ຍົກ 4 ຂົງເຂດວຽກຫາລືໃນກອງປະຊຸມໂຕະມົນລະດັບວິຊາການທີ່ນະຄອນຫຼວງພະບາງ




    ກອງປະຊຸມໂຕະມົນລະດັບວິຊາການພາຍໃຕ້ຫົວຂໍ້ ເພີ່ມທະວີການເປັນຄູ່ຮ່ວມເພື່ອເລັ່ງລັດການຈັດ ຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີຄັ້ງທີ 8  ແລະ ການສ້າງແຜນພັດທະນາແຫ່ງຊາດ 5 ປີຄັ້ງທີ IX, ໄດ້ຍົກ 4 ຂົງເຂດວຽກງານມາຫາລືຮ່ວມກັນ ຊຶ່ງໄດ້ຈັດຂື້ນໃນລະຫວ່າງ ວັນທີ 25-26 ພະຈິກ 2019 ນີ້ທີ່ຫ້ອງປະຊຸມໃຫຍ່ຫ້ອງວ່າການປົກຄອງແຂວງຫຼວງພະບາງໂດຍການເປັນປະທານຮ່ວມຂອງ ທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ສຸກັນ ບຸນຍົງ ຮອງເຈົ້າແຂວງໆຫຼວງພະບາງ ແລະ ທ່ານ ນາງ ຣີຄາດາ ຣິເຈີ ຜູ້ຕາງໜ້າອົງການສາຫະປະຊາຊາດ ເພື່ອການພັດທະນາ ປະຈໍາ ສປປ ລາວ, ມີຜູ້ຕາງໜ້າຈາກສູນກາງ ແລະ ທ້ອງຖິ່ນ ພ້ອມດ້ວຍບັນດາຄູ່ຮ່ວມພັດທະນາ, ອົງການຈັດຕັ້ງທີ່ບໍ່ສັງກັດລັດຖະບານ, ອົງການທີ່ບໍ່ຫວັງຜົນກໍາໄລ ແລະພາກເອກະຊົນເຂົ້າຮ່ວມ.

    ທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ກ່າວວ່າ: ກອງປະຊຸມໂຕະມົນລະດັບວິຊາການຄັ້ງນີ້ສຸດທີ່ມີຄວາມໝາຍຄວາມສໍາຄັນ ຊຶ່ງຜູ້ເຂົ້າຮ່ວມຈະໄດ້ສຸມໃສ່ການປຶກສາຫາລືໃນ 4 ຂົງເຂດວຽກງານຫຼັກຄື: 1) ການຫຼຸດພົ້ນອອກຈາກສະຖານະພາບການເປັນປະເທດດ້ອຍພັດທະນາໃນໄລຍະຂ້າມຜ່ານ ຕໍ່ກັບວຽກງານການຄ້າ, ການຊ່ວຍເຫຼືອທາງການເພື່ອການພັດທະນາແລະໂອກາດການເຂົ້າຫາແຫຼ່ງທຶນ; 2)  ຄວາມຄືບໜ້າ ໃນການຈັດຕັ້ງຜັນຂະຫຍາຍເປົ້າໝາຍການພັດ ທະນາແບບຍືນຍົງ ການຕິດຕາມ ແລະ ລາຍງານການຈັດຕັ້ງປະຕິບັດບັນດາຕົວຊີ້ວັດຕ່າງໆ; 3) ການຫຼຸດຜ່ອນຄວາມສ່ຽງທີ່ເກີດຈາກໄພພິບັດ ການສະໜັບສະໜູນດ້ານຕ່າງໆ ແລະທິດທາງໃນຕໍ່ໜ້າເພື່ອເຊື່ອມສານວຽກງານດັ່ງກ່າວ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ວຽກງານທີ 4 ການເຊື່ອມສານວຽກງານການປ່ຽນແປງດິນຟ້າອາກາດ ເຂົ້າໃນແຜນພັດທະນາເສດຖະກິດ-ສັງ ຄົມ 5 ປີຄັ້ງທີ IX, ລວມທັງການຈັດຕັ້ງປະຕິບັດຍຸດທະສາດການເຕີບໂຕສີຂຽວ ຂອງ ສປປ ລາວ.

     ສ່ວນໃນຕອນບ່າຍຂອງວັນດຽວກັນ ຄະນະຜູ້ແທນເຂົ້າຮ່ວມກອງປະຊຸມໄດ້ເດີນທາງໄປຢ້ຽມຢາມໂຄງ ການຢູ່ພາກສະໜາມ ເປັນຕົ້ນແມ່ນ ໂຄງການເກັບກູ້ລະເບີດ ຢູ່ເມືອງປາກອູ, ໂຄງການປ້ອງກັນຕາຝັ່ງເຈື່ອນ ແຄມນໍ້າຄານ ຕື່ມອີກ ແລະ ໃນຕອນແລງ ບັນດາທູດ, ຕານຸທູດ, ຫົວໜ້າອົງການຈັດຕັ້ງສາກົນ ໄດ້ເຂົ້າຢ້ຽມຂໍ່ານັບ ທ່ານເຈົ້າແຂວງໆຫຼວງ, ຫຼັງຈາກນັ້ນໄດ້ມີການຈັດບາສີສູ່ຂວັນຕ້ອນຮັບຕາມຮີດຄອງປະເພນີຂອງລາວ.

Post a Comment

0 Comments