ຫ້ອງການເມືອງ ທະຫານແຂວງອຸດົມໄຊ ຈັດພິທີມອບ-ຮັບວຽກຄະນະບັນຊາຫ້ອງຜູ້ເກົ່າ ແລະຜູ້ໃໝ່



ພິທີມອບ-ຮັບວຽກຄະນະຫ້ອງ ແລະຫົວໜ້າພະແນກ ຫ້ອງການເມືອງ ກອງບັນຊາການທະຫານແຂວງອຸດົມໄຊ ລະຫວ່າງຜູ້ເກົ່າ ແລະຜູ້ໃໝ່ ໄດ້ຈັດຂື້ນໃນວັນທີ່ 22 ພະຈິກ 2019 ນີ້ ໂດຍການເປັນປະທານຂອງ ພັນເອກ ຄຳຍີນ ແສງສຸລີ ຮອງເລຂາພັກ ຫົວໜ້າການເມືອງກອງບັນຊາການທະຫານແຂວງອຸດົມໄຊ, ເປັນກຽດເຂົ້າຮ່ວມໂດຍມີ ພັນເອກ ບຸນຍົງ ໜໍ່ແກ້ວ ຄະນະປະຈຳພັກກອງບັນຊາການ ຫົວໜ້າຫ້ອງການເມືອງກອງບັນຊາການທະຫານແຂວງ, ມີຄະນະພັກ-ຄະນະບັນຊາ, ຫົວໜ້າພະແນກ-ຮອງພະແນກພາຍໃນຫ້ອງການເມືອງເຂົ້າຮ່ວມ.
 ໃນພິທີ ພັນໂທ ທອງພັນ ໄຕພົນສະຫວັນ ຄະນະພັກກອງບັນຊາການ ຮອງຫົວໜ້າຫ້ອງການເມືອງກອງບັນຊາການທະຫານແຂວງ ທີ່ກຽມພັກການເຂົ້າຮັບບຳນານ ແລະພັນໂທ     ຄຳປານ ອີນທຳມະລັດ ຮອງຫົວໜ້າຫ້ອງການເມືອງ ທີ່ຖືກຍົກຍ້າຍ ແລະແຕ່ງຕັ້ງເປັນຫົວໜ້າຫ້ອງການ ແລະບໍລິຫານກອງບັນຊາການທະຫານແຂວງ ຄົນໃໝ່ ໄດ້ຂື້ນຜ່ານບົດມອບ-ຮັບໜ້າທີ່ຂອງຄະນະບັນຊາຫ້ອງການເມືອງໃນການຊີ້ນຳ-ນຳພາຈັດຕັ້ງປະຕິບັດວຽກງານໃນໄລຍະຜ່ານມາ ພ້ອມທັງມອບໃຫ້ ພັນໂທ ແກ້ວວິເສດ ລູກສອນນ້ອຍ ຮອງຫົວໜ້າຫ້ອງການເມືອງກອງບັນຊາການທະຫານແຂວງ ຜູ້ໃໝ່ ຮັບຜິດຊອບ ແລະສືບຕໍ່ນຳພາຈັດຕັ້ງປະຕິບັດໃຫ້ມີຜົນສຳເລັດ, ພ້ອມດຽວກັນນີ້ ພັນໂທ ສອນຄິດ ໄຊສະຫງ່າ ຫົວໜ້າພະແນກຈັດຕັ້ງພັກ ຜູ້ເກົ່າ ທີ່ຖືກແຕ່ງຕັ້ງເປັນຫົວໜ້າພະແນກກວດກາພັກ-ລັດ ຜູ້ໃໝ່ ໄດ້ຂື້ນກ່າວມອບວຽກໃຫ້ ພັນຕີ ສົມລິດ ໄຊຍະຜົງ ຫົວໜ້າພະແນກຈັດຕັ້ງພັກ ຜູ້ໃໝ່ ເປັນຜູ້ສືບຕໍ່ຊີ້ນຳ-ນຳພາຈັດຕັ້ງປະຕິບັດໃນຂົງເຂດວຽກງານຄວາມຮັບຜິດຊອງຂອງຕົນໃຫ້ມີຄວາມກ້າວໜ້າຂື້ນເລື້ອຍໆ. 
 ຈາກນັ້ນ ພັນເອກ ຄຳຍີນ ແສງສຸລີ ຮອງເລຂາພັກ ຫົວໜ້າການເມືອງກອງບັນຊາການທະຫານແຂວງອຸດົມໄຊ ກໍ່ໄດ້ໂອ້ລົມ ແລະມີຄຳເຫັນທາງດ້ານວິຊາການເພື່ອເປັນການປັບປຸງການຈັດຕັ້ງຂອງກອງບັນຊາການທະຫານແຂວງອຸດົມໄຊໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ສາມາດຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ແລະເພື່ອເປັນການສ້າງພະນັກງານໃຫ້ເປັນຜູ້ສືບທອດໃນຕໍ່ໜ້າ,ພ້ອມທັງເໜັ້ນໜັກໃຫ້ ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ມີຄວາມເຂັ້ມແຂງ, ກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກຳນົດ, ກົດລະບຽບຂອງກອງທັບ, ຍົກສູງສະຕິລະວັງຕົວກຽມພ້ອມຢ່າງຮອບດ້ານ, ເອົາໃຈໃສ່ປັບປຸງແບບແຜນວິທີເຮັດວຽກງຕາມຫຼັກການຂອງພັກ, ຕາມຄວາມຮັບຜິດຊອບໜ້າທີ່ວຽກງານຂອງຕົນ, ເຕົ້າໂຮມຄວາມສາມັກຄີໃຫ້  ແໜ້ນໜາ, ພ້ອມກັນເຮັດສຳເລັດໜ້າທີ່ ທີ່ພັກ-ລັດການຈັດຕັ້ງມອບໝາຍໃຫ້.

ໂດຍ: ທະນູວັນ

Post a Comment

0 Comments