ຄະນະອຸປະຖຳວັດສາມັກຄີໄຊ ແຂວງຫຼວງນໍ້າທາ ຢ້ຽມຢາມການກໍ່ສ້າງວິຫານວັດບ້ານບໍ່ເຕນ




      ວັນທີ 20 ພະຈິກ 2019 ຄະນະອຸປະຖໍາວັດສາມັກຄີໄຊແຂວງຫຼວງນໍ້າທາຢ້ຽມຢາມການກໍ່ສ້າງວິຫານວັດບ້ານບໍ່ເຕນເມືອງຫຼວງນໍ້າທາ, ການລົງຢ້ຽມຢາມຄັ້ງນີ້ນໍາພາໂດຍ ທ່ານ ທອງແດງ ສິດທິສົນ ສະມະຊິກສະພາປະຊາຊົນແຂວງ, ມີອາດີດການນຳແຂວງ, ນັກປະຕິວັດອາວຸໂສບໍານານ,ເຖົ້າແກ່ແນວໂຮມ,ນາຍບ້ານ ແລະ ຄະນະຮັບຜິດຊອບການກໍ່ສ້າງວິຫານວັດບ້ານບໍ່ເຕນ.    


                                                           
         ທ່ານ ໄມ່ກົມແສງ ແກ້ວແກ່ນຈັນ ນາຍບ້ານໆ ບໍ່ເຕ່ນໃຫ້ຮູ້ວ່າ:  ສໍາລັບການກໍ່ສ້າງອາ ຄານວິຫານວັດບ້ານບໍ່ເຕນເມືອງຫຼວງນໍ້າທາໄດ້ເລີ່ມກໍສ້າງມາແຕ່ວັນທີ 1 ເດືອນກຸມພາ 2015,  ເປັນອາຄານຖາວອນ, ສ້າງດ້ວຍຊີມັງເສີມເຫຼັກ ກວ້າງ 12 ແມັດ, ຍາວ 20 ແມັດ, ສູງ 14 ແມັດ, ຫຼັງຄາເຫຼັກມຸງດ້ວຍຊີແພກຄິດເປັນມູນຄ່າການກໍ່ສ້າງທັງໝົດ 1 ຕື້ 500 ລ້ານກີບ, ມາຮອດປັດຈຸບັນການກໍ່ສ້າງໄດ້ສໍາເລັດແລ້ວ 95% .    



        ທ່ານຍັງໃຫ້ຮູ້ຕື່ມວ່າ:   ພຸດທະສາສະໜາມີບົດບາດສໍາຄັນ ແລະ ຕິດພັນກັບວິຖີຊິວິດຂອງປະຊາຊົນລາວ, ເວົ້າລວມ, ເວົ້າສະເພາະກໍ່ຄືປະຊາຊົນບ້ານບໍ່ເຕນ ເຊີ່ງບໍ່ສາມາດຕັດແຍກອອກຈາກກັນໄດ້ເພາະວ່າ ວັດເປັນສູນລວມທາງດ້ານຈິດໃຈ, ເປັນທັງສີລະປະ ວັດທະນະທຳ ແລະ ຮີດຄອງປະເພນີອັນດີງາມຂອງເຜົ່າ,ຂອງຊາດທີ່ໄດ້ສືບທອດກັນມາແຕ່ບູຮານນາການ,ເປັນບ່ອນທຳບຸນ,ທຳພິທີກຳຂອງພະສົງ ແລະ ທັງເປັນບ່ອນພັກອາໄສ,ສະຖານທີ່ປະຊຸມ ແລະ ບ່ອນຮັບຕ້ອນແຂກບ້ານແຂກເມືອງທີ່ມາຢ້ຽມຢາມ,ເປັນການຕອບສະໜອງໃຫ້ອອກຕົນຍາດໂຍມຜູ້ທີ່ມີໃຈສັດທາໃນການທຳບຸນກຸສົນ.



       ຈາກນັ້ນທ່ານ ທອງແດງ ສິດທິສົນ ສະມາຊິກສະພາປະຊາຊົນແຂວງຍັງໄດ້ນໍາພາອາດິດການນໍາແຂວງ, ນັກຮົບປະຕິວັດອາວຸໂສເຖົ້າແກ່ແນວໂຮມທ່ຽວຊົມ ການພັດທະນາ ແລະ ການກໍ່ສ້າງພື້ນຖານໂຄງລ່າງໂດຍສະເພາະແມ່ນ ການກໍ່ສ້າງເສັ້ນທາງລົດໄຟລາວ-ຈີນ,ບໍ່ເກືອ ແລະ ໂຄງການທົດລອງສ້າງບ້ານຊົນເຜົ່າເພື່ອການພັດທະນາແຫຼ່ງທ່ອງທ່ຽວໃນຕໍ່ໜ້າຕື່ມອີກ. 
ຂ່າວ: ບຸນຈັນ ອິນດວງລື.

Post a Comment

0 Comments