ປະກາດແຕ່ງຕັ້ງຄະນະສາຂາທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ



ອຸດົມໄຊ: ຕອນບ່າຍວັນທີ 23 ທັນວານີ້ທີ່ທະນາຄານແຫ່ງ ສປປ ລາວ ພາກເໜືອທີ່ແຂວງ ອຸດົມໄຊ ໄດ້ຈັດພິທີປະກາດແຕ່ງຕັ້ງຫົວໜ້າ ຮອງຫົວໜ້າສາຂາທະນາຄານແຫ່ງ ສປປ ລາວພາກເໜືອທີ່ແຂວງອຸດົມໄຊ ໂດຍໄດ້ຕົກລົງແຕ່ງຕັ້ງທ່ານ ໂພຕະມີ ພຸດທະວົງ ຮອງຫົວໜ້າກົມບໍລິການ ທະນາຄານແຫ່ງ ສປປ ລາວ ເປັນວ່າການຫົວໜ້າສາຂາທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ, ຕົກລົງແຕ່ງຕັ້ງທ່ານ ແອ ສ້ອຍສຸວັນ ຫົວໜ້າພະແນກກວດກາພາຍໃນ ສາຂາທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ ເປັນຮອງຫົວໜ້າສາຂາທະນາຄານແຫ່ງ ສປປ ລາວພາກເໜືອທີ່ແຂວງອຸດົມໄຊ.




 ໃນພິທີຍັງໄດ້ຜ່ານຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ໂດຍໄດ້ຍົກຍ້າຍທ່ານ ບຸນໄທ ສຸພັັດທອນ ຫົວໜ້າທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ ໄປຮັບໜ້າທີ່ໃໝ່ຢູ່ຫ້ອງການທະນາຄານແຫ່ງ ສປປ ລາວ ແລະ ຜ່ານຂໍ້ຕົກລົງຂອງຜູ້ວ່າການທະນາຄານແຫ່ງ ສປປ ລາວ ວ່າດ້ວຍການອານຸມັດໃຫ້ພະນັກງານອອກພັກການ-ຮັບອຸດໜູນບຳນານ ໂດຍໄດ້ອານຸມັດໃຫ້ທ່ານນາງ ຄຳຫຼ້າ ສຸລິຍານົນ ຮອງຫົວໜ້າທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ ອອກພັກການ-ຮັບອຸດໜູນບຳນານຕາມລະບຽບການ. ໂອກາດດຽວກັນກໍ່ໄດ້ມີການເຊັນບົດບັນທຶກມອບ-ຮັບວຽກງານຢ່າງເປັນທາງການ ລະ ຫ່ວາງຫົວໜ້າທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊຜູ້ເກົ່າ ກັບ ຜູ້ໃໝ່. 


ເຂົ້າຮ່ວມໃນພິທີຄັ້ງນີ້ມີທ່ານ ຄຳວົງ ທິບພະວົງ ຮອງເລຂາຄະນະພັກ ຮອງຜູ້ວ່າການທະນາຄານແຫ່ງ ສປປ ລາວ, ມີຫົວໜ້າກົມ ຮອງກົມທີ່ມາຈາກທະນາຄານແຫ່ງ ສປປ ລາວ, ມີອົງການຈັດຕັ້ງທີ່ກ່ຽວຂ້ອງຂອງແຂວງ ອຸດົມໄຊ, ຄະນະສາຂາທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊ, ຫົວໜ້າສາຂາທະນາຄານທຸລະກິດຈາກ 4 ແຂວງພາກເໜືອ  ແລະ ມີບັນດາຫົວໜ້າພະແນກການ ພ້ອມດ້ວຍພະນັກງານພາຍໃນທະນາຄານແຫ່ງ ສປປ ລາວພາກເໜືອທີ່ແຂວງ ອຸດົມໄຊເຂົ້າຮ່ວມ.

ລາຍງານໂດຍ: ສີຈັນ ເກດວົງສາ

Post a Comment

0 Comments