໃຫ້ສະ ພາບມີຄວາມສະຫງົບ, ຕັ້ງໜ້າປັບປຸງກໍ່ສ້າງພັກ-ກໍ່ສ້າງກຳລັງມີຄວາມເຂັ້ມແຂງ, ໜັກແໜ້ນຢ່າງຮອບດ້ານ, ສົມເປັນກຳລັງທີ່ໄວ້ເນື້ອເຊື່ອໃຈຂອງພັກ ແລະ ຂອງປະຊາຊົນບັນດາເຜົ່າ, ເຊີດຊູຈິດໃຈ, ນ້ຳໃຈອົງອາດກ້າແກ່ນຂອງກອງທັບ, ຫ້າວຫັນປະຕິບັດ 2 ໜ້າທີ່ຍຸດທະສາດ ໃນເງື່ອນໄຂສະພາບການຂອງໂລກ-ພາກພື້ນທີ່ພວມຜັນແປສະຫຼັບຊັບຊ້ອນ, ອາດເວົ້າໄດ້ວ່າ: ດ້ວຍຄວາມສາມັກຄີ, ຄວາມເປັນເອກະພາບຂອງຄະນະພັກແຕ່ລະຂັ້ນ ບວກກັບຄວາມຕື່ນຕົວ, ຄວາມອົດທົນຜ່ານຜ່າຂອງພະນັກງານ-ສະມາຊິກພັກ ເຮັດໃຫ້ບັນດາເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ IV ຂອງອົງ ຄະນະພັກກອງບັນຊາການທະຫານແຂວງວຽງຈັນ ໄດ້ຮັບການຈັດຕັ້ງຜັນຂະຫຍາຍ ແລະ ມີຜົນສຳເລັດທີ່ໜ້າເພິ່ງພໍໃຈ ບົນພື້ນຖານດັ່ງກ່າວ ເຮັດໃຫ້ບັນຍາກາດຂະບວນການດ້ານຕ່າງໆທົ່ວກົມກອງ ໄດ້ມີທ່າຂະຫຍາຍຕົວຢ່າງໜັກແໜ້ນ ແລະ ມີການຫັນປ່ຽນອັນໃໝ່ຢ່າງຈະແຈ້ງກວ່າເກົ່າ.




ໃນກອງປະຊຸມຄັ້ງນີ້ ບັນດາຜູ້ແທນສົມບູນຈຳນວນ 119 ສະຫາຍ, ຍິງ 4 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກ 1.205 ສະຫາຍ ໃນທົ່ວອົງຄະນະພັກກອງບັນຊາການ ໄດ້ໃຊ້ສິດປ່ອນບັດເລືອກຕັ້ງເອົາຄະນະພັກຊຸດ    ໃໝ່ຈຳນວນ 11 ສະຫາຍ ແລະ ປ່ອນບັດເລືອກເອົາຜູ້ແທນສົມບູນ 12 ສະຫາຍ, ສຳຮອງ 2 ສະຫາຍ ໄປຮ່ວມກອງປະຊຸມໃຫຍ່ຄະນະພັກຂັ້ນເທິງ. ໃນກອງປະຊຸມຄັ້ງປະຖົມມະເລີກ ໄດ້ເປັນເອກະສັນເລືອກເອົາ ສະຫາຍ ພົນຈັດຕະວາ ບຸນມາ ວົງດາລາແສນ ເປັນເລຂາຄະນະພັກ, ເລືອກເອົາ ສະຫາຍ ພັນເອກ ຄຳເຄນ ອຸດຕະມາ ເປັນຮອງເລຂາຄະນະພັກກອງບັນຊາການທະຫານແຂວງວຽງຈັນຊຸດໃໝ່ ເພຶ່ອເປັນຫຼັກແຫຼ່ງນຳພາຈັດຕັ້ງປະຕິບັດມະຕິຂອງກອງປະຊຸມໃຫຍ່ທີ່ໄດ້ກຳນົດໄວ້ໃຫ້ປະກົດຜົນເປັນຈິງ.

ໃນໂອກາດດຽວກັນນີ້ ສະຫາຍ ຄຳພັນ ສິດທິດຳພາ ເລຂາພັກແຂວງ, ເຈົ້າແຂວງໆວຽງຈັນ ໄດ້ຮຽກຮ້ອງໃຫ້ຄະນະພັກຊຸດໃໝ່, ສະມາຊິກພັກ, ພະນັກງານ-ນັກຮົບທຸກສະຫາຍ ຈົ່ງເຊີດຊູຄວາມສາມັກຄີເປັນຈິດໜຶ່ງໃຈດຽວ, ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ເກີດໝາກຜົນຕົວຈິງ, ສ້າງໃຫ້ກົມກອງມີຄວາມໜັກແໜ້ນ, ເຂັ້ມແຂງທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນນຳພາ ເຮັດສຳເລັດໜ້າທີ່ການເມືອງອັນໜັກໜ່ວງ ແຕ່ມີກຽດສະຫງ່າຂອງຕົນ.

ພາບ-ຂ່າວ ໂດຍ: ບຸນມາ ແກ້ວບຸດດາ 

Post a Comment

0 Comments