ເຮັດຫັດຖະກໍາຕໍ່າຫູກເປັນອາຊີບພາໃຫ້ຄອບຄົວຮັ່ງມີ





ນາງ ມາລາວັນ ໄຊຍະວົງ ອາຍຸ 31 ປີ,  ປະຈຸບັນຢູ່ ບ້ານສະຖານ, ເມືອງຄອບ, ແຂວງໄຊຍະບູລີ, ໄດ້ປະກອບຄໍາເຫັນຕໍ່ກອງປະຊຸມໃຫຍ່ຄັ້ງທີ v ຂອງຜູ່ແທນອົງຄະນະພັກເມືອງຄອບ, ຄັ້ງວັນທີ 20 ພະຈິກ ປີນີ້ວ່າ: ໄດ້ປະກອບອາຊີບ ດ້ານຫັດຖະກຳ, ຕໍ່າຫູກ ແລະ ແສ່ວຜ້າ,  ມາແຕ່ປີ 2007 ເປັນຕົ້ນມາ, ໃນຄອບຄົວມີສະມາຊິກທັງໝົດ 7 ຄົນ, ຍິງ 4 ຄົນ, ໂດຍໄດ້ສືບຕໍ່ຈາກຜູ້ເປັນແມ່, ພ້ອມທັງໄດ້ປຸກລະດົມເອື້ອຍນ້ອງແມ່ຍິງພາຍໃນບ້ານສະຖານເຂົ້າຮ່ວມ, ທຳອິດໄດ້ພຽງແຕ່ 10 ກີ່ ເທົ່ານັ້ນ ແລະ ໄດ້ເອົາຜ້າແສ່ວລົງໃຫ້ແມ່ຍິງ ຢູ່ບ້ານປາງໄຮ, ບ້ານຫ້ວຍເລົາ, ບ້ານປ່າຄາ ແລະ ບ້ານນ້ຳພ້າວ, ໃນເບື້ອງຕົ້ນແມ່ນມີຄວາມຫຍຸ້ງຍາກ, ເປັນຕົ້ນແມ່ນທຶນຮອນ, ຄວາມຊໍານິ, ຊຳນານ ດ້ານສີມື ແລະ ດ້ານການຕະຫຼາດຮອງຮັບທີ່ບໍ່ແນ່ນອນ, ຜ່ານພຶດຕິກຳ ແລະ ປະສົບການຕົວຈິງບວກກັບການຊຸກຍູ້ ສົ່ງເສີມຈາກພັກ-ລັດກໍ່ຄືຫ້ອງການອຸດສາຫະກຳ ແລະ ການຄ້າ,  ນາງ ມາລາວັນ ໄຊຍະວົງ ຈຶ່ງໄດ້ສຸມທຸກສະຕິປັນຍາ ແລະ ຫົວຄິດປະດິດສ້າງເຂົ້າໃນການສົ່ງເສີມກິດຈະການຂອງຕົນ ເພື່ອພັດທະນາສີໄມ້ລາຍມືໃຫ້ມີຫຼາຍຮູບແບບ, ຫຼາກຫຼາຍສີສັນ ແລະ ຂະຫຍາຍກີ່ຕ່ຳຫູກໄປສູ່ບ້ານຕ່າງໆ ເຊັ່ນ: ບ້ານຖໍ້າ, ບ້ານ ດອນຕັນ, ບ້ານ ຫົວເມືອງ ແລະ ບ້ານອື່ນໆ, 




ມາຮອດປະຈຸບັນ ມີ 150 ກີ່, ການແສ່ວຜ້າກໍ່ຂະຫຍາຍໄປເກືອບໝົດທຸກບ້ານ, ສ່ວນຜະລິດຕະພັນທີ່ຜະລິດອອກເພື່ອຈໍາໜ່າຍແມ່ນ: ຜ້າແຜ່ນສິ້ນ, ແຜ່ນເສື້ອ, ຜ້າປູໂຕະ, ຜ້າບ່ຽງ, ຜ້າຂາມ້າ, ຜ້າພັນຄໍ, ຜ້າເຊັດມື ແລະ ອື່ນໆ, ນອກນັ້ນຍັງໄດ້ແປຮູບເຊັນ: ເສື້ອ, ສີ້ນເຜົ່າ, ກະເປົາ, ຖົງພາຍ ເພື່ອຈໍາໜ່າຍຢູ່ພາຍໃນ ແລະ ຕ່າງປະເທດ, ອັນເຮັດໃຫ້ສັງຄົມຮັບຮູ້ຢ່າງກວ້າງຂວາງ, ນອກຈາກຈໍາໜ່າຍແລ້ວ ຍັງໄດ້ເຂົ້າຮ່ວມງານວາງສະແດງສິນຄ້າ, ຢູ່ບຸນຊ້າງ, ບຸນຊ່ວງເຮືອ ທີ່ແຂວງໄຊຍະບູລີ, ສູນການຄ້າລາວໄອເຕັກ ນະຄອນຫຼວງວຽງຈັນ ແລະ ປະເທດໄທ ທີ່ຈັດຂື້ນຢູ່ອຳເພີ ພູຊາງ ແລະ ອຳເພີ ຊຽງຄຳ, 




ຜ່ານການເຄື່ອນໄວໃນຂະບວນວິວັດຕົວຈິງ, ເຮັດໃຫ້ລູກຄ້າທັງພາຍໃນ ແລະ ຕ່າງປະເທດ ສັ່ງຈອງຜະລິດຕະພັນເພີ່ມຂຶ້ນເລື້ອຍໆ, ເຮັດໃຫ້ເອື້ອຍນ້ອແມ່ຍິງ ໂດຍສະເພາະຜູ້ຕໍ່າຫູກ, ມີຄວາມຊໍານິ, ຊຳນານຫຼາຍຂຶ້ນ ແລະ ມີລາຍໄດ້ເປັນຫຼັກແຫຼ່ງໃຫ້ຄອບຄົວ, ແຕ່ລະປີບໍ່ຫຼຸດ 13 -15 ລ້ານກີບ/ຄົນ/ກີ້/ປີ, ສະເລ່ຍເອີ້ອຍນ້ອງແມ່ຍິງລູກກີ່ສາມາດສ້າງລາຍຮັບໃຫ້ຄອບຄົວຂ້າພະເຈົ້າໄດ້ທັງໝົດບໍ່ຕໍ່າກ່ວາ 1,9 - 2 ຕື້ກີບ/ປີ, ມີຕະຫຼາດເພື່ອຈຳໜ່າຍທີ່ແນ່ນອນ ແລະ ຂ້ອນຂ້າງໝັ້ນຄົງ, ສະນັ້ນຈຶ່ງເຮັດໃຫ້ຄອບຄົວ ໄດ້ຮັບການພັດທະນາຫຼຸດພົ້ນຈາກຄອບຄົວທຸກຍາກ, ມີຊີວິດການເປັນຢູ່ດີຂຶ້ນເປັນລຳດັບ, ສາມາດຕໍ່ເຕີມເຮືອນອອກ 1 ຫຼັງ, ມີລົດໃຫຍ່  2 ຄັນ, ລົດຈັກ 1 ຄັນ, ມີລາຍຮັບສະເລ່ຍ 22 ລ້ານກີບ/ຄົນ/ປີ, ມີທຶນໝູນວຽນເພື່ອໃຊ້ເຂົ້າໃນກິດຈະການດັ່ງກ່າວບໍ່ຕ່ຳກ່ວາ 200 ລ້ານກີບ ນອກຈາກນັ້ນຍັງໄດ້ປະກອບພັນທະຊ່ວຍສັງຄົມຕາມລະບຽບກົດໝາຍ ແລະ ຕາມຄວາມສາມາດຂອງຄອບຄົວ.


ຂ່າວ-ພາບ: ນັກຂ່າວຫ້ອງວ່າການແຂວງ ໄຊຍະບູລີ
ໂດຍ: ອຸ່ນເຮືອນ ໂພທິລັກ

Post a Comment

0 Comments