ບໍລິສັດ ETL ແນະນໍາເຄື່ອງຫມາຍການຄ້າໃຫມ່, ເຄືອຂ່າຍໃຫມ່ ແລະ ການບໍລິການແບບໃໝ່ໃນລາວ




ວັນທີ 15 ພະຈິກ 2019ນີ້, ບໍລິສັດ ອີທີແອລ(ETL) ຈໍາກັດ, ໄດ້ຈັດງານແນະນໍາເຄື່ອງຫມາຍການຄ້າໃຫມ່, ເຄືອຂ່າຍໃໝ່, ບໍລິການໃໝ່ ແລະການບໍລິການເຄືອຂ່າຍ 4.5G ທົ່ວປະເທດລາວ ຢ່າງເປັນທາງການ ພາຍໃຕ້ການເປັນປະທານຂອງທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ​ ກະຊວງ​ ໄປສະນີໂທລະຄົມມະນາຄົມ ແລະການສື່ສານ, ໂດຍເປັນກຽດເຂົ້າຮ່ວມມີ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງ ໄປສະນີໂທລະຄົມມະນາຄົມ ແລະການສື່ສານ, ທ່ານ ຮວງ ສູຢູນ ຜູ້ອໍານວຍການບໍລິສັດ ອີທີແອລ ຈໍາກັດ ພ້ອມດ້ວຍຄະນະ ແລະ​ພະນັກງານ​ ETL,​ ແຂກທີ່ເຊີນ​ ແລະບັນດາລູກຄ້າຂອງ ETL ເຂົ້າຮ່ວມ.



ປະຈຸບັນ ETL ໄດ້ເປີດໃຫ້ບໍລິການ 4.5G ຈໍານວນ 1.336 ຈຸດໃນຂອບເຂດທົ່ວປະເທດ, ນອກນັ້ນ, ETL ຍັງຈະສືບຕໍ່ຂະຫຍາຍພື້ນທີ່ໃຫ້ບໍລິການ 4.5G ຕື່ມອີກ.​ ປະຈຸບັນເຄືອຂ່າຍ ETL​ ສາມາດຄວບຄຸມໄດ້ເຖິງ 89% ຂອງພື້ນທີ່ທົ່ວປະເທດລາວ​ ແລະມີ​ 3.500​ ສະຖານີໃນທົ່ວປະເທດ.​

ໃນພິທີທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ​ ກະຊວງ​ ໄປສະນີໂທລະຄົມມະນາຄົມ ແລະການສື່ສານກ່າວວ່າ: ບໍລິສັດ ETL ຈໍາກັດ, ໃນນາມລັດວິສາຫາກິດ​ ໂທລະຄົມມະນາຄົມ​ ໂດຍການຮ່ວມມືສອງຝ່າຍຈີນ-ລາວ ທີ່ມີຄວາມກ້າວໜ້າທັນສະໄໝດ້ວຍເຕັກໂນໂລຊີ​ ໄດ້ມີການລົງທຶນເຂົ້າໃນການພັດທະນາ​ ​ແລະກໍ່ສ້າງລະບົບອິນເຕີເນັດຄວາມໄວສູງ 4G,​ 4.5G​ ແລະ5G ໃນຄັ້ງນີ້,​ ເປັນການປະກອບສ່ວນສໍາຄັນເຂົ້າໃນການພັດທະນາຂະແໜງການໄປສະນີໂທລະຄົມມະນາຄົມ ແລະການສື່ສານ ໃນ ສປປ ລາວ ແລະຫວັງວ່າ,​ ບໍລິສັດ​ ETL​ ຈະສືບຕໍ່ພັດທະນາເຄືອຂ່າຍຂອງຕົນຢ່າງບໍ່ຢຸດຢັ້ງ ເພື່ອຮັບໃຊ້ການພັດທະນາເສດຖະກິດ-ສັງຄົມ ໃຫ້ທຸກຄົນມີຄວາມເຊື່ອຫມັ້ນໃນຄຸນນະພາບ ແລະການບໍລິການ.



ໃນໂອກາດດັ່ງກ່າວ: ທ່ານ ຮວງ ສູຢູນ(Huang Shu Yun) ປະທານຜູ້ບໍລິຫານໃຫຍ່ຂອງ ETL ໄດ້ກ່າວວ່າ: ສຳພັດໃໝ່ກັບສຸດຍອດ 4.5 G ເຄືອຂ່າຍອິນເຕີເນັດໃນລາວ.​ສໍາລັບເຄືອຂ່າຍ 4.5 G, 4G ແມ່ນໄດ້ຄອບຄຸມທົ່ວທຸກແຂວງໃນປະເທດລາວແລ້ວ, ໂດຍໄດ້ເລັ່ງໃສ່ການສ້າງໂຄງລ່າງພື້ນຖານຂອງລະບົບການຊື່ສານພາຍໃນທົ່ວປະເທດ, ປັບປຸງ ຂະແໜງວຽກງານການຊື່ສານ ແລະ ອິນເຕີເນັດ, ຕັ້ງໜ້າ ຄົ້ນຄວ້າເຕັກໂນໂລຊີໃໝ່ 5G ເພື່ອສະໜອງ ການບໍລິການທີ່ດີທີ່ສຸດ ທາງດ້ານພື້ນຖານ ໂທລະຄົມ ໃຫ້ແກ່ສັງຄົມ.



ບໍລິສັດ ອີທີແອລ ຈຳກັດ ທີ່ເປັນໜຶ່ງໃນຜູ້ໃຫ້ບໍລິການດ້ານການສື່ສານໂທລະຄົມມະນາຄົມ ໃນ ສປປ ລາວ ໄດ້ນໍາເອົາເຕັກໂນໂລຊີໃໝ່ໆ ທີ່ທັນສະໄໝ ແລະ ກ້າວໜ້າມາໃຫ້ບໍລິການແກ່ສັງຄົມລາວຕະຫຼອດມາ ແລະ ການເປີດນຳໃຊ້ 4,5G ໃນຄັ້ງນີ້,​ ຖືເປັນຂີດໝາຍອັນສໍາຄັນຂອງວຽກງານການສື່ສານ ໂທລະຄົມມະນາຄົມຂອງລາວ ຜູ້ຊົມໃຊ້ໃນລາວ ຈະໄດ້ສໍາພັດກັບເທັກໂນໂລຢີ,​ທີ່ໄຮ້ສາຍ ແລະ ສາມາດຕິດຕໍ່ກັນແບບບໍ່ມີຂີດຈຳກັດ.

ພ້ອມນີ້,​ ETL ຍັງໄດ້ມີການພັດທະນາ, ຜະລິດຕະພັນໃໝ່, ເຄື່ອຂ່າຍໃໝ່ ແລະ ບໍລິການໃໝ່ ທີ່ສາມາດຕອບໂຈດຂອງຜູ້ຊົມໃຊ້ທາງໂທລະຄົມມະນາຄົມໄດ້ເປັນຢ່າງດີ.​ນອກນີ້,​ ອີທີແອລ ຍັງຈະພັດທະນາທາງດ້ານການສື່ສານ ເພື່ອຕອບສະໜອງການຊົມໃຊ້ທີ່ປ່ຽນແປງໄປເລື່ອຍໆ ແລະ ກ້າວໄປສູ່ຍຸກຂອງ 5G ໃນອະນາຄົດອັນໃກ້ໆນີ້.




----------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------




Post a Comment

0 Comments