ກຸ່ມນັກສຶກສາລາວຜ່ານເຂົ້າຮອບຊີງຊະນະເລີດ ແຂ່ງຂັນບົດວິໄຈດິເດັ່ນລະດັບປະເທດ ຢູ່ຫວຽດນາມ





ເປັນທີ່ໜ້າພາກພູມໃຈສຳລັບກຸ່ມນັກສຶກສາລາວທີ່ໄປສຶກສາຕໍ່ທີ່ ສສ ຫວຽດນາມ ທີ່ສາມາດບັນລຸອີກໜຶ່ງເປົ້າໝາຍທີ່ສຳຄັນໄດ້ ນັ້ນກໍຄືກາຍເປັນກຸ່ມນັກສຶກສາຈາກຕ່າງປະເທດພຽງກຸ່ມດຽວທີ່ຜ່ານເຂົ້າຮອບຊີງຊະນະເລີດໃນການແຂ່ງຂັນບົດວິໄຈດີເດັ່ນປະຈຳປີ 2019 ຂອງຫວຽດນາມ.

ກຸ່ມນັກສຶກສາລາວດັ່ງກ່າວມີກັນທັງໝົດ 5 ຄົນ ເຊິ່ງໄດ້ສົ່ງບົດວິໄຈໃນຫົວຂໍ້ "ເຕັກໂນໂລຊີຂໍ້ມູນຂ່າວສານ ກ່ຽວກັບ ລະບົບສັ່ງອາຫານເທິງສະມາດໂຟນ" ໂດຍໃນຫົວຂໍ້ເຕັກໂນໂລຊີນີ້ມີປະມານ 70 ບົດວິໄຈຈາກແຕ່ລະມະຫາວິທະຍາໄລທົ່ວຫວຽດນາມສົ່ງເຂົ້າແຂ່ງຂັນ ແລະ ກຸ່ມຂອງ ໂຊກທິລັດ ອຸດົມດີ ຍາດອັນດັບ 3 ມາໄດ້.

ການແຂ່ງຂັນບົດວິໄຈດັ່ງກ່າວນີ້ເອີ້ນວ່າ Eureka ເຊິ່ງມີກຸ່ມນັກສຶກສາສົ່ງບົດວິໄຈເຂົ້າແຂ່ງຂັນກວ່າ 900 ບົດ ໃນ 12 ຫົວຂໍ້ ສັງລວມແລ້ວມີນັກສຶກສາເຂົ້າຮ່ວມແຂ່ງຂັນປະມານ 2,000 ກວ່າຄົນ.


(ລຸ່ມ) ກຸ່ມນັກສຶກສາລາວນຳໂດຍ ໂຊກທິລັດ ອຸດົມດີ (ຜູ້ໃສ່ແວ່ນຕາ) ເຊິ່ງສົ່ງບົດວິໄຈເຂົ້າແຂ່ງຂັນໃນລາຍການ Eureka / ພາບ: KHOA KỸ THUẬT - CÔNG NGHỆ. TRƯỜNG ĐẠI HỌC HÀ TĨNH


ໂຊກທິລັດ ອຸດົມດີ ເຊິ່ງເປັນຫົວໜ້າກຸ່ມນັກສຶກສາລາວທີ່ສົ່ງບົດວິໄຈເຂົ້າແຂ່ງຂັນໃນລາຍການດັ່ງກ່າວ ກ່າວຕໍ່ທີມຂ່າວ muan.la ວ່າ ບົດວິໄຈກ່ຽວກັບລະບົບສົ່ງອາຫານເທິງສະມາດໂຟນທີ່ກຸ່ມຕົນເອງສົ່ງເຂົ້າປະກວດນັ້ນ ເປັນບົດວິໄຈທີ່ເກີດຂຶ້ນຈາກແອັບພລິເຄຊັນທີ່ກຸ່ມຕົນເອງກຳລັງເຮັດຢູ່ເຊິ່ງຊື່ວ່າ "Hiwkhao" (ຫິວເຂົ້າ).

Hiwkhao ເປັນແອັບພລິເຄຊັນສັ່ງອາຫານຜ່ານສະມາດໂຟນ ໂດຍໃນປັດຈຸບັນເປີດໃຫ້ບໍລິການສະເພາະແຕ່ໃນປະເທດຫວຽດນາມ ແຕ່ໃນແອັບດັ່ງກ່າວມີພາສາໃຫ້ເລືອກໃຊ້ 2 ພາສາຄື ພາສາລາວ ແລະ ພາສາຫວຽດນາມ.

ຫຼັງຈາກນີ້, ກຸ່ມຂອງພວກເຂົາ ພ້ອມກັບບົດວິໄຈທີ່ສົ່ງເຂົ້າແຂ່ງຂັນ ກໍຈະໄດ້ກະກຽມເພື່ອໄປແຂ່ງຂັນຕໍ່ຮອບຊີງຊະນະເລີດຢູ່ທີ່ນະຄອນໂຮ່ຈິມິນ ເຊິ່ງ ໂຊກທິລັດ ກ່າວວ່າ ກຸ່ມຂອງຕົນເອງເປັນກຸ່ມນັກສຶກສາຈາກຕ່າງປະເທດພຽງກຸ່ມດຽວທີ່ຜ່ານເຂົ້າຮອບຊີງ.

ທັງນີ້ ໃນປັດຈຸບັນ, ໂຊກທິລັດ ອຸດົມດີ ແລະ ໝູ່ເພື່ອນໃນກຸ່ມອີກ 4 ຄົນປະກອບມີ: ສຸກສະຫວັນ ມົງຄຸນ, ອະນຸລັກ ເພັງພະຈັນ, ບຸນເຖິງ ເພັດລາສີ ແລະ ເທັກ ພະຄຸນໄຊ ກຳລັງສຶກສາສາຂາເຕັກໂນໂລຊີຂໍ້ມູນຂ່າວສານຢູ່ທີ່ມະຫາວິທະຍາໄລຮ່າຕິງ ເຊິ່ງຕັ້ງຢູ່ໃນພາກກາງຂອງຫວຽດນາມ.

ຂໍຂອບໃຈ
ຂໍ້ມູນ : Khoahoctre

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------

Post a Comment

0 Comments