ບໍ​ລິ​ສັດ ຊື​ເຟິງ ລ້ານ​ຊ້າງ ມີ​ເນໂຣນ​ສ໌ ລິ​ມິ​ເຕັດ ໄດ້​ຮັບ​ລາງວັນ "ອາ​ຊຽນ" ດີ​ເດັ່ນ​ດ້ານ​ແຮ່​ທາດ ເປັນ​ປີ​ທີ 2


ບໍ​ລິ​ສັດ ຊື​ເຟິງ ລ້ານ​ຊ້າງ ມີ​ເນໂຣນ​ສ໌ ລິ​ມິ​ເຕັດ ໄດ້​ຮັບ​ລາງວັນ "ອາ​ຊຽນ" ດີ​ເດັ່ນ​ດ້ານ​ແຮ່​ທາດ ເປັນ​ປີ​ທີ 2


ໃນ​ວັນ​ທີ 13 ທັນ​ວາ 2019, ໄດ້​ມີ​ການ​ປະ​ກາດ ຜົນ​ລາງວັນ “ອາ​ຊຽນ” ດີ​ເດັ່ນ​ດ້ານ​ແຮ່​ທາດ ເຊິ່ງ ບໍ​ລິ​ສັດ ຊື​ເຟິງ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ (LXML) ໄດ້​ຮັບ​ລາງວັນ​ອັນ​ດັບ​ໜຶ່ງ ໃນ​ການ​ຂຸດ​ຄົ້ນ​ແຮ່​​ທາດ ແລະ ໂລ​ຫະ ທີ່​ດີ​ເລີດ.  ລາງວັນ “ອາ​ຊຽນ” ດີ​ເດັ່ນ​ດ້ານ​ແຮ່​ທາດ ແນ​ໃສ່ ຍົກ​ບົດ​ບາດ ແລະ ​ການ​ຍ້ອງ​ຍໍ​ສັນ​ລະ​ເສີນ​ໃຫ້​ແກ່​ບໍ​ລິ​ສັດ​ຂຸດ​ຄົ້ນ-ປຸງ​ແຕ່ງແຮ່​ທາດ ແລະ ໂລ​ຫະ ໃນ​ບັນ​ດາ​ປະ​ເທດ​ສະ​ມາ​ຊິກ “ອາ​ຊຽນ” ທີ່​ດຳ​ເນີນ​ທຸ​ລະ​ກິດ ​ພັດ​ທະ​ນາ​ແຮ່​ທາດ​ແບບ​ຍືນ​ຢົງ ແລະ ແບບມີ​ຄວາມ​ຮັບ​ຜິດ​ຊອ​ບ​ຢ່າງ​ດີ​ເລີດ ດ້ານ​ສິ່ງ​ແວດ​ລ້ອມ ແລະ ສັງ​ຄົມ​. ລາງວັນ​ດັ່ງ​ກ່າວ ຍັງ​ແມ່ນ ຍຸດ​ທະ​ສາດ​ສຳ​ຄັນ​ໜຶ່ງ ພາຍ​ໃຕ້ ແຜ​ນ​ການ​ຮ່ວມ​ມື​ດ້ານ​ແຮ່​ທາດ​ອາ​ຊຽນ (AMCAP) ເພື່ອ ສົ່ງ​ເສີມ​ການ​ພັດ​ທະ​ນາ​ແຮ່​ທາດ​ແບບ​ຍືນ​ຍົງ ແລະ ແບບ​ມີ​ຄວາມ​ຮັບ​ຜິດ​ຊອ​ບ​ດ້ານ​ສິ່ງ​ແວດ​ລ້ອມ ແລະ ສັງ​ຄົມ. 



ພິ​ທີ​ປະ​ກາດ​ລາງວັນ​ຄັ້ງ​ນີ້ ແມ່ນໄດ້​ຈັດ​ຂຶ້ນ ໃນ ງານ​ລ້ຽງ​ກອງ​ປະ​ຊຸມ​ລັດ​ຖະ​ມົນ​ຕີ​ອາ​ຊຽນ​ກ່ຽວ​ກັບ ແຮ່​ທາດ ຄັ້ງ​ທີ 7 (7th ASEAN Ministerial Meeting on Minerals - 7th AMMin) ທີ່ ບາງກອກ, ປະ​ເທດ​ໄທ.  ໃຫ້​ກຽດ​ມອບລາງວັນ ໂດຍ​ ພະ​ນະ​ທ່ານ ສຸ​ຣິ​ຍະ ຈຶ່ງ​ຣຸ່ງ​ເຣືອງ​ກິດ, ລັດ​ຖະ​ມົນ​ຕີ​ອຸດ​ສາ​ຫະ​ກຳ​ຂອງ​ໄທ ແລະ ເປັນສັກ​ຂີ​ພິ​ຍານ​ໂດຍ ​ບໍ​ລິ​ສັດ​ເຂົ້າ​ຮອບ​ຄັດ​ເລືອກ ແລະ ​ລັດ​ຖະ​ມົນ​ຕີ ຈາກ ​ປະ​ເທດສະ​ມາ​ຊິກ​ອາ​ຊຽນ.

ບໍ​ລິ​ສັດ LXML ແມ່ນ​ໜຶ່ງ​ໃນ 16 ບໍ​ລິ​ສັດ​ ທີ່​ໄດ້​ເຂົ້າ​ຮອບ​ຄັດ​ເລືອກ​ແຂ່ງ​ຂັນ​ຊິງ​ລາງວັນ​ດ້ານ ການ​ຂຸດ​ຄົ້ນ, ປຸງ​ແຕ່ງ ແລະ ຈຳ​ໜ່າຍຜະ​ລິດ​ຕະ​ພັນ​ທີ່​ເປັນ ໂລ​ຫະ ແລະ ບໍ່​ແມ່ນ​ໂລ​ຫະ ໃນ​ຂົງ​ເຂດ​ອາ​ຊຽນ.  ຜູ້​ທີ່​ໄດ້​ເຂົ້າ​ຮອບ​ຄັດ​ເລືອກ​ລວມ​ມີ 1 ຈາກ ປະ​ເທດ ບ​ຣູ​ນາຍ, 5 ຈາກ ອິນ​ໂດ​ເນ​ເຊຍ, 2 ຈາກ ສ​ປ​ປ ລາວ, 2 ຈາກ ມະ​ເລ​ເຊຍ, 5 ຈາກ ຟີ​ລິບ​ປີນ ແລະ 1 ຈາກ ໄທ. ທ່າມ​ກາງ​ຄູ່​ແຂ່ງ​ທີ່​ເຂັ້ມ​ແຂງ, ບໍ​ລິ​ສັດ LXML ກໍ​ຍາດ​ມາ​ໄດ້ ລາງວັນ ດີ​ເດັ່ນດ້ານ​ການ​ຂຸດ​ຄົ້ນບໍ່​ແຮ່​ໂລ​ຫະ ອາ​ຊຽນ.

ບໍ​ລິ​ສັດ​ທີ່​ເຂົ້າ​ຮອບ​ຄັດ​ເລືອກ ແມ່ນ​ຖືກ​ປະ​ເມີນ​ໂດຍ ຄະ​ນະ​ກຳ​ມະ​ການ ເຊິ່ງ ມີ​ຜູ້​ຕາງ​ໜ້າ​ຈາກ​ແຕ່​ລະ​ປະ​ເທດ​ສະ​ມາ​ຊິກ​ອາ​ຊຽນ. ຄະ​ນະ​ກຳ​ມະ​ການ ໄດ້​ປະ​ເມີນ​ແຕ່​ລະ​ບໍ​ລິ​ສັດ ອີງ​ຕາມ 4 ບັນ​ທັດ​ຖານຫຼັກ​ຄື: ຜົນ​ກະ​ທົບ, ຄວາມ​ຍື​ນ​ຍົງ, ເອ​ກະ​ລັກ ແລະ ການ​ເປັນ​ຕົ້ນ​ແບບ ກໍ​ຄື ການ​ນຳ​ສະ​ເໜີ​ຂອງ​ບໍ​ລິ​ສັດ ແລະ ຄວາມ​ປະ​ທັບ​ໃຈ​ໂດຍ​ລວມ​ຂອງ​ຄະ​ນະ​ກຳ​ມະ​ການ.

ທ່ານ ສີ​ນາ​ວາ ສຸ​ພາ​ນຸ​ວົງ, ຮອງ​ລັດ​ຖະ​ມົນ​ຕີກະ​ຊວງ​ພະ​ລັງ​ງານ ແລະ ບໍ່​ແຮ່ ໄດ້​ກ່າວ​ວ່າ:“ລາງວັນ​ນີ້ ເປັນ​ນິ​ມິດ​ໝາຍ ແລະ ຍົກ​ບົດ​ບາດ ກໍ​ຄື ສົ່ງ​ເສີມ ບໍ​ລິ​ສັດ​ບໍ່​ແຮ່​ໃນ ອາ​ຊຽນ ທີ່​ໄດ້​ປະ​ກອບ​ສ່ວນ​ດີ​ເດັ່ນ ໃນ​ການ​ພັດ​ທະ​ນາ​ແຮ່​ທາດ​ຢ່າງ​ຍືນ​ຍົງ​ໃນ​ພາກ​ພື້ນ. ລາງວັນ​ນີ້ ເນັ້ນໜັກ ວິ​ໄສ​ທັດ​ຂອງ ສ​ປ​ປ ລາວ ໃນ​ການ​ສົ່ງ​ເສີມ ການ​ລົງ​ທຶນ​ທີ່​ມີ​ຄຸນ​ນະ​ພາບ ໃນ​ຂະ​ແໜງ​​ຊັບ​ພະ​ຍາ​ກອນ.”

ປີ 2019 ເປັນການ​ຈັດ ລາງວັນ “ອາ​ຊຽນ” ດີ​ເດັ່ນ​ດ້ານ​ແຮ່​ທາດ ຄັ້ງ​ທີ​ 2 ແລະ ທັງ​ເປັນ​ຄັ້ງ​ທີ 2 ທີ່ ບໍ​ລິ​ສັດ LXML ​ໄດ້​ຮັບ​ລາງວັນ ແລະ ການ​ຍ້ອງ​ຍໍ​ສັນ​ລະ​ເສີນ ສຳ​ລັບ​ຜົນ​ງານ​ ແລະ ການ​ປະ​ກອບ​ສ່ວນ​ທີ່​ດີ​ເດັ່ນ ດ້ານການ​ພັ​ທະ​ນາ​ຊຸມ​ຊົນ, ການ​ປະ​ກອບ​ສ່ວນ​ຕໍ່ ການ​ສະ​ໜອງ​ແຮ່​ທາດ​ໃນ​ຕະຫຼາດ​ອາ​ຊຽນ, ການ​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ, ຜະ​ລິດ​ຕະ​ຜົນ ແລະ ປະ​ສິດ​ທິ​ພາບ​ດ້ານ​ຊັບ​ພະ​ຍາ​ກອນ, ຜົນ​ງານ​ດ້ານ​ສຸກ​ຂະ​ພາບ ແລະ ຄວາມ​ປອດ​ໄພ​ ກໍ​ຄື ຜົນ​ງານ​ດ້ານ​ສິ່ງ​ແວດ​ລ້ອມ. ໃນ​ການ​ແຂ່ງ​ຂັນລາງວັນ “ອາ​ຊຽນ” ດີ​ເດັ່ນ​ດ້ານ​ແຮ່​ທາດ ຄັ້ງ​ທີ 1 ໃນ​ປີ 2017, ບໍ​ລິ​ສັດ LXML ໄດ້​ຮັບ​ລາງວັນ​ຮອງ​ອັນ​ດັບ​ໜຶ່ງ ໃນ​ການ​ປຸງ​ແຕ່ງ​ແຮ່​ທາດ​ທີ່​ດີ​ເລີດ ໃນ​ອາ​ຊຽນ.

ທ່ານ ພໍ ແຮ​ຣິ​ສ, ຜູ້​ຈັດ​ການ​ໃຫ​ຍ່ LXML ໄດ້​ກ່າວ​ວ່າ:“ລາງວັນ​ອັນ​ຊົງ​ກຽດ​ນີ້ ເປັນ ໝາກ​ຜົນ​ຂອງ ຄວາມ​ມຸ່ງ​ໝັ້ນ ແລະ ຄວາມ​ຕັ້ງ​ໜ້າ​ເອົາ​ໃຈ​ໃສ່​ເຮັດວຽກ​ຂອງ​ທຸກໆ​ຄົນ ທີ່ LXML ຕະຫຼອດ​ທົດ​ສະ​ວັດ​ຜ່ານ​ມາ ເຊິ່ງ​ໄດ້​ປູ​ພື້ນ​ຖານ ໃຫ້​ແກ່​ຜົນ​ຮັ​ບ ແລະ ຜົນ​ງານ ເຊິ່ງ​ເປັນ ຜົນ​ສຳ​ເລັດ​ຂອງ​ພວກ​ເຮົາ​ໃນ​ມື້​ນີ້. ລາງວັນ​ນີ້ ເປັນ​ຕົວ​ຢ່າງ​ທີ່​ດີ ທີ່​ສະ​ແດງ​ໃຫ້​ເຫັນ​ວ່າ ‘ພວກ​ເຮົາ​ເປັນ​ຕົ້ນ​ແບບ​​ດ້ານ​ການ​ຂຸດ​ຄົ້ນ​ບໍ່​ແຮ່ ແລະ ສ້າງ​ຄວາມ​ຮັ່ງ​ມີ​ໃຫ້​ແກ່​ສັງ​ຄົມ’ ແນວ​ໃດ. ລາງວັນ​ຄັ້ງ​ນີ້ ຮັບ​ຮູ້ ແລະ ຍ້ອງ​ຍໍ ຜົນ​ສຳ​ເລັດ​ຂອງ​ພວກ​ເຮົາ​ທີ່​ມຸ່ງ​ໝັ້ນ​ພັດ​ທະ​ນາ​ພະ​ນັກ​ງານ ແລະ ຊຸມ​ຊົນ​ຂອງ​ພວກ​ເຮົາ, ຄວາມ​ມຸ່ງ​ໝັ້ນ​ໃນ​ການ​ພັດ​ທະ​ນາ ແລະ ຮັກ​ສາ​ມາດ​ຕະ​ຖານ​ສາ​ກົນ​ດ້ານ​ການ​ຄຸ້ມ​ຄອງ​ສິ່ງ​ແວດ​ລ້ອມ, ແລະ ຄວາມ​ມຸ່ງ​ໝັ້ນ​ໃນ​ການ​ສືບ​ຕໍ່​ພັດ​ທະ​ນາ ຜົນ​ງານ​ດ້ານ​ການ​ດຳ​ເນີນ​ງານ​. ລາງວັນ​ດັ່ງ​ກາວ​ນີ້ ສະ​ທ້ອນ​ເຖິງ ການ​ສະ​ໜັບ​ສະ​ໜູນ​ຢ່າງ​ໜັກ​ແໜ້ນ ຂອງ ຜູ້​ມີ​ສ່ວນ​ຮ່ວມ​ຂອງ​ພວກ​ເຮົາ ແລະ ລັດ​ຖະ​ບານ​ແຫ່ງ ສ​ປ​ປ ລາວ.”

ນັບ​ຕັ້ງ​ແຕ່​ເລີ່ມ​ດຳ​ເນີນ​ງານ​ໃນ​ປີ 2002, ບໍ​ລິ​ສັດ​ໄດ້​ປະ​ກອບ​ສ່ວນ​ໂດຍ​ກົງຫຼາຍກວ່າ US$1,4 ຕື້ ໃຫ້​ແກ່ ລັດ​ຖະ​ບານ ແຫ່ງ ສ​ປ​ປ ລາວ ໂດຍ​ຜ່ານ​ການ​ຈ່າຍ​ພາ​ສີ-ອາ​ກອນ, ພາ​ສີ​ຊັບ​ພະ​ຍາ​ກອນ​ແຮ່​ທາດ ແລະ ເງິນ​ປັນ​ຜົນ. ນອກ​ຈາກ​ນີ້ ບໍ​ລິ​ສັດ ຍັງ​ໄດ້​ລົງ​ທຶນ ປະ​ມານ US$50 ລ້ານ ໃນ​ການ​ພັດ​ທະ​ນາ​ໂຄງ​ລ່າງ​ພື້ນ​ຖານ​ແຫ່ງ​ຊາດ ແລະ ທ້ອງ​ຖິ່ນ, US$48 ລ້ານ ໃນ​ການ​ເກັບ​ກູ້​ລະ​ເບີດ​ບໍ່​ທັນ​ແຕກ ແລະ ຫຼາຍ​ລ້ານ ໂດ​ລາ​ສະ​ຫະ​ລັດ ໃນ​ວຽກ​ງານ​ປົກ​ປັກ​ຮັກ​ສາ​ມໍ​ລະ​ດົກ​ວັດ​ທະ​ນະ​ທຳ ແລະ ແຜນ​ງານ​ສະ​ໜັບ​ສະ​ໜູນ​ດ້ານ​ສັງ​ຄົມ​ອື່ນໆ.

ໃນ​ຊຸມ​ຊົນ​ເມືອງວິ​ລະ​ບູ​ລີ ໄດ້​ມີ​ປະ​ຊາ​ຊົນຫຼາຍ​ກວ່າ 14.000 ຄົນ​ທີ່ໄດ້​ຮັບ​ຜົນ​ປະ​ໂຫຍດ​ຈາກ ແຜນ​ງານ ​ພັດ​ທະ​ນາ​ຊຸມ​ຊົນ ລວມ US$13 ລ້ານ ຜ່ານ​ໂຄງ​ການ ແລະ ການ​ລົງ​ທຶນ​ໂດຍ​ກົງ ໃນ​ຂະ​ນະ​ທີ່ ລາຍ​ໄດ້​ຊຸມ​ຊົນ ຜ່ານ​ ກຸ່ມ​ທຸ​ລະ​ກິດ​ທ້ອງ​ຖິ່ນ ແມ່ນ​ໄດ້ ທະ​ວີ​ຄູນ​ຂຶ້ນ​ເປັນ US$32 ລ້ານ.

ບໍ​ລິ​ສັດ LXML ໄດ້​ລົງ​ທຶນຫຼາຍ​ລ້ານ​ໂດ​ລາ​ສະ​ຫະ​ລັດ​ເຂົ້າ​ໃນ​ການ​ພັດ​ທະ​ນາ ແລະ ຝຶກ​ອົບ​ຮົມ​ບຸກ​ຄະ​ລາ​ກອນ. ການ​ລົງ​ທຶນ​ດັ່ງ​ກ່າວ ໄດ້​ພັດ​ທະ​ນາ​ທັກ​ສະ ແລະ ສ້າງວຽກ​ເຮັດ​ງານ​ທຳ​ໃຫ້​ແກ່ ຄົນ​ລາວຫຼ​າຍກວ່າ 10.000.  ໃນ​ໄລ​ຍະ​ທີ່​ດຳ​ເນີນ​ການ​ຜະ​ລິດ​ໄດ້​ສູງ​ທີ່​ສຸດ, ບໍລິ​ສັດ​ໄດ້​ວ່າ​ຈ້າງ ພະ​ນັກ​ງານກວ່າ 5.000 ຄົນ ແລະ ປັດ​ຈຸ​ບັນ​ກໍ​ຍັງ​ມີ​ພະ​ນັກ​ງານ ກວ່າ 2.500 ຄົນ.

LXML ຖື​ຄວາມ​ປອດ​ໄພ ເປັນ​ຈຸດ​ໃຈ​ກາງ​ໃນ​ການ​ດຳ​ເນີນ​ງານ​ຂອງ​ບໍ​ລິ​ສັດ.  ບໍ່​ມີ​ອັນ​ໃດ​ທີ່​ສຳ​ຄັນ​ໄປ​ກວ່າ ການ​ຮັບ​ປະ​ກັນ​ໃຫ້​ພະ​ນັກ​ງານ​ຂອງ​​ບໍ​ລິ​ສັດ​ໄດ້​ກັບ​ຄືນ​ເມືອ​ບ້ານ​ດ້ວຍ​ຄວາມ​ປອດ​ໄພ​ໃນ​ແຕ່​ລະ​ວັນ. ໃນ​ປີ 2019,  LXML ​ສາ​ມາດ​ຫລຸດ​ຜ່ອນ​ອັດ​ຕາ​ການ​ບາດ​ເຈັບ​ໄດ້​ເປັນ​ຢ່າງ​ດີ. ມາ​ຮອດ​ປັດ​ຈຸ​ບັນ, ອັດ​ຕາ​ຄວາມ​ຖີ່​ເກີດ​ການ​ບາດ​ເຈັບ ຫຼື TRIFR (Total recordable injury frequency rate) ຂອງບໍ​ລິ​ສັດ​ເທົ່າ 0,4 ເຊິ່ງ ຫລຸດ​ຄາດ​ໝາຍ​ທີ່​ຕັ້ງ​ໄວ້​ທີ່ 0,6 ແລະ ທັງ​ເປັນ​ການ​ປັບ​ປຸງ​ຈາກ​ປີ​ກາຍ​ໄດ້ 39%. ສົ​ມ​ທຽບ​ໃສ່​ບໍ​ລິ​ສັດ​ອື່ນໆ​ໃນ​ອຸດ​ສາ​ຫະ​ກຳ​ດຽວ​ກັນ​ກັບ​ LXML, ຜົນ​ງານ​ດ້ານ​ຄວາມ​ປອດ​ໄພ​ນີ້ ຖື​ວ່າ​ດີ​ເລີດ ແລະ ເປັນ​ໜຶ່ງ​ໃນ​ບໍ​ລິ​ສັດ​ທີ່​ດີ​ທີ່​ສຸດ​ໃນ​ໂລກ.

ແຜນ​ການ​ຂອງ LXML ໃນ​ການ​ຫັນ​ປ່ຽນ​ຈາ​ກ ການ​ຂຸດ​ຄົ້ນ-ຜະ​ລິດ​ທອງ ສູ່ ​ການ​ຂຸດ​ຄົ້ນ-ຜະ​ລິດ​ຄຳ​ນັ້ນ ຈະ​ນຳ​ອະ​​ນາ​ຄົດ​ອັນ​ສົດ​ໃສ​ມາ​ໃຫ້​ແກ່​ຜູ້​ມີ​ສ່ວນ​ຮ່ວມ​ທຸ​ກ​ພາກ​ສ່ວນ. ການຜະລິດຄຳຈະສືບຕໍ່ສ້າງວຽກເຮັດງານທຳສຳລັບພະນັກງານ ແລະ ສ້າງລາຍໄດ້ ກໍຄື ປັບປຸງຊີວິດການເປັນຢູ່ຂອງຊຸມຊົນເຈົ້າພາບຂອງບໍ​ລິ​ສັດ.  LXML ຈະ​ສືບ​ຕໍ່​ປະ​ກອບ​ສ່ວນ​ໃສ່ ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ ສ​ປ​ປ ລາວ ໄປ​ໄດ້​ອີກ​ຢ່າງ​ຕ່ຳ 7 ປີ ໂດຍ​ຄາດ​ວ່າ​ຈະ​ຜະ​ລິດ​ຄຳ​ແທ່ງ​ໄດ້​ປະ​ມານ 200,000 ອອນ ຕໍ່​ປີ ພ້ອມ​ທັງ​ລົງ​ທຶນ​ເພີ່ມ​ຂຶ້ນ​ໃສ່ ການ​ສຳຫຼວດ​ເພື່ອ​ຍືດ​ອາ​ຍຸ​ການ​ຂຸດ​ຄົ້ນ​ບໍ່​ແຮ່​ໃຫ້​ຍືນ​ຍາວ​ໄປ​ອີກ​ຢ່າງ​ຕ່ຳ 10 ປີ.  

Post a Comment

0 Comments