ໄຂກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ XIII


ຂ່າວ: ໄມພອນ

    ກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ XIII ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 30 ຕຸລາ 2019 ນີ້ ຢູ່ທີ່ສະໂມສອນຂອງແຂວງ ໂດຍພາຍໃຕ້ການເປັນປະທານຂອງສະຫາຍ ວາລີ ຈືນໍເຢັງ ວ່າການເລຂາພັກເມືອງ ເຈົ້າເມືອງໆໄຊ . ເປັນກຽດເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ. ມີ ຄະນະປະຈຳພັກແຂວງ, ກຳມະການພັກແຂວງ, ຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ພະນັກງານອາວຸໂສບຳນານ, ອະດິດການນຳເມືອງ, ຜູ້ແທນສົມບູນ ທີ່​ເປັນ​ຕົວ​ແທນ​ໃຫ້​ແກ່​ສະມາຊິກ​ພັກຈຳນວນ 2.590 ສະຫາຍ, ຍິງ 612 ສະຫາຍທີ່ມາຈາກຄະນະພັກຮາກຖານແລະໜ່ວຍພັກທົ່ວເມືອງໄຊ 128 ສະຫາຍ, ຍິງ 9 ສະຫາຍ ພ້ອມດ້ວຍ ແຂກຮັບເຊີນທີ່ມາຈາກຂັ້ນແຂວງ ແລະ ບັນດາເມືອງຂອງແຂວງ ອຸດົມໄຊ, ເມືອງນ້ຳບາກ ແຂວງຫລວງພະບາງ ເຂົ້າຮ່ວມ.



ກອງປະຊຸມ ສະຫາຍ ວາລີ ຈືນໍເຢັງ ວ່າການເລຂາພັກເມືອງ ເຈົ້າເມືອງໆໄຊ ໄດ້ກ່າວໄຂກອງປະຊຸມ ພ້ອມທັງຜ່ານຮ່າງລາຍງານການເມືອງຂອງຄະນະບໍລິຫານງານພັກເມືອງໄຊ ຊຸດທີ XII. ສະຫາຍ ກ່າວວ່າ ໃນໄລຍະ 5 ປີຜ່ານມາ, ຄະນະ​ພັກ, ອົງການ​ປົກຄອງ ​ແລະ ປະຊາຊົນ​ເມືອງ​ໄຊ ​ໄດ້​ສຸມໃສ່ປະຕິບັດ​ມະຕິ​ກອງ​ປະຊຸມ​ໃຫຍ່​ ​ຄັ້ງ​ທີ XII  ຂອງ​ອົງຄະ​ນະ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ​ 5 ປີ ຂອງ​ເມືອງ ພາຍໃຕ້ການຊີ້ນໍາ-ນໍາພາຂອງຄະນະພັກເມືອງ ແລະ ການໃກ້ຊິດຕິດແທດ ຂອງແຂວງ ສາມາດຮັກສາສະຖຽນລະພາບທາງດ້ານການເມືອງ, ຄວາມສະຫງົບ ແລະ  ຄວາມເປັນລະບຽບຮຽບຮ້ອຍທາງສັງຄົມ, ໄດ້ເອົາ​ໃຈ​ໃສ່​ຊີ້​ນຳ-ນຳພາ ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ຢ່າງຕັ້ງໜ້າ, ​

ສາມາດ​ສືບ​ຕໍ່ຮັກສາຈັ່ງຫວະ​ເຕີບ​ໂຕ​​ຕໍ່​ເນື່ອງ ​ແລະ ຂະຫຍາຍຕົວ​ໃນ​ທຸກ​ດ້ານ, ​ໂຄງ​ປະກອບ​ເສດຖະກິດ​ຫັນ​ປ່ຽນຢ່າງຕັ້ງໜ້າ,ພື້ນຖານ​ໂຄງ​ລ່າງ ​ແລະ ການ​ເຄື່ອນ​ໄຫວ​ວິທະຍາສາດ, ​ເຕັກ​​​ໂນ​ໂລ​ຊີ​ໄດ້​ຮັບ​ການ​ເອົາ​ໃຈ​ໃສ່,ຈັ່ງຫວະ​ເຕີບ​ໂຕ​ເສດຖະກິດ​ຂະຫຍາຍຕົວ ​ໃນ​ລະດັບ 4,55%,​ ທຽບ​ໃສ່​ຄາດໝາຍ​ກອງ​ປະຊຸມ​ໃຫຍ່​ວາງ​ອອກປະຕິບັດໄດ້ 39,56%; ລວມຍອດມູນ​ຄ່າ​ຜົນ​ຜະລິດ​ປະຕິບັດ​ໄດ້ 1.132 ລ້ານກີບ, ທຽບ​ໃສ່​ຄາດໝາຍ​ ປະຕິບັດໄດ້ 101%, ຊຸກຍູ້ສົ່ງເສີມການຜະລິດໃຫ້ກາຍເປັນສິນຄ້າ​ໂດຍ​ສະ​ເ​ພາະ​ແມ່ນ ການປູກໄມ້ອຸດສາຫະກຳ, ປູກພືດເປັນສິນຄ້າ, ການລ້ຽງສັດ, ການປັບປຸງພຶ້ນຖານໂຄງລ້າງ ເຊັ່ນ: ສ້ອມແປງ ແລະ ກໍ່ສ້າງລະບົບຊົນລະປະທານ, ເສັ້ນທາງ, ນ້ຳລິນສະອາດ, ການຂະຫຍາຍຕາຂ່າຍໄຟຟ້າ, ຕາໜ່າງ​ໄປສະນີ, ​ໂທລະ​ຄົມ, ລະບົບ​ການ​ບໍລິການ​ສິນ​ເຊື່ອຂອງ​ທະນາຄານ. ນອກຈາກນີ້ ກໍຍັງມີການຈັດຕັ້ງແຂ່ງຂັນກິລາ, ສິລະປະວັນນະ ຄະດີ, ການສ້າງກຸ່ມບ້ານ ແລະ ບ້ານວັດທະນະທຳໃໝ່, ບ້ານປອດຄະດີ, ປອດຢາເສບຕິດ, ບ້ານ​ພັດທະນາ, ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການ​ເຮັດ​ທົດ​ລອງສາມ​ສ້າງ, ການ​ສ້າງ​ເທດສະບານ​ຕາມ​ຄາດໝາຍ​ເມືອງ 4 ສໍ, 




ການ​ປັບປຸງ​ກົງຈັກ​ການຈັດຕັ້ງຮາກ​ຖານ​ພັກ ​ແລະ ອົງການ​ປົກຄອງຂັ້ນບ້ານ ຢ່າງເປັນຂະບວນກວ້າງຂວາງ, ປະຊາຊົນ​ບັນດາ​ເຜົ່າ ມີ​ຄວາມ​ສາມັກຄີ​ປອງ​ດອງ, ​ເປັນ​ປຶກ​ແຜ່ນ ​ແລະ ​ເອກະ​ພາບ​ພາຍໃນ​ ໄດ້​ເປັນ​ກໍາລັງ​ແຮງສັງ​ລວມ ​​ເຂົ້າ​ໃນ​ການຈັດ​ຕັ້ງ​ປະຕິບັດບັນດາ​ຄາດໝາຍ, ​ວຽກ​ງານ​ຈຸດ​ສຸມ​ທີ່​ກອງ​ປະຊຸມ​ໃຫຍ່ ​ຄັ້ງ​ທີ XII ວາງ​ອອກ​ມີ​ຜົນສຳເລັດ; ບົດຮຽນ​ໃນ​ການ​ຊີ້​ນໍ​າ-ນໍາພາ, ຄຸ້ມ​ຄອງ​ບໍລິຫານ​ເສດຖະກິດ-ສັງຄົມ ​ຂອງ​ຄະນະ​ພັກ ນັບ​ແຕ່​ເມືອງ​​ເຖິງ​ຮາກ​ຖານ​ໄດ້​ຮັບ​ການ​ເສີມ​ຂະຫຍາຍ;  ການ​ເຂົ້າ​ຮ່ວມຢ່າງ​ແຂງ​ແຮງ ​ຂອງ​ປະຊາຊົນ​ບັນດາ​ເຜົ່າ ແລະ ​ການຈັດ​ຕັ້ງ​ສັງຄົມ​ ​ໄດ້​ສົ່ງ​ຜົນ​ກະທົບ​ອັນ​ຕັ້ງໜ້າ​ຕໍ່​ການ​ ​ປັບປຸງ​ຊີວິດ​ການ​ເປັນ​ຢູ່, ​ແກ້​ໄຂຄວາມທຸກ​ຍາກ​ ຂອງ​ປະຊາຊົນ​ບັນດາ​ເຜົ່າ​.
ກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ XIII ຈະໄດ້ດຳເນີນເປັນເວລາສອງວັນ ເຊິ່ງຜູ້ແທນກອງປະຊຸມຈະໄດ້ພ້ອມກັນຄົ້ນຄວ້າ, ປະກອບຄຳເຫັນ ແລະ ຮັບຮອງເອົາ ຮ່າງ ລາຍງານການເມືອງ, ແຜນພັດທະນາເສດຖະກິດສັງຄົມ 5 ປີ ຄັ້ງທີ V (2020-2024), ຜ່ານ ບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງຊຸດທີ XII, ຮັບຟັງການປກອບຄຳຄິດຄຳເຫັນຈາກຕ່າງໜ້າແຕ່ລະຂົງເຂດວຽກງານ, ຕົວແບບການຜະລິດກະສິກຳເປັນສິນຄ້າ ແລະ ອື່ນໆ ທີ່ສຳຄັນໃນກອງປະຊຸມຈະໄດ້ປ່ອນບັດຄັດເລືອກ ເອົາຄະນະບໍລິຫານງານພັກ ເມືອງໄຊຊຸດທີ XIII, ປ່ອນບັດຄັດເລືອກເອົາຄະນະປະຈຳພັກເມືອງ, ເລືອກເອົາເລຂາ, ຮອງເລຂາພັກເມືອງ, ປ່ອນບັດຄັດ ເລືອກເອົາປະທານ, ຮອງປະທານກວດກາພັກຕື່ມອີກ.

Post a Comment

0 Comments