ພັນລະຍາການນຳ ລົງມອບເຄື່ອງຊ່ວຍເຫລືອໃຫ້ພໍ່ແມ່ປະຊາຊົນ ບ້ານຜາລະແວກ, ເມືອງຮົ່ມ, ແຂວງໄຊສົມບູນ



ໃນວັນທີ 17 ທັນວາ 2019 ນີ້, ພັນລະຍາການນຳຂັ້ນສູງ, ບັນດານັກທຸລະກິດ, ມູນນິທິຊ່ວຍເຫລືອຄົນທຸກຍາກ ແຫ່ງ ສປປ ລາວ ແລະ ຄະນະສົງ ໄດ້ຮ່ວມກັນ ນຳເອົາເຄື່ອງຊ່ວຍເຫລືອໄປມອບໃຫ້ພໍ່ແມ່ປະຊາຊົນຄອບຄົວທຸກຍາກ ຢູ່ບ້ານຜາລະແວກ, ເມືອງຮົ່ມ, ແຂວງໄຊສົມບູນ, ໂດຍການນຳພາ ຂອງທ່ານ ນາງ ນາລີ ສີສຸລິດ, ພັນລະຍາຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ.



 ເຊິ່ງໄດ້ຈັດພິທີ ມອບ-ຮັບ ເຄື່ອງ ດັ່ງກ່າວ ຂື້ນທີ່ສະໂມສອນຂອງເມືອງ, ໂດຍການເຂົ້າຮ່ວມຂອງທ່ານ ພົຕ ຄຳລຽງ ອຸທະໄກສອນ, ເຈົ້າແຂວງໄຊສົມບູນ ພ້ອມດ້ວຍພັນລະຍາ, ທ່ານ ບົວພັນ ວັນດາວົງ, ເຈົ້າເມືອງ-ເມືອງຮົ່ມ, ມີຫົວໜ້າພະແນກການທີ່ກ່ຽວຂ້ອງຂອງແຂວງ ແລະ ເມືອງ, ອຳນາດການປົກຄອງບ້ານ 2 ບ້ານເທດສະບານ ແລະ ພໍ່ແມ່ປະຊາຊົນຄອບຄົວທຸກຍາກບ້ານຜາລະແວກ ເຂົ້າຮ່ວມ.



ເຄື່ອງທີ່ນຳມາຊ່ວຍເຫລືອ ໃນຄັ້ງນີ້, ປະກອບມີ: ເຄື່ອງອຸປະໂພກ-ບໍລິໂພກ, ຜ້າຫົ່ມ, ເສື້ອກັນໜາວ ແລະ ສັດລ້ຽງ ປະເພດງົວ ຈຳນວນ 15 ໂຕ, ລວມມູນຄ່າ 134,850,000 ກີບ (ໜຶ່ງຮ້ອຍ ສາມສິບສີ່ລ້ານ ແປດແສນ ຫ້າສິບພັນກີບ) ແລະ ແຂວງໄຊສົມບູນ ຮ່ວມຊ່ວຍເຫລືອ ບໍລິຈາກເຄື່ອງອຸປະໂພກ-ບໍລິໂພກ, ເຄື່ອງນຸ່ງຫົ່ມ ແລະ ສິ່ງຂອງທີ່ຈຳເປັນ ອື່ນໆອີກ...ມີມູນຄ່າ 20,610,000 ກີບ ( ຊາວລ້ານ ຫົກແສນ ສິບພັນກີບ ) ລວມມູນຄ່າຊ່ວຍເຫລືອທັງໝົດ 155,460,000 ກີບ ( ໜຶ່ງຮ້ອຍຫ້າສິບຫ້າລ້ານ ສີ່ແສນຫົກສິບພັນກີບ ). 


ທ່ານ ນາງ ນາລີ ສີສຸລິດ ໄດ້ກ່າວວ່າ: ການນຳເອົາເຄື່ອງອຸປະໂພກ-ບໍລິໂພກ,ເຄື່ອງນຸ່ງຫົ່ມ, ແລະ ສັດລ້ຽງ ມາມອບ ແລະ ແຈກຢາຍ ໃຫ້ປະຊາຊົນຜູ່ທີ່ທຸກຍາກ, ຂາດເຂີນ ຈຳນວນ 15 ຄອບຄົວ ຂອງບ້ານຜາລະແວກ, ເມືອງຮົ່ມ, ແຂວງໄຊສົມບູນ ໃນຄັ້ງນີ້, ແມ່ນທາງມູນນິທິຊ່ວຍເຫລືອຄົນທຸກຍາກ ແຫ່ງ ສປປ ລາວ ໄດ້ຮັບການຊ່ວຍເຫລືອ ຈາກອົງການຈັດຕັ້ງສັງຄົມ ທາງພາຍໃນ ແລະ ຕ່າງປະເທດ ເພື່ອເປັນການຊ່ວຍເຫລືອບັນເທົ່າທຸກ ສ່ວນໃດ ສ່ວນໜຶ່ງ, ອັນສຳຄັນແມ່ນຍ້ອນຄວາມເປັນຫ່ວງເປັນໄຍ ຂອງການນຳພັກ-ລັດ ຂັ້ນສູງ ທີ່ມີຕໍ່ປະຊາຊົນລາວບັນດາເຜົ່າ ເຊິ່ງຍາມໃດກໍໄດ້ເປັນຫ່ວງຕໍ່ຄວາມສຸກທຸກຂອງປະຊາຊົນມາຕະຫລອດ ພ້ອມນີ້ທ່ານຍັງໄດ້ເນັ້ນ ໃຫ້ປະຊາຊົນຈົ່ງມີຄວາມດຸໝັ່ນ, ອົດທົນ, ສູ້ຊົນ, ມີຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ພ້ອມກັນສ້າງເສດຖະກິດຄອບຄົວ ດ້ວຍການທຳການຜະລິດ ປູກຝັງ-ລ້ຽງສັດ ໃຫ້ກາຍເປັນສິນຄ້າ ເພື່ອໃຫ້ຄອບຄົວຂອງຕົນມີຢູ່ມີກິນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ. 

ຈາກນັ້ນ ທ່ານ ນາງ ນາລີ ສີສຸລິດ ພ້ອມດ້ວຍພັນລະຍາຂອງການນຳ ໄດ້ມອບເຄື່ອງຊ່ວຍເຫລືອ ແລະ ສັດລ້ຽງ ດັ່ງກ່າວ ໃຫ້ປະຊາຊົນ ໂດຍຕາງໜ້າຮັບ ຂອງທ່ານ ເຈົ້າແຂວງໄຊສົມບູນ ແລະ ທ່ານ ເຈົ້າເມືອງ-ເມືອງຮົ່ມ ເພື່ອນຳໄປມອບໃຫ້ປະຊາຊົນຄອບຄົວທຸກຍາກ ຂອງບ້ານຜາລະແວກ. ໃນໂອກາດນີ້ ທ່ານ ນາງ ນາລີ ສີສຸລິດ ຍັງໄດ້ມອບເງິນ ຈຳນວນໜຶ່ງໃຫ້ອໍານາດການປົກຄອງ ບ້ານນໍ້າຄຽນ ແລະ ບ້ານ ຮົ່ມທາດ ບ້ານລະ 5000,000 ກີບ (ຫ້າລ້ານກີບ) ເພື່ອເປັນການຊຸກຍູ້ ແລະ ສົ່ງເສີມ ດ້ານປັດໃຈໃຫ້ແກ່ປະຊາຊົນ ເພື່ອໝູນໃຊ້ເຂົ້າໃນວຽກງານທີ່ຈຳເປັນຂອງບ້ານ ໃຫ້ເກີດປະໂຫຍດສູງສຸດ.

ພາບ-ຂ່າວ: ສຸກສັນ

Post a Comment

0 Comments