ສືບຕໍ່ສຸມໃສ່ 7 ວຽກງານ ເພື່ອແກ້ໄຂເຫດສຸກເສີນໄດ້ທັນເວລາ



    ກອງປະຊຸມ ສະຫຼຸບວຽກງານ ການຫັນກໍາລັງລົງປະຈໍາ ສະຖານີຕໍາຫຼວດຮັບແຈ້ງ ແລະ ແກ້ໄຂເຫດສຸກເສີນ 1191 ປະຈໍາປີ 2019 ແລະ ວາງທິດທາງແຜນການປີ 2020 ຂອງກອງບັນຊາການ ປກສ ນະຄອນຫຼວງວຽງຈັນ ໄດ້ຈັດຂຶ້ນໃນຕອນເຊົ້າວັນທີ 08 ພະຈິກ 2019, ຢູ່ຫ້ອງປະຊຸມຊັ້ນ 4 ກອງບັນຊາການ ປກສ ນວ, ໂດຍການເປັນປະທານຂອງ ພົຈວ ບຸບຜາ ສີພົມມາ ຫົວໜ້າກອງບັນຊາການ ປກສ ນວ; ໂດຍມີ ພົຈວ ປອ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕໍາຫຼວດ, ຮອງຫົວໜ້າກອງບັນຊາການ ປ້ອງກັນເຄື່ອນທີ່,  ຫົວໜ້າສູນຄວບຄຸມກ້ອງວົງຈອນປິດ ກະຊວງ ປກສ, ມີບັນດາຄະນະກອງບັນຊາການ 9 ຕົວເມືອງ, ພະແນກທີ່ກ່ຽວຂ້ອງ ແລະ ພະນັກງານນັກຮົບໃນ 20 ສະຖານີເຂົ້າຮ່ວມ ໄດ້ໃຫ້ຮູ້ວ່າ: ໃນຕໍ່ໜ້າ ສະຖານີຕໍາຫຼວດ ຮັບແຈ້ງ ແລະ ແກ້ໄຂເຫດສຸກເສີນ 1191  ຫ້ອງຕໍາຫຼວດ ກອງບັນຊາການ ປກສ ນະຄອນຫຼວງວຽງຈັນ ຈະສືບຕໍ່ສຸມໃສ່ປະຕິບັດ 7 ວຽກຈຸດສຸມ ເພື່ອເຮັດໃຫ້ວຽກງານມີຄຸນນະພາບ ແລະ ສອດຄ່ອງກັບສະພາບຕົວຈິງ ສາມາດແກ້ໄຂບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ໃນນະຄອນຫຼວງວຽງຈັນ ໃຫ້ຫຼຸດໜ້ອຍຖອຍລົງເທື່ອລະກ້າວ.


    ໃນກອງປະຊຸມ ພັທ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ຫົວໜ້າຫ້ອງຕໍາຫຼວດ ປກສ ນວ ໄດ້ຂຶ້ນຜ່ານບົດສະຫຼຸບວຽກງານການຫັນກໍາລັງ ລົງປະຈໍາສະຖານີ ຕໍາຫຼວດຮັບແຈ້ງ ແລະ ແກ້ໄຂເຫດສຸກເສີນ 1191 ປະຈໍາປີ 2019 ແລະ ວາງທິດທາງແຜນການປີ 2020 ຂອງກອງບັນຊາການ ປກສ ນວ ໂດຍໃຫ້ຮູ້ວ່າ: ໃນປີ 2020 ສະຖານີຕໍາຫຼວດ ຮັບແຈ້ງ ແລະ ແກ້ໄຂເຫດສຸກເສີນ 1191 ຈະສືບຕໍ່ສຸມໃສ່ 7 ວຽກຈຸດສຸມຄື:  

1 ສຸມໃສ່ກໍ່ສ້າງ ແລະ ພັດທະນາກໍາລັງ ທາງດ້ານຄວາມຮູ້, ຄວາມສາມາດໃຫ້ມີຄວາມຊໍານິຊໍານານ ເຂົ້າໃນຂົງເຂດວຽກງານວິຊາສະເພາະຕົວຈິງ; 2 .ສຸມໃສ່ເຮັດວຽກງານປະຈໍາການຄອຍເຫດ, ຮັບແຈ້ງເຫດ, ລົງແກ້ໄຂເຫດ ໃຫ້ທັນການໃນການຊ່ວຍເຫຼືອຜູ້ຖືກເຄາະຮ້າຍ ແລະ ສະກັດກັ້ນ- ແກ້ໄຂເປົ້າໝາຍ ທີ່ກໍ່ການກະທໍາຜິດຢ່າງເດັດຂາດ; 3 ສຸມໃສ່ເຮັດວຽກນໍາພາເຄື່ອນໄຫວ ອອກກວດກາລາດຕະເວນ ເພື່ອຕິດຕາມ ແລະ ກໍາສະພາບເຫດການທີ່ເກີດຂຶ້ນ ເພື່ອວາງແຜນການສະກັດກັ້ນ ແລະ ແກ້ໄຂໄດ້ທັນເວລາໃນຂອບເຂດຄວາມຮັບຜິດຊອບຂອງຕົນຢ່າງຕໍ່ເນື່ອງ; 4 ເຮັດວຽກງານຄຸ້ມຄອງ-ກວດກາ ແລະ ປົກປັກຮັກສາອາວຸດ, ພາຫະນະ ແລະ ອຸປະກອນເຕັກນິກເຄື່ອງມືສື່ສານ ເພື່ອນໍາເຂົ້າໃນວຽກງານວິຊາສະເພາະໃຫ້ມີຄວາມຮັບປະກັນ ທາງດ້ານສະພາບເຕັກນິກ; 5 ສືບຕໍ່ເຄື່ອນໄຫວເຮັດວຽກງານປະສານສົມທົບກັບເຫຼົ່າວິຊາສະເພາະທີ່ກ່ຽວຂ້ອງ ແລະ ອົງການຈັດຕັ້ງສັງຄົມ ຂັ້ນຮາກຖານໃຫ້ກວ້າງຂວາງ ເພື່ອເປັນກໍາລັງແຮງ ເຂົ້າຮ່ວມແກ້ໄຂເຫດສຸກເສີນທີ່ເກີດຂຶ້ນໃຫ້ທັນເວລາ; 6 ສຸມໃສ່ປັບປຸງ ແລະ ສ້າງບັນດານິຕິກໍາ ເພື່ອກໍານົດພາລະບົດບາດ ໃນການຈັດຕັ້ງເຄື່ອນໄຫວເຮັດວຽກງານ ວິຊາສະເພາະຂອງສະຖານີຕໍາຫຼວດຮັບແຈ້ງ ແລະ ແກ້ໄຂເຫດສຸກເສີນ 1191 ໃຫ້ສອດຄ່ອງກັບສະພາບເງື່ອນໄຂໃນໄລຍະໃໝ່;  7 ສືບຕໍ່ນໍາພາເຄື່ອນໄຫວ ເຮັດວຽກງານວິຊາສະເພາະໃຫ້ຕໍ່ເນື່ອງໂດຍ ປະຕິບັດຕາມຄໍາສັ່ງຂອງຄະນະພັກ-ຄະນະບັນຊາ ແຕ່ລະຂັ້ນ, ເຄົາລົບ ແລະ ປະຕິບັດຂໍ້ກໍານົດກົດລະບຽບຂອງກໍາລັງປ້ອງກັນຄວາມສະຫງົບ ແລະ ກົດໝາຍຂອງລັດຢ່າງເຂັ້ມງວດ.

    ໃນຕອນທ້າຍກອງປະຊຸມ ພັທ ນາງບົວລະພັນ ທິລະສັກ ຮອງຫົວໜ້າຫ້ອງການເມືອງ ປກສ ນວ ໄດ້ຂຶ້ນຜ່ານຂໍ້ຕົກລົງສະບັບເລກທີ2410/ ປກສ ນວ, ລົງວັນທີ 05 ພະຈິກ 2019 ວ່າດ້ວຍການຖອນບັນດານາຍ ແລະ ພົນຕໍາຫຼວດ ຈາກສະຖານີຕໍາຫຼວດຮັບແຈ້ງ ແລະ ແກ້ໄຂເຫດສຸກເສີນ 1191 ທີ່ຂຶ້ນກັບກອງບັນຊາການ ປກສ ນວ ກັບຄືນກອງບັນຊາການ ປ້ອງກັນເຄື່ອນທີ່ ກະຊວງ ປກສ ໃນນີ້ລວມມີ 45 ສະຫາຍ ແລະ ຂໍ້ຕົກລົງສະບັບເລກທີ 1500/ ປກສ ນວ, ລົງວັນທີ 29 ຕຸລາ 2019 ວ່າດ້ວຍການສັບຊ້ອນນາຍ ແລະ ພົນຕໍາຫຼວດທີ່ໂຍກຍ້າຍມາຈາກກອງບັນຊາການປ້ອງກັນເຄື່ອນທີ່ ກະຊວງ ປກສ  ໄປປະຈໍາຢູ່ສະຖານີຕໍາຫຼວດຮັບແຈ້ງ ແລະ ແກ້ໄຂເຫດສຸກເສີນ 1191  ຂອງ ປກສ ເມືອງ ຈັນທະບູລີ, ປກສ ເມືອງໄຊເຊດຖາ, ປກສ ເມືອງສີໂຄດຕະບອງ, ປກສ ເມືອງໄຊທານີ, ປກສ ເມືອງຫາດຊາຍຟອງ ແລະ ປກສ ເມືອງນາຊາຍທອງ ລວມທັງໝົດ 44 ສະຫາຍ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນປັດຈຸບັນ, ສະເພາະໜ້າ ແລະ ຍາວນານ.

Post a Comment

0 Comments