ເມືອງປາກກະດິງທຳລາຍເຄື່ອງບໍລິໂພກທີ່ເຊື່ອມຄຸນ ແລະ ຢາຕ້ອງຫ້າມ ມູນຄ່າ 15 ລ້ານກ່ວາກີບ.


ໃນຕອນເຊົ້າວັນທີ່ 6 ທັນວາ 2019 ຜ່ານມາ ຢູ່ເມືອງປາກກະດິງ ແຂວງບໍລິຄຳໄຊ ໄດ້ມີພິທີທຳລາຍເຄື່ອງບໍລິໂພກທີ່ເຊື່ອມຄຸນ ແລະ ຢາຕ້ອງຫ້າມ ມູນຄ່າ 15 ລ້ານກ່ວາກີບ. ທີ່ໄດ້ມາຈາກ ຄະນະກຳມະການຄຸ້ມຄອງອາຫານ ແລະ ຢາ ລົງເຄື່ຶອນໄຫວ ກວດກາໃນລະຫວ່າງວັນທີ 18-27 ພະຈິກ 2019. 




ການຈັດຕັ້ງເຄື່ອນໃຫວກວດກາອາຫານ ແລະ ຢາ ໄດ້ສຸ່ມກວດຮ້ານຂາຍເຄື່ອງຍ່ອຍ ແລະ ຮ້ານຂາຍເຄື່ອງສົ່ງຈຳນວນ 78 ຮ້ານ, ກວດພົບເຄື່ອງບໍລິໂພກເຊື່ອມຄຸນ ແລະ ຢາຕ້ອງຫ້າມຢູ່ 38 ຮ້ານ. ໃນນັ້ນມີເຄື່ອງບໍລິໂພກທີ່ເຊື່ອມຄຸນ ຈຳນວນ 79 ລາຍການ ມີປະເພດເຂົ້າໜົມ, ເຄື່ອງດື່ມ, ໝີ່ສຳເລັດຮູບ, ເຄື່ອງບໍລິໂພກໃນຄົວເຮືອນ, ຢາສະຜົມ ແລະ ນ້ຳມັນທາຜີວ ມູນຄ່າ 9.133.000ກີບ, ກວດພົບຢາປົວພະຍາດທີ່ລັກຂາຍຕາມຮ້ານຂາຍເຄື່ອງຍ່ອຍ ເຊີ່ງຜິດຕໍ່ກົດໝາຍຄຸ້ມຄອງຢາ ແລະ ອຸປະກອນການແພດ ມີຈຳນວນ 40 ລາຍການ ມູນຄ່າ 6.000.000 ກີບ, ລວມມູນຄ່າທັງໝົດ 15.133.000 ກີບ. 



ຄະນະກຳມະການຄຸ້ມຄອງອາຫານ ແລະ ຢາ ຈຶ່ງໄດ້ເຮັດບົດບັນທຶກ ແລະ ສຶກສາອົບຮົມໃຫ້ຜູ້ປະກອບການຮັບຮູ້-ເຂົ້າໃຈເຖິງແນວທາງນະໂຍບາຍ ແລະ ແຜນຍຸດທະສາດການຄຸ້ມຄອງຄວາມປອດໄພຂອງອາຫານ ແລະ ຢາໃນແຕ່ລະໄລຍະ ແລະ ໄດ້ອາຍັດສິນຄ້າ-ເຄື່ອງບໍລິໂພກທີ່ເຊື່ອມຄຸນ-ສິນຄ້າຕ້ອງຫ້າມໄວ້ ແລະ ໄດ້ຈັດພິທີທຳລາຍຢ່າງເປັນທາງໃນຕອນເຊົ້າວັນທີ 6 ທັນວາ 2019 ຢູ່ທີ່ສະໜາມຂີ້ເຫຍື້ອເຂດທາງຊຳພູ.




 ໂດຍການທຳລາຍແມ່ນໄດ້ຈູດຖີ້ມ. ເປັນກຽດເຂົ້າຮ່ວມໃນພິທີໂດຍທ່ານ ໂຄສາຈານ ແສນທະວີໄຊ ຮອງເຈົ້າເມືອງປາກກະດິງ ຜູ້ຊີ້ນຳຄະນະກຳມະການຄຸ້ມຄອງອາຫານ ແລະ ຢາ ຂັ້ນເມືອງ, ມີຕາງຫນ້າຫ້ອງການອ້ອມຂ້າງເມືອງ ແລະ ຄະນະກຳມະການຄຸ້ມຄອງອາຫານ ແລະ ຢາ ເຂົ້າຮ່ວມຢ່າງພ້ອມພຽງ. 


ສະນັ້ນຈຶ່ງຂໍຝາກເຕືອນມາຍັງພໍ່ແມ່ປະຊາຊົນທຸກທົ່ວໜ້າ ແລະ ພໍ່ຄ້າແມ່ຄ້າ ກ່ອນຊື້-ກ່ອນຂາຍ-ກ່ອນກິນ ຕ້ອງກວດເບີ່ງວັນຜະລິດ ແລະ ວັນໝົດອາຍຸ ຂອງເຄື່ອງບໍລິໂພກ ເພື່ອຮັບປະກັນໃຫ້ມີຄວາມປອດໄພຈາກອາຫານ ແລະ ຢາ, ໄດ້ຮັບຜົນປະໂຫຍດທັງຜູ້ຊື້ກິນ ແລະ ຜູ້ຂາຍ.

Post a Comment

0 Comments