ໄຊຍະບູລີ ສ້າງຕັ້ງ ສະມາຄົມປູກພືດກະສິກໍາ



 ພິທີເປີດສະມາຄົມປູກພືດກະສິກໍາແຂວງໄຊຍະບູລີ ໄດ້ຈັດຂຶ້ນໃນວັນທີ 12 ທັນວາ 2019 ນີ້ທີ່ #ເມືອງໄຊຍະບູລີ #ແຂວງໄຊຍະບູລີ. ໃຫ້ກຽດເຂົ້າຮ່ວມມີ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ທ່ານ ບຸນແທນ ທິແກ້ວ ເຈົ້າເມືອງໄຊຍະບູລີ, ມີຫົວໜ້າພະແນກການ, ນັກທຸລະກິດຊາວຈີນເຂົ້າຮ່ວມ.
 ຈຸດປະສົງສ້າງຕັ້ງສະມາຄົມປູກພືດກະສິກໍາແຂວງໄຊຍະບູລີ ກໍ່ເພື່ອເຕົ້າໂຮມບຸກຄົນ, ນິຕິບຸກຄົນ ແລະ ກຸ່ມປູກພືດກະສິກໍາຢູ່ໃນແຂວງໄຊຍະບູລີເຂົ້າເປັນສະມາຄົມໜຶ່ງດຽວ ສ້າງໃຫ້ນັກລົງທຶນທັງຄົນລາວ ແລະ ຕ່າງປະເທດ ໂດຍສະເພາະນັກລົງທຶນຊາວຈີນຫັນມາລົງທຶນຢູ່ແຂວງໄຊຍະບູລີໃຫ້ເພີ່ມຂຶ້ນ, ສ້າງຕະຫຼາດຮັບຮອງທີ່ໝັ້ນທ່ຽງ ແລະ ຍືນຍົງ, ມີຄວາມສະເໝີພາບທາງດ້ານລາຄາ, ສ້າງວຽກເຮັດງານທໍາໃຫ້ພໍ່ແມ່ປະຊາຊົນບັນດາເຜົ່າ ສ້າງຄວາມສະດວກໃນການຕິດຕາມກວດກາຈາກອົງການຈັດຕັ້ງຂອງແຂວງ ເພື່ອເຮັດໃຫ້ພື້ນຖານທາງດ້ານກະສິກໍາເຂັ້ມແຂງ ຂະຫຍາຍຕົວຕາມແນວທາງນະໂຍບາຍຂອງພັກ-ລັດຖະບານວາງອອກ ຮູບແບບການສ້າງຕັ້ງສະມາຄົມໂດຍເອກະຊົນຊາວຈີນ 100% ຂອບເຂດການບໍລິຫານຄຸ້ມຄອງແມ່ນອໍານວຍຄວາມສະດວກໃຫ້ແກ່ບັນດານັກທຸລະກິດທີ່ປູກພືດກະສິກຳໃນ 11 ເມືອງທົ່ວແຂວງໄຊຍະບູລີ ທັງຮັບຜິດຊອບການສຶກສາສໍາຫຼວດເຊັ່ນ: ສັນຍາເຊົ່າທີ່ດິນ ຫຼືສໍາປະທານທີ່ດິນລັດເພື່ອເປົ້າໝາຍການປູກກ້ວຍ, ໝາກໂມຢູ່ແຂວງໄຊຍະບູລີ; ພ້ອມທັງເປັນຕົວແທນໃຫ້ແກ່ບັນດາບໍລິສັດທີ່ລົງທຶນໃໝ່ ແລະ ເກົ່າຜ່ານມາດ້ວຍຮູບແບບການລວມຕົວຂອງບໍລິສັດຕ່າງໆໃນເປົ້າໝາຍການປຶກສາຫາລືກ່ຽວກັບດ້ານທີ່ດິນກະສິກໍາຮ່ວມກັບລັດ ເຊິ່ງບັນດາບໍລິສັດທີ່ຕ້ອງການລົງທຶນຈະຕ້ອງໄດ້ຜ່ານສະມາຄົມປູກພືດກະສິກໍາໄຊຍະບູລີລາວ ຕາງໜ້າໂດຍບໍລິສັດຂາອອກ-ຂາເຂົ້າກະສິກໍາ ແລະ ລ້ຽງສັດຈໍາກັດ ເພື່ອເປັນຕົວແທນໃຫ້ນິຕິບຸກຄົນທີ່ຈະປູກກ້ວຍ ແລະ ໝາກໂມ. ຄຽງຄູ່ກັນນີ້ທາງສະມາຄົມຍັງເປັນຕົວແທນປະສານສົມທົບໃນການຈັດເກັບລາຍຮັບພັນທະຕ່າງໆ ທີ່ກ່ຽວພັນກັບການເຊົ່າທີ່ດິນປະຊາຊົນ, ການເກັບເງິນພັນທະທ້ອງຖິ່ນ, ເງິນຄໍ້າປະກັນຕ່າງໆ ແລະ ການຄຸ້ມຄອງນໍາເຂົ້າປຸຍເຄມີ, ໂຟມ, ແກັດເຈ້ຍຫຸ້ມຫໍ່, ຖົງຢາງ, ຢາຂ້າສັດຕູພືດ ແລະ ປຸຍຊີວະພາບຕ່າງໆ ເພື່ອເປັນການຫຼີກລ້ຽງການນໍາເຂົ້າແບບຊະຊາຍ ຕ້ອງໄດ້ຮັບການຢັ້ັງຢືນຈາກຂະແໜງການທີ່ກ່ຽວຂ້ອງຂອງແຂວງ, ເມືອງຕາມບັນຊີການຄຸ້ມຄອງນໍາເຂົ້າກະສິກໍາ. ຈາກນັ້ັັັັນ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ແລະ ທ່ານ ເວີຍ ຕາ ກັງ ສະມາຄົມການປູກພືດກະສິກໍາ ໂດຍຕາງໜ້າບໍລິສັດຂາອອກ-ຂາເຂົ້າກະສິກໍາ ແລະ ລ້ຽງສັດຈໍາກັດ ພ້ອມດ້ວຍແຂກເຂົ້າຮ່ວມພ້ອມກັນຕັດແຖບຜ້າເປີດປ້າຍສະມາຄົມປູກພືດກະສິກໍາແຂວງໄຊຍະບູລີຢ່າງເປັນທາງການ.

  
ຂ່າວ: ບຸນທີ.
Media Laos

Post a Comment

0 Comments