ເປີດນຳໃຊ້ເຂື່ອນໄຟຟ້ານ້ຳຕົກ ນ້ຳແຈ 1 ຢ່າງເປັນທາງການ


ເຂື່ອນໄຟຟ້ານ້ຳແຈ 1 ເປັນເຂື່ອນຂະໜາດນ້ອຍ ທີ່ໄດ້ຕິດຕັ້ງເຄື່ອງຈັກ 2 ເຄື່ອງ ເຊິ່ງມີກໍາລັງຕິດຕັ້ງເຄື່ອງລະ 8,4 MW ກຳລັງຜະລິດໄຟຟ້າຕາມສັນຍາ 15MW ໂດຍອາຍຸສໍາປະທານ 25 ປີ. ເຂື່ອນດັ່ງກ່າວ ຈະປະກອບສ່ວນເຂົ້າໃນການພັດທະນາທາງດ້ານພະລັງງານໄຟຟ້າ, ສ້າງວຽກເຮັດງານທໍາໃຫ້ແກ່ສັງຄົມ.





ພິທີເປີດນຳໃຊ້ເຂື່ອນໄຟຟ້ານ້ຳຕົກນ້ຳແຈ 1 ໄດ້ຈັດຂຶ້ນໃນວັນທີ 26 ພະຈິກ 2019 ທີ່ໂຮງແຮມ ຄຣາວພາຊ່າວຽງຈັນ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ຕຸລາໄຊ ວໍລະຈິດ ປະທານກຸ່ມບໍລິສັດເຄືອດາວສະ ຫວັນ, ທ່ານ Dr Harald Link ປະທານບໍລິສັດ B.GRIMM Power Public Company Limited ພ້ອມດ້ວຍພາກສ່ວນທີ່ກ່ຽວຂ້ອງ ແລະ ແຂກທີ່ຖືກເຊີນເຂົ້າຮ່ວມ.



ທ່ານ ບຸນອ້ອມ ພິລາວັນ, ທີ່ປຶກສາ ບໍລິສັດ B.Grimm ພະລັງງານ (ລາວ) ຈໍາກັດ ໃນຖານະຜູ້ແທນຜູ້ລົງທຶນ ກ່າວວ່າ: ບໍລິສັດ B.Grimm ພະລັງງານ (ລາວ) ຈໍາກັດ ໄດ້ຮ່ວມມືກັບ ບໍລິສັດ ດາວສະຫວັນ ຈໍາກັດ ໃນການພັດທະນາສາລະປະໂຫຍດໃຫ້ແກ່ສັງຄົມ, ກໍ່ສ້າງແຫຼ່ງພະລິດພະລັງງານໄຟຟ້າ ເຊິ່ງໂຄງການກໍ່ສ້າງ ເຂື່ອນໄຟຟ້ານ້ຳແຈ 1, ທີ່ຕັ້ງຢູ່ເຂດບ້ານນ້ຳລ້ອງ ແລະ ບ້ານຊຳກໍ່ທອງ, ເມືອງທ່າໂທມ, ແຂວງໄຊສົມບູນ ໄດ້ເລີ່ມລົງມືກໍ່ສ້າງມາແຕ່ປີ 2016ເປັນເຂື່ອນຂະໜາດນ້ອຍ ແລ່ນຕາມກະແສນ້ຳໄຫຼ (Run off River) ໂດຍການກໍ່ສ້າງເຂື່ອນຕັນສາຍນໍ້າແຈ ເຊິ່ງເປັນສາຂາຂອງສາຍນໍ້າງຽບ ແລະ ນ້ຳງຽບກໍ່ເປັນສາຂາໜຶ່ງຂອງແມ່ນ້ຳຂອງ. ເຂື່ອນໄຟຟ້ານ້ຳແຈ 1 ໄດ້ຕິດຕັ້ງເຄື່ອງຈັກ 2 ເຄື່ອງ ເຊິ່ງມີກໍາລັງຕິດຕັ້ງເຄື່ອງລະ 8,4 MW ສາມາດຈ່າຍໄຟຟ້າໄດ້ຕາມສັນຍາ 15MW.




ທ່ານ ບຸນອ້ອມ ພິລາວັນ ກ່າວຕື່ມວ່າ: ເຂື່ອນໄຟຟ້ານໍ້າຕົກ ນ້ຳແຈ 1 ໄດ້ທໍາການຜະລິດພະລັງງານໄຟຟ້າ ແລະ ໄດ້ຮັບການຊື້ຂາຍຢ່າງເປັນທາງການ (COD) ຈາກລັດວິສາຫະກິດໄຟຟ້າລາວ ມາຕັ້ງແຕ່ວັນທີ 01/06/2019 ແລະ ເຂື່ອນໄຟຟ້ານ້ຳແຈ 1 ມີອາຍຸສໍາປະທານ 25 ປີ.  ເຂື່ອນດັ່ງກ່າວ ຈະເປັນສ່ວນໜຶ່ງ ທີ່ໄດ້ປະກອບສ່ວນເຂົ້າໃນການພັດທະນາ ທາງດ້ານພະລັງງານໄຟຟ້າ, ສ້າງວຽກເຮັດງານທໍາໃຫ້ແກ່ສັງຄົມ, ຮັກສາສິ່ງແວດລ້ອມໃຫ້ມີຄວາມຍືນຍົງ, ສັງຄົມມີຄວາມສີວິໄລຕະຫຼອດໄປ.





ທ່ານ ຄຳມະນີ ອິນທິລາດ ກ່າວວ່າ: ໂຄງການເຂື່ອນໄຟຟ້ານໍ້າຕົກ ນໍ້າແຈ 1 ແມ່ນໂຄງການພັດທະນາອຸດສາຫະກໍາພະລັງງານໄຟຟ້າປະເພດເຂື່ອນຝາຍນ້ຳລົ້ນ (Run off river) ທີ່ມີຄວາມສໍາຄັນ ມີລັກສະນະຍຸດທະສາດຂອງແຂວງໄຊສົມບູນ ໂດຍສະເພາະ ສໍາລັບເມືອງທ່າໂທມ ເຊິ່ງໄດ້ນໍາໃຊ້ປະລິມານນ້ຳຕາມທໍາມະຊາດທີ່ໄຫຼຜ່ານ ເພື່ອນໍາມາຜະລິດກະແສໄຟຟ້າ. ສະນັ້ນ, ຈຶ່ງບໍ່ມີຜົນກະທົບເຖິງການປ່ຽນແປງອັດຕາປະລິມານນ້ຳໄຫຼ. ພ້ອມດຽວກັນນີ້, ກໍ່ແມ່ນໂຄງການທີ່ເປັນມິດກັບສິ່ງແວດລ້ອມ ແລະ ລັກສະນະຍືນຍົງ.




ໂຄງການເຂື່ອນໄຟຟ້ານໍ້າຕົກ ນ້ຳແຈ 1 ຈະເປັນພື້ນຖານທີ່ສໍາຄັນເພື່ອຈະສະໜອງກະແສໄຟຟ້າ ທີ່ພວກເຮົາຜະລິດໄດ້ ເພື່ອຮັບປະກັນການຕອບສະໜອງໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງໄຊສົມບູນ ໂດຍສະເພາະແມ່ນໃນບໍລິເວນເຂດພັດທະນາຂອງເມືອງທ່າໂທມ ກໍ່ຄືໂຄງການພັດທະນາດ້ານອື່ນໆ ຂອງແຂວງຂອງເມືອງ. ອັນທີ່ເປັນພື້ນຖານແມ່ນໂຄງການນີ້ ຈະກາຍເປັນສ່ວນປະກອບທີ່ສໍາຄັນເຂົ້າໃນການຈັດຕັ້ງປະຕິບັດແຜນ ພັດທະນາຊົນນະບົດ, ຍຸດທະສາດເພື່ອແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ແລະ ຍຸດທະສາດ ການສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານໃຫ້ເປັນຫົວໜ່ວຍພັດທະນາຢູ່ພາຍໃນ ແຂວງໄຊສົມບູນ ອີກດ້ວຍ, “ທ່ານ ຄຳມະນີ ອິນທິລາດ ກ່າວ”.

ຂ່າວ: ສົມລົດ; ພາບ: ສອນໄຊ


Post a Comment

0 Comments