ທ່ານ ປະທານ ສນຊ ເຂົ້າຮ່ວມກອງປະຊຸມຄົບຄະນະກຳມະການສູນກາງ ອພສ



ວັນທີ 19 ທັນວາ 2019 ນີ້, ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ເຂົ້າຮ່ວມກອງປະຊຸມຄົບຄະນະກຳມະການສູນກາງອົງການພຸດທະສາສະໜາສຳພັນລາວ, ໂດຍການເປັນປະທານຂອງ ພຣະຍອດແກ້ວມະຫາສັງຄະສຸທັມມາທິບໍດີ ປະທານສູນກາງອົງການພຸດທະສາສະໜາສຳພັນລາວ, ມີບັນດາຮອງປະທານສູນກາງອົງການພຸດທະສາສະໜາສຳພັນລາວ, ບັນດາທ່ານຜູ້ຕາງໜ້າກະຊວງ-ອົງການ, ພະສົງຈາກບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມ.



ກອງປະຊຸມຄັ້ງນີ້, ໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານ ຂອງສູນກາງອົງການພຸດທະສາສະໜາສຳພັນລາວ ໃນໄລຍະ 1 ປີຜ່ານມາ ແລະ ທິດທາງແຜນການໃນປີຕໍ່ໜ້າ ໂດຍຫຍໍ້ ເຊິ່ງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນວ່າ: ອພສ ໄດ້ເອົາໃຈໃສ່ຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ ກໍຄືຕັ້ງໜ້າປັບປຸງຂໍ້ກຳນົດ, ກົດລະບຽບ, ແບບແຜນວິທີເຮັດວຽກຕ່າງໆ ແລະ ການຄຸ້ມຄອງພຣະພຸດທະສາສະໜາ ເພື່ອຄວາມເປັນລະບຽບຮຽບຮ້ອຍຂອງພຣະສົງລາວ; ເອົາໃຈໃສ່ຈັດຕັ້ງປະຕິບັດເຜີຍແຜ່ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ພຣະສົງ-ສາມະເນນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ເຜີຍແຜ່ວຽກງານຂໍ້ກຳນົດກົດລະບຽບ, ທັມມະນູນປົກຄອງໃຫ້ຄະນະອົງການພຸດທະສາສະໜາສຳພັນລາວຂອງແຂວງ ແລະ ເມືອງ ໄດ້ຮັບຮູ້ ແລະ ເຂົ້າໃຈ.



ໃນໂອກາດນີ້, ທ່ານ ປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ອົງການພຸດທະສາສະໜາສຳພັນລາວຍາດມາໄດ້ໃນໄລຍະຜ່ານມາ ແລະ ທ່ານ ໄດ້ມີບາງຄຳເຫັນໂອ້ລົມຕໍ່ກອງປະຊຸມດັ່ງກ່າວວ່າ:ໃຫ້ ອພສ ເພີ່ມທະວີຄວາມສາມັກຄີເປັນເອກະພາບ ຂອງພະສົງ-ສາມະເນນ ເພື່ອຮັບປະກັນ ການເຄື່ອນໄຫວວຽກງານຂອງອົງການພຸດທະສາສະໜາສຳພັນລາວ ຢ່າງມີປະສິດທິພາບ, ສືບຕໍ່ຊີ້ນຳ-ນຳພາ ຈັດຕັ້ງຜັນຂະຫຍາຍມະຕິກອງປະຊຸມ ຄັ້ງທີ VII ຂອງອົງການພຸດທະສາສະໜາສຳພັນລາວ ໃຫ້ເປັນຂະບວນການຟົດຟື້ນ ເພື່ອໃຫ້ເຂົ້າເຖິງປະຊາຊົນລາວບັນດາເຜົ່າ ໃຫ້ຮູ້ຈັກຫຼັກທຳຄຳສັ່ງສອນທາງພຸດທະສາສະໜາ, ຮີດຄອງປະເພນີ-ວັດທະນະທຳອັນດີງາມຂອງຊາດ;




 ໃຫ້ມີການຄຸ້ມຄອງພະສົງ-ສາມະເນນທີ່ຈະໄປສຶກສາຢູ່ຕ່າງປະເທດ ພ້ອມທັງມີການປະສານສົມທົບກັບພາກສ່ວນທີ່ກ່ຽວຂ້ອງ, ສືບຕໍ່ສ້າງນິຕິກຳຕ່າງໆ ເພື່ອເປັນເຄື່ອງມືຊ່ວຍໃນການຄຸ້ມຄອງພະສົງ-ສາມະເນນ, ພໍ່ຂາວ-ແມ່ຂາວ, ການເຮັດພິທີກຳຕ່າງໆ ມີຄວາມເປັນເອກະພາບ, ມີຄວາມເໝາະສົມ ແລະ ສອດຄ່ອງກັບເງື່ອນໄຂໃໝ່ຂອງສັງຄົມ.

ກອງປະຊຸມຄັ້ງນີ້ ຈະໄດ້ດຳເນີນໄປເປັນເວລາ 2 ວັນ(ວັນທີ 19-20 ທັນວາ 2019).



Post a Comment

0 Comments