ລັດຖະມົນຕີ ກວຕ ຕ້ອນຮັບການເຂົ້າຢ້ຽມຂໍ່ານັບຂອງເອກອັກຄະຣາຊະທູດຄົນໃໝ່ແຫ່ງ ຣາຊະອານາຈັກໄທ ປະຈຳ ສປປ ລາວ


ໃນວັນທີ 25 ທັນວາ 2019 ທີ່ຫ້ອງຮັບແຂກກະຊວງ ວິທະຍາສາດ ແລະ ເຕັກໂນໂລຊີ (ກວຕ), ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກວຕ ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານ ດຳຣົງ ໃຄ່ຄວນ, ເອກອັກຄະຣາຊະທູດຄົນໃໝ່ ແຫ່ງ ຣາຊະອານາຈັກໄທ ປະຈຳ ສປປ ລາວ.
ໂອກາດນີ້, ທ່ານລັດຖະມົນຕີໄດ້ສະແດງຄວາມຍິນດີ ແລະ ຊົມເຊີຍຕໍ່ທ່ານ ດຳຣົງ ໃຄ່ຄວນທີ່ໄດ້ຮັບການແຕ່ງຕັ້ງ ໃຫ້ດຳລົງຕຳແໜ່ງເປັນ ເອກອັກຄະຣາຊະທູດຄົນໃໝ່ ແຫ່ງ ຣາຊະອານາຈັກໄທປະຈຳ ສປປ ລາວ.



 ທ່ານ ໄດ້ສະເໜີໂດຍຫຍໍ້ກ່ຽວກັບສະພາບການພັດທະນາວິທະຍາສາດ ແລະ ເຕັກໂນໂລຊີຂອງ ສປປ ລາວ ຕໍ່ທ່ານທູດໄດ້ຮັບຊາບ ແລະ ຍັງໄດ້ກ່າວເຖີງການພົວພັນຮ່ວມມືຂອງວຽກງານວິທະຍາສາດ ແລະ ເຕັກໂນໂລຊີ ລະຫວ່າງ ສອງປະເທດ ລາວ-ໄທ ໄລຍະຜ່ານມາ ໂດຍໄດ້ມີການພົບປະ ແລະ ຮ່ວມມືກັນໃນຫຼາຍດ້ານ ເຊັ່ນ: ການຈັດກອງປະຊຸມພົບປະລະຫວ່າງສອງກະຊວງ ວິທະຍາສາດ ແລະ ເຕັກໂນໂລຊີ, ໄດ້ສົ່ງຄະນະວິຊາການພົບປະແລກປ່ຽນບົດຮຽນຮ່ວມກັນເປັນປົກກະຕິ ແລະ ອື່ນໆ.



ທ່ານ ກ່າວຕື່ມວ່າ ການຮັບໜ້າທີ່ໃໝ່ຂອງທ່ານທູດຈະປະກອບສ່ວນເສີມຂະຫຍາຍ ການພົວພັນ ແລະ ຮ່ວມມືລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນຍິ່ງຂຶ້ນ, ໂດຍສະເພາະແມ່ນໃນຂົງເຂດວຽກງານວິທະຍາສາດ ແລະ ເຕັກໂນໂລຊີ. ທ່ານ ໄດ້ອວຍພອນ ທ່ານ ທູດ ປະສົບຜົນສຳເລັດຕໍ່ໜ້າທີ່ອັນສູງສົ່ງຂອງທ່ານຕະຫຼອດໄລຍະເວລາທີ່ປະຕິບັດໜ້າທີ່ຢູ່ ສປປ ລາວ.
ໂອກາດດຽວກັນ, ທ່ານເອກອັກຄະຣາຊະທູດໄດ້ກ່າວຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີຢ່າງຍິ່ງໃນການປະສານງານເພື່່ອສົ່ງເສີມການການພົວພັນ ແລະ ຮ່ວມມືໃນຂົງເຂດວຽກງານ ວິທະຍາສາດ ແລະ ເຕັກໂນໂລຊີ ລະຫວ່າງສອງປະເທດໃຫ້ນັບມື້ນັບຫຼາຍຂຶ້ນ.

Post a Comment

0 Comments