ແຂວງຈໍາປາສັກ ມີຄວາມຕ້ອງການງົບປະມານ 3,76 ຕື້ກີບ ເພື່ອແກ້ໄຂສຸກເສີນກໍ່ສ້າງ ແລະ ສ້ອມແປງເສັ້ນທາງທີ່ໄດ້ຮັບຜົນກະທົບຈາກໄພນໍ້າຖ້ວມ




ສ້ອມແປງເສັ້ນທາງ ແລະ ຂົວ ທີ່ຖືກເສຍຫາຍຈາກໄພນໍ້າຖ້ວມທ່ານ ປອ.ສຸກຂະເສີມ ປາກດີມະນີວົງ ກໍາມະການພັກແຂວງ ຫົວໜ້າພະແນກໂຍທາທິການ ແລະ ຂົນສົ່ງ(ຍທຂ)ແຂວງຈໍາປາສັກ ໃຫ້ສໍາພາດໃນທ້າຍເດືອນຕຸລາ 2019 ນີ້ວ່າ: ປັດຈຸບັນແຂວງຈໍາປາສັກ ມີຄວາມຕ້ອງການງົບປະມານ 3,76 ຕື້ກີບ ເພື່ອແກ້ໄຂສຸກເສີນກໍ່ສ້າງ ແລະ ສ້ອມແປງເສັ້ນທາງທີ່ໄດ້ຮັບຜົນກະທົບຈາກໄພນໍ້າຖ້ວມ, ໃນນັ້ນ ແກ້ໄຂສຸກເສີນເສັ້ນທາງເລກທີ 7808 ແຕ່ແຍກເສັ້ນທາງເລກທີ 13 ໃຕ້ ຫາບ້ານແຊລະບໍາ ແລະ ບ້ານກວາງຊີ ເມືອງຊະນະສົມບູນ ມູນຄ່າ 1,77 ຕື້ກີບ, ແກ້ໄຂສຸກເສີນ ເສັ້ນທາງເລກທີ 7812 ແຕ່ແຍກເສັ້ນທາງເລກທີ 16 ຫາບ້ານໃໝ່ໄຊສົມບູນ ເມືອງປາກຊ່ອງ ມູນຄ່າ 1,33 ຕື້ກີບ ແລະ ແກ້ໄຂສຸກເສີນຂົວເບເລ ຫ້ວຍຄົດນ້ອຍ ຕາມເສັ້ນທາງເລກທີ 7812 ເມືອງປາກຊ່ອງ ໃນມູນຄ່າ 0,66 ຕື້ກີບ ເຊິ່ງຄວາມຕ້ອງການງົບປະມານແກ້ໄຂສຸກເສີນດັ່ງກ່າວ ພະແນກ ຍທຂ ແຂວງພວກເຮົາ ໄດ້ສ້າງເປັນເອກະສານສະເໜີຫາກົມຂົວທາງ ກະຊວງ ຍທຂ ແລ້ວ, ຖ້າວ່າເພິ່ນອະນຸມັດ ພະແນກພວກເຮົາກໍ່ຈະໄດ້ລົງມືຈັດຕັ້ງປະຕິບັດ.

ທ່ານ ປອ.ສຸກຂະເສີມ ໃຫ້ຮູ້ຕື່ມວ່າ: ຈາກສະພາບນໍ້າຖ້ວມໃນທ້າຍເດືອນສິງຫາ-ຕົ້ນກັນຍາ 2019 ທີ່ຜ່ານມາ ທົ່ວແຂວງຈໍາປາສັກ ມີເສັ້ນທາງຫຼວງແຫ່ງຊາດ, ທາງຫຼວງທ້ອງຖິ່ນ ແລະ ຂົວຕ່າງໆ ໄດ້ຮັບຄວາມເສຍຫາຍທັງໝົດ ຄິດເປັນມູນຄ່າຫຼາຍຕື້ກີບ, ໃນນັ້ນ ເສັ້ນທາງທີ່ໄດ້ຮັບຜົນກະທົບ ເສຍຫາຍທັງໝົດ ຈໍານວນ 115 ເສັ້ນ ມູນຄ່າເສຍຫາຍ 61,58 ຕື້ກີບ, ເສັ້ນທາງຖືກຕັດຂາດ 23 ເສັ້ນ ມູນຄ່າເສຍຫາຍ 16,24 ຕື້ກີບ, ຂົວຫັກ ແລະ ຖືກນໍ້າພັດຊຸອອກ 7 ແຫ່ງ ມູນຄ່າເສຍຫາຍ 9,60 ຕື້ກີບ ເຊິ່ງປັດຈຸບັນ ພະແນກ ຍທຂ ໄດ້ເຮັດໜັງສືສະເໜີຫາພະແນກແຜນການ ແລະ ການລົງທຶນແຂວງ ແລ້ວ ເພື່ອຂໍງົບປະມານເຂົ້າໃນການສ້ອມແປງແກ້ໄຂສຸກເສີນບັນດາເສັ້ນທາງ ແລະ ຂົວ ທີ່ຖືກກະທົບຈາກສະພາບໄພນໍ້າຖ້ວມດັ່ງກ່າວ.


ຫົວໜ້າພະແນກ ຍທຂ ແຂວງ ຊີ້ແຈງຕອນທ້າຍອີກວ່າ: ການກໍ່ສ້າງ ຫຼື ສ້ອມແປງ ເສັ້ນທາງ-ຂົວທີ່ເປ້ເພເສຍຫາຍຈາກສະພາບນໍ້າຖ້ວມ ມັນບໍ່ແມ່ນເລື່ອງງ່າຍດາຍ, ສໍາຄັນຕ້ອງມີງົບປະມານ, ລັດຖະບານເຫັນດີ ແລະ ສະພາອະນຸມັດ ຈິ່ງສາມາດຈັດຕັ້ງປະຕິບັດໄດ້, ຍ້ອນແນວນັ້ນ ຈິ່ງຂໍໃຫ້ທຸກພາກສ່ວນ, ອໍານາດການປົກຄອງທຸກຂັ້ນ ຕະຫຼອດຮອດພໍ່ແມ່ປະຊາຊົນທຸກທ້ອງຖິ່ນຮາກຖານ ຈົ່ງຮັບຮູ້ເຂົ້າໃຈຕໍ່ບັນຫານີ້.

ຂ່າວ-ພາບ: ທູນທອງໃຈ 

Post a Comment

0 Comments