foodpanda ຢໍ້າການບໍລິການ ທີ່ປະທັບໃຈ ໃນການສັ່ງອາຫານ ທີ່ມີຄຸນນະພາບ, ວ່ອງໄວ,​ ລາຄາເໝາະສົມ



ໃນວັນທີ 22 ພະຈິກ 2019 ທີ່ສູນການຄ້າວຽງຈັນເຊັນເຕີ້ ນະຄອນຫຼວງວຽງຈັນ, ໄດ້ຈັດພິທີເປີດໂຕ “ຟູດແພນດ້າ”  ຜູ້ໃຫ້ບໍລິການລະດັບສາກົນໃນການຈັດສົ່ງອາຫານ, ເຄື່ອງດື່ມ ແລະ ອື່ນໆ. ຊຶ່ງຖືເປັນທຳອິດຢູ່ນະຄອນຫຼວງວຽງຈັນ ໂດຍຈຸດປະສົງກໍເພື່ອເປີດໂລກແຫ່ງລົດຊາດອາຫານທີ່ໜ້າລິ້ມລອງໃຫ້ແກ່ຊາວນະຄອນຫຼວງວຽງຈັນຜ່ານຜູ້ໃຫ້ບໍລິການທີ່ມາພ້ອມກັບເສື້ອຜ້າສີສັນສົດ ໃສ (ຊຸດສີບົວ) ເຫັນແລ້ວຕ້ອງສະດຸດຕາທີ່ມາພ້ອມກັບບັນດາຮ້ານຄ້າທີ່ເຂົ້າຮ່ວມຫຼາຍກວ່າ 300 ຮ້ານ. ໂດຍການໃຫ້ກຽດເຂົ້າຮ່ວມຂອງ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ, ທ່ານ ເຈຄ໊ອບ ເຊບັດສະຕຽນ ແອັງເຈເລ ປະທານຜູ້ບໍລິຫານຟູດແພນດ້າປະຈຳພາກພື້ນອາຊີ-ແປຊີຟິກ, ທ່ານ ນາງ ທັນຍາລັດ ຈະເລີນສຸກ ຜູ້ອຳນວຍການຟູດແພນດ້າລາວ, ມີບັນດາຫ້າງຮ້ານທີ່ເຂົ້າຮ່ວມໂຄງການ ແລະ ພາກສ່ວນກ່ຽວຂ້ອງເຂົ້າຮ່ວມ.



ທ່ານ ເຈຄ໊ອບ ເຊບັດສະຕຽນ ແອັງເຈເລ ປະທານຜູ້ບໍລິຫານຟູດແພນດ້າປະຈຳພາກພື້ນອາຊີ-ແປຊີຟິກ ກ່າວວ່າ:  ຟູດແພນດ້າ ແມ່ນຊ່ອງທາງການໃຫ້ບໍລິການອີກຊ່ອງທາງໜຶ່ງຊຶ່ງເປັນມິດກັບຜູ້ໃຊ້ງານທີ່ຊ່ວຍໃຫ້ລູກຄ້າສາມາດເພີດເພີນໄປກັບການຮັບປະ ທານອາຫານໄດ້ຢ່າງງ່າຍດາຍ, ບໍ່ວ່າບັນດາທ່ານຈະຢູ່ແຫ່ງຫົນໃດກໍຕາມ”, ພວກເຮົາຮູ້ສຶກຕື່ນເຕັ້ນຫຼາຍທີ່ໄດ້ນຳເອົາປະສົບການແບບຟູດແພນດ້າເຂົ້າມາສູ່ ສປປ ລາວ ແລະ ພວກເຮົາຈະພະຍາຍາມຢ່າງເຕັມທີ່ເພື່ອຊອກຫາເມນູອາຫານທີ່ແຊບທີ່ສຸດມາບໍລິ ການໃຫ້ແກ່ລູກຄ້າ.



ປັດຈຸບັນ, ຊາວນະຄອນຫຼວງວຽງຈັນສາມາດສັ່ງອາຫານຫຼາກຫຼາຍເມນູໃຫ້ມາສົ່ງກົງເຖິງເຮືອນ, ຫ້ອງການ ຫຼຶ ແມ່ນແຕ່ສະຖານທີ່ ນອກເຮືອນ, ຟູດແພນດ້າຈະເປັນອີກໜຶ່ງຕົວຊ່ວຍທີ່ຈະເພີ່ມຄວາມສະດວກສະບາຍໃຫ້ແກ່ລູກຄ້າໃນການເຂົ້າເຖິງອາຫານລົດຊາດແຊບໄດ້ທຸກບ່ອນທຸກເວລາ. ດ້ວຍວິໄສທັດທີ່ຢາກຈະຈັດສົ່ງອາຫານທີ່ແຊບໄປທົ່ວພາກພື້ນອາຊີ-ແປຊີຟິກ. ທັງນີ້ ສປປ ລາວແມ່ນເປັນປະເທດທີ 9 ທີ່ເຂົ້າມາເປັນສ່ວນໜຶ່ງຂອງຄອບຄົວຟູດແພນດ້າ, ຊຶ່ງບໍລິສັດມີຈຸດປະສົງຢາກໃຫ້ບໍລິການທັງຮ້ານອາຫານ ແລະ ລູກຄ້າພາຍໃນເຂດນະຄອນຫຼວງວຽງຈັນໃຫ້ມີຊ່ອງທາງໃໝ່ໆເພື່ອຂາຍອາຫານ ແລະ ເພີດເພີນໄປກັບການຮັບປະທານອາຫານທີ່ແຊບບໍ່ວ່າພວກເຂົາຈະຢູ່ໃສກໍຕາມ.
ທ່ານ ນາງ ທັນຍາລັດ ຈະເລີນສຸກ, ຜູ້ອຳນວຍການຟູດແພນດ້າລາວ ກ່າວວ່າ: ຟູດແພນດ້າຕ້ອງການທີ່ຈະປ່ຽນມຸມມອງ ແລະ ປະສົບການຂອງຜູ້ຄົນຕໍ່ການຈັດສົ່ງອາຫານ, ໂດຍການເອົາໃຈໃສ່ຢ່າງມີປະສິດທິພາບຕໍ່ລູກຄ້າທີ່ຕ້ອງການຮັບອາຫານທີ່ຍັງສົດ ແລະ ອຸ່ນຢູ່ຕະຫຼອດເວລາ ບໍ່ວ່າລູກຄ້າຢາກຈະຮັບປະທານອາຫານເມນູໃດກໍຕາມພວກເຮົາກໍຈະຊ່ວຍຕອບສະໜອງຄວາມຕ້ອງ ການຂອງລູກຄ້າຕະຫຼອດໄປ.



ຟູດແພນດ້າ ແມ່ນການບໍລິການສັ່ງ ແລະ ຈັດສົ່ງອາຫານທີ່ງ່າຍດາຍຜ່ານທາງແອັບເທິງໂທລະສັບມືຖືທັງໃນລະບົບ iOS ແລະ Android ທີ່ໃຫ້ບໍລິການແອັບ ແລະ ເວັບໄຊ, ຊ່ວຍໃຫ້ລູກຄ້າສາມາດຄົ້ນເບິ່ງຮ້ານອາຫານໃນເຄືອຂ່າຍທຸລະກິດໃຫຍ່ໆ ລວມທັງ ຮ້ານອາຫານໃນທ້ອງຖິ່ນທີ່ເປັນທີ່ນິຍົມຫຼາກຫຼາຍຮ້ານເພື່ອຊອກຫາເມນູອາຫານທີ່ແຊບ ແລະ ແປກໃໝ່ດ້ວຍຄວາມສະດວກສະ ບາຍທີ່ສຸດ. ດ້ວຍຄວາມສາມາດໃນການຕິດຕາມເມນູອາຫານທີ່ສັ່ງ, ການຄົ້ນຫາຕົວເລືອກຮ້ານອາຫານໃໝ່ໆ ແລະ ການຊອກຫາຂໍ້ສະເໜີພິເສດຕ່າງໆທີ່ຕ້ອງການ. ນອກຈາກນີ້ ຟູດແພນດ້າກໍຈະຊ່ວຍເຮັດໃຫ້ການຈັດສົ່ງອາຫານງ່າຍດາຍຂຶ້ນໃນທຸກຂັ້ນຕອນ ເພາະບໍລິສັດຮູ້ວ່າມັນບໍ່ແມ່ນພຽງແຕ່ການຮັບປະທານອາຫານເທົ່ານັ້ນ ແຕ່ມັນແມ່ນການເປີດໂລກກວ້າງສູ່ປະສົບການໃໝ່ໆນັບຕັ້ງແຕ່ຂັ້ນຕອນເລີ່ມຕົ້ນຈົນເຖິງຂັ້ນຕອນສຸດທ້າຍ.



ນອກຈາກນີ້, ລູກຄ້າຍັງສາມາດຊອກຫາເມນູອາຫານທີ່ຂາຍດີທີ່ສຸດຂອງແຕ່ລະຮ້ານ, ພ້ອມທັງອ່ານຄຳຕິຊົມຈາກລູກຄ້າຄົນອື່ນໆເພື່ອຊ່ວຍໃນການຕັດສິນໃຈ. ປັດຈຸບັນ ຟູດແພນດ້າໄດ້ມີການລວບລວມເອົາຮ້ານອາຫານໄວ້ຫຼາຍກວ່າ 300 ຮ້ານພາຍໃນເຂດນະຄອນຫຼວງວຽງຈັນ, ເປີດໃຫ້ບໍລິການທຸກມື້ຕັ້ງແຕ່ເວລາ 07:00 – 23:00 ໂມງ. ເພື່ອສຳຜັດປະສົບການແຫ່ງຄວາມສຸກໃນການສັ່ງອາຫານຄັ້ງທຳອິດຜ່ານຟູດແພນດ້າ ສາມາດດາວໂຫຼດແອັບໄດ້ແລ້ວຕອນນີ້ ຫຼື ເຂົ້າໄປທີ່ https://www.foodpanda.la

ພ້ອມນີ້, ຟູດແພນດ້າກໍໄດ້ມຸ່ງໝັ້ນທີ່ຈະນຳເອົາເມນູຍອດນິຍົມຈາກຮ້ານອາຫານໃນທ້ອງຖິ່ນໄປສູ່ຜູ້ຄົນທີ່ມັກຮັບປະທານອາຫານໃນທົ່ວໂລກ, ນັບແຕ່ສ້າງຕັ້ງບໍລິສັດເປັນຕົ້ນມາການໃຫ້ບໍລິການຈັດສົ່ງອາຫານຕາມຄວາມຕ້ອງການໄດ້ຂະຫຍາຍຕົວຈົນມີຮ້ານອາ ຫານທີ່ເປັນຄູ່ຮ່ວມຫຼາຍກວ່າ 30.000 ຮ້ານ, ໃນນັ້ນ ມີຫຼາຍກວ່າ 120 ເມືອງໃນ 11 ປະເທດຂອງທະວີບອາຊີ ແລະ ເອີຣົບ, ຟູດແພນດ້າໃຫ້ບໍລິການຢູ່ຮົງກົງ, ສິງກະໂປ, ໄທ, ມາເລເຊຍ, ປາກິສະຖານ, ໄຕ້ຫວັນ, ຟິລິບປິນ, ບັງກະລາເດັດ, ລາວ, ໂຣມານີ ແລະ ບູນກາຣີ ພາຍໃຕ້ການບໍລິຫານຂອງບໍລິສັດ ເດລິເວີຣີ້ ຮີໂຣ້ (Delivery Hero) ຊຶ່ງເປັນບໍລິສັດຊັ້ນນຳລະດັບໂລກໃນອຸດ ສາຫະກຳໃຫ້ບໍລິການຈັດສົ່ງອາຫານ. ສຳລັບຂໍ້ມູນເພີ່ມເຕີມສາມາດເຂົ້າໄປທີ່ foodpanda.la



ສ່ວນເດລິເວີຣີ້ ຮີໂຣ (Delivery Hero) ແມ່ນສູນລວມໃຫ້ບໍລິການສັ່ງ ແລະ ຈັດສົ່ງອາຫານອອນໄລຊັ້ນນຳລະດັບໂລກທີ່ຄອງອັນດັບໜຶ່ງດ້ວຍຈຳນວນຮ້ານອາຫານ, ຜູ້ໃຊ້ບໍລິການທີ່ເປັນປົກກະຕິ ແລະ ຍອດສັ່ງອາຫານໃນຫຼາຍປະເທດຫຼາຍກວ່າບໍລິສັດຄູ່ແຂ່ງຢູ່ໃນ 40 ປະເທດຂອງທະວີບເອີຣົບ, ຕາເວັນອອກກາງ & ອັບຟຣິກາເໜືອ, ອາເມຣິກາລາຕິນ ແລະ ພາກພື້ນອາຊີ-ແປຊິຟິກ, ເດລິເວີຣີ້ ຮີໂຣ້ ຍັງໃຫ້ບໍລິການຈັດສົ່ງອາຫານໃນເຂດຕົວເມືອງທີ່ມີປະຊາກອນອາໄສຢູ່ຢ່າງໜາແໜ້ນໃນ 200 ກວ່າແຫ່ງທົ່ວໂລກ ຊຶ່ງມີສຳນັກງານໃຫຍ່ຕັ້ງຢູ່ນະຄອນຫຼວງແບັກແລັງ ໃນນັ້ນ ມີພະນັກງານຫຼາຍກວ່າ 21.000 ຄົນ ສຳລັບຂໍ້ມູນເພີ່ມເຕີມສາມາດເຂົ້າໄປທີ່ www.deliveryhero.com.
ສຳລັບວິທີການສັ່ງອາຫານດ້ວຍການບໍລິການຜ່ານທາງເວັບໄຊ ຟູດແພນດ້າ ຫຼື ແອັບໃນລະບົບປະຕິບັດການ iOS ແລະ Android, ລູກຄ້າສາມາດເລືອກເຂດພື້ນທີ່ ແລະ ເບິ່ງລາຍຊື່ຮ້ານອາຫານທີ່ໃຫ້ບໍລິການຢູ່ເຂດໃກ້ຄຽງໂດຍໄດ້ລວບລວມໄວ້ໃຫ້ແລ້ວ, ຫຼັງຈາກລູກຄ້າເຫັນເມນູອາຫານທີ່ຕ້ອງການລູກຄ້າສາມາດສັ່ງອາຫານຢ່າງສະດວກສະບາຍຢູ່ເຮືອນ ຫຼື ຫ້ອງການ. ຊຶ່ງລາຍການອາຫານທີ່ສັ່ງຈະໄດ້ຮັບການປຸງແຕ່ງຈາກທາງຮ້ານອາຫານດ້ວຍຄວາມເອົາໃສ່ໃຈ, ແລ້ວພະນັກງານຂັບລົດຂອງຟູດແພນດ້າຈະໄປຮັບເອົາ ແລະ ຈັດສົ່ງໂດຍກົງເຖິງທີ່. ແລະ ອີກໜຶ່ງຊ່ອງທາງທີ່ຈະຕິດຕໍ່ກັບພວກເຮົາກໍຄື Facebook:   https://www.facebook.com/foodpanda.la/ ຫຼື Instagram:@foodpandalaos

ໂດຍ: ເພັງສະຫວັນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------

Post a Comment

0 Comments