ການນຳແຂວງອຸດົມໄຊ ແລະ ເມືອງໄຊ ສະດຸດີຜູ່ນໍາແຫ່ງການປະຕິວັດ ໃນໂອກາດວັນຊາດ 2 ທັນວາ ຄົບຮອບ 44 ປີ




ຂ່າວ: ຄານມະນີ ຮຽນດໍຈັນ

  ເນື່ອງໃນໂອກາດສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 44 ປີ ( 2 ທັນວາ 1975 – 2 ທັນວາ 2019 ) ການນໍາແຂວງອຸດົມໄຊ ນໍາໂດຍທ່ານ ປອ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ອຸດົມໄຊ ແລະ ການນຳເມືອງໄຊ ນຳໂດຍທ່ານ ວາລີ ຈືນໍເຢັງ ເລຂາພັກເມືອງ, ເຈົ້າເມືອງ - ເມືອງໄຊ ພ້ອມດ້ວຍພະນັກງານຫລັກແຫລ່ງຂອງແຂວງ ແລະເມືອງ ໄດ້ພ້ອມພຽງກັນນຳເອົາກະຕ່າດອກໄມ້ມາວາງ ຢູ່ທີ່ອານຸສອນສະຖານ ປະທານ ໄກສອນ ພົມວິຫານ. ເພື່ອສະແດງຄວາມກະຕັນຍູຮູ້ບຸນຄຸນ ແລະ ຈາລຶກ-ຄຸນງາມຄວາມດີ ຕໍ່ອະດີດຜູ້ນຳທີ່ເປັນວິລະບູລຸດແຫ່ງ ຊາດລາວ ແລະ ເປັນຜູ້ນຳທີ່ ແສນເຄົາລົບຮັກຂອງປວງຊົນລາວທັງຊາດ ເປັນນັກຮົບປະຕິວັດຜູ້ດີເດັ່ນ ເປັນຜູ້ຮັກຊາດທີ່ຍິ່ງໃຫຍ່ບໍ່ຍອມເປັນຂ້ອຍຂ້າຂອງ ຊາດອື່ນ ເປັນລູກຫຼານຜູ້ປະເສີດ ຂອງປະຊາຊົນລາວ ແລະ ເປັນຜູ້ ກໍ່ຕັ້ງພັກປະຊາຊົນປະຕິວັດ ລາວ, ທັງເປັນການສະແດງຄວາມກະຕັນຍູ, ຮູ້ບຸນຄຸນຕໍ່ນັກຮົບປະຕິວັດທີ່ເສຍສະຫຼະຊີວິດເພື່ອປະເທດຊາດ, ເພື່ອປະຊາຊົນລາວບັນດາເຜົ່າ.



ປະທານໄກສອນ ພົມວິຫານ ເປັນບຸກຄົນໜຶ່ງທີ່ມີຜົນງານອັນໃຫຍ່ຫຼວງ ເຊິ່ງໄດ້ນໍາພາປະຊາຊົນລາວບັນດາເຜົ່າ ຕໍ່ສູ້ຕ້ານການຮຸກຮານຂອງພວກລັດທິລ່າເມືອງຂຶ້ນແບບເກົ່າ ແລະ ໃຫມ່ ຈົນໄດ້ຮັບໄຊຊະນະ, ນຳເອົາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ ມາສູ່ປະຊາຊົນລາວບັນດາເຜົ່າທັງຊາດ ສາມາດປະກາດເອກະລາດ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975. 




ຕໍ່ກັບຜົນງານດັ່ງກ່າວ ການນຳແຂວງ,ເມືອງໄຊ ຕະຫຼອດຮອດປະຊາຊົນ ໂດຍສະເພາະແຂວງ ອຸດົມໄຊ ຂໍຈົດຈຳຈາລຶກບຸນຄຸນ,ຄຸນງາມຄວາມດີ, ຜົນງານ ຂອງທ່ານ ໄວ້ໃນດວງໃຈ ຢ່າງບໍ່ມີວັນລືມ ແລະ ພ້ອມທີ່ຈະນຳເອົາບົດຮຽນ ຄຸນງາມຄວາມດີ, ຄຸນສົມບັດສິນທໍາປະຕິວັດ, ແບບຢ່າງທີ່ຫາຍາກ ມານຳໃຊ້ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເກີດດອກອອກຜົນ ແລະ ຈະເລີນສີວິໄລຂື້ນໄປເລື້ອຍໆ.

Post a Comment

0 Comments