ກອງປະຊຸມແນະນຳໂຄງການ ແລະ ວາງແຜນກິດຈະກຳຮ່ວມກັບອຳນາດການປົກຄອງບ້ານ ພາຍໃຕ້ໂຄງການເສີມສ້າງຄວາມເຂັ້ມແຂງໃຫ້ກັບຊາວໜຸ່ມໃນຊຸມຊົນ



ກອງປະຊຸມແນະນຳໂຄງການ ແລະ ວາງແຜນກິດຈະກຳຮ່ວມກັບອຳນາດການປົກຄອງບ້ານ ພາຍໃຕ້ໂຄງການເສີມສ້າງຄວາມເຂັ້ມແຂງໃຫ້ກັບຊາວໜຸ່ມໃນຊຸມຊົນ ໄດ້ເປີດຂື້ນຢ່າງເປັນທາງການໃນຕອນເຊົ້າວັນທີ 12 ທັນວາ 2019 ນີ້ທີ່ຫໍປະຊຸມບ້ານ ຫ້ວຍຊົວະ ເມືອງປາກທາ ແຂວງບໍ່ແກ້ວ ໂດຍການເຂົ້າຮ່ວມຂອງທ່ານ ນາງ ຈັນສຸກ ວັນນະວົງ ຄະນະປະຈຳພັກເມືອງ ຜູ້ຊີ້ນຳອົງການຈັດຕັ້ງມະຫາຊົນ, ທ່ານ ສົມສັກ ມະຫາພົນ ຮອງເລຂາຄະນະບໍລິຫານງານຊາວໜຸ່ມແຂວງບໍ່ແກ້ວ, ທ່ານ ອານຸສິນ ສັກປະເສີດ ອຳນວຍການສະມາຄົມສົ່ງເສີມສຸຂະພາບຄອບຄົວສາຂາແຂວງບໍ່ແກ້ວ, ມີບັນດາ ຄະນະພັກຮາກຖານ, ອຳນາດການປົກຄອງບ້ານ, ທິມງານຂອງແຂວງ, ເມືອງຕະຫຼອດຮອດສະມາຊິກຊາວໜຸ່ມ, ຍິງໜຸ່ມພາຍໃນບ້ານເຂົ້າຮ່ວມ.





ພິທີ ທ່ານ ອານຸສິນ ສັກປະເສີດ ອຳນວຍການສະມາຄົມສົ່ງເສີມສຸຂະພາບຄອບຄົວ ໄດ້ແນະນຳສະເໜີໂຄງການເສີມສ້າງຄວາມເຂັ້ມແຂງໃຫ້ກັບຊາວໜຸ່ມໃນຊຸມຊົນໃນຄັ້ງນີ້ວ່າ: ເປັນການເພີມທະວີການມີສ່ວນຮ່ວມຂອງອຳນາດການປົກຄອງທ້ອງຖິ່ນໃນການປ້ອງກັນຢາເສບຕິດຢູ່ພາຍໃນບ້ານ, ເຊີ່ງໂຄງການດັ່ງກ່າວນີ້ແມ່ນຈະໃຊ້ໄລຍະເວລາ 1 ປີ, ເລີມປະຕິບັດເດືອນ 6 ປີ 2019 ຫາ ເດືອນ 6 ປີ 2020, ທ່ານຍັງໃຫ້ຮູ້ຕື່ມວ່າພາຍຫຼັງເປີດໂຄງການນີ້ແລ້ວ ແມ່ນຈະໄດ້ລົງຊຸກຍູ້ຕິດຕາມ, ຝຶກອົບຮົມ ແລະ ເຜີຍແຜ່ກ່ຽວກັບສຸຂະພາບໄວໜຸ່ມ ລວມທັງຜົນຮ້າຍຂອງສິ່ງເສບຕິດ ແລະ ວິທີປ້ອງກັນ, ຈັດກິດກຳລວມກຸ່ມຊາວໜຸ່ມໃນບ້ານ, ຈັດກິດຈະກຳທົບທວນກ່ຽວກັບຄະນະກຳມະການ ແລະ ກົນໄກໃນການແກ້ໄຂບັນຫາສຸຂະພາບໄວໜຸ່ມ ລວມທັງຫຼຸດຜ່ອນບັນຫາສິ່ງເສບຕິດ, ສ້າງກິດຈະກຳຫາລາຍໄດ້ຂອງກຸ່ມຊາວໜຸ່ມພາຍໃນບ້ານ ແລະ ຈັດກອງປະຊຸມກັບໄວໜຸ່ມເພື່ອສ້າງກຸ່ມເພືອນສອນເພືອນ ທັງນີ້ກໍ່ເພື່ອເປັນການເພີມຄວາມຮູ້ ແລະ ທັກສະຂອງຊາວໜຸ່ມກ່ຽວກັບການປ້ອງກັນສິ່ງເສບຕິດໃນຊຸມຊົນກໍ່ຄືບ້ານຫ້ວຍຊົວະ, ເພີມບົດບາດຊາວໜຸ່ມພາຍໃນບ້ານຫ້ວຍຊົວະໃຫ້ຫຼາຍຂື້ນ ແລະ ທັງເປັນການປະສານງານ, ການເຮັດວຽກຮ່ວມກັນຂອງອົງການຈັດຕັ້ງບ້ານ ແລະ ເປັນການຫຼຸດຜ່ອນບັນຫາທີ່ກ່ຽວຂ້ອງກັບສິ່ງເສບຕິດ, ປະກົດການຫຍໍ້ທໍ້ເຊັ່ນ: ຂີ້ຫຼັກງັດແງະ, ການຜິດຖຽງກັນ, ການປຸ້ນຈີ້ ເປັນຕົ້ນ ແລະ ບ້ານມີຄວາມສະຫງົບສຸກປອດໄພ.
ພາບ-ຂ່າວ: ວັນນະເດດ ວິໄລຄຸນ.

Post a Comment

0 Comments