ຊົມເຊີຍ! ພະແນກ ຖວທ ແລະ ສູນອະນຸລັກຊ້າງອາຊີມອບເຄື່ອງຊ່ວຍເຫຼືອບ້ານກ້ອງທ່ຽງ, ເມືອງໄຊສະຖານ





 ໃນວັນທີ 17 ທັນວາ 2019 ນີ້ທາງພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ໄດ້ນໍາເອົາເຄື່ອງນຸ່ງຫົ່ມ ແລະ ເງິນຈໍານວນ 3 ລ້ານກີບ ໃນນີ້ສູນອະນຸລັກຊ້າງລາວ 2 ລ້ານ 4 ແສນກີບ ແລະ ພະແນກ ຖວທ 6 ແສນກີບ ໄປມອບໃຫ້ພໍ່ແມ່ປະຊາຊົນ ບ້ານກ້ອງທ່ຽງ ເມືອງໄຊສະຖານ ແຂວງໄຊຍະບູລີ.



 ບ້ານກ້ອງທ່ຽງ ເປັນບ້ານໜຶ່ງທີ່ນອນໃນເຂດ 21 ບ້ານຂອງເມືອງໄຊສະຖານ ມີເນື້ອທີ່ທັງໝົດ 948,03 ເຮັກຕາ, ເນື້ອທີ່ສ່ວນໃຫຍ່ເປັນເຂດພູດອຍ ກວມເອົາ 95%, ມີ 5 ໜ່ວຍງານ, ມີ 17 ຈຸງານ, ມີ 7 ໜ່ວຍຄຸ້ມຄອງ ພົນລະເມືອງມີ 89 ຄອບຄົວ, ມີ 85 ຫຼັງຄາເຮືອນ, ພົນລະເມືອງທັງໝົດ 456 ຄົນ, ຍິງ 235 ຄົນ ສ່ວນຫຼາຍເປັນເຜົ່າໄປຼ່ ກວມ 95% ອາຊີບຕົ້ນຕໍແມ່ນເຮັດໄຮ່, ປູກເຂົ້າ, ປູກພືດກະສິກໍາ ແລະ ລ້ຽງສັດ ໃນທົ່ວບ້ານຍັງມີຄອບຄົວທຸກຍາກ 8 ຄອບຄົວ. ເຄື່ອງທີ່ນໍາມາມອບໃນຄັ້ງນີ້ປະກອບມີ ເຄື່ອງນຸ່ງຫົ່ມປະເພດເສື້ອກັນໜາວ ໂສ້ງ, ສິ້ນ ແລະ ເງິນສົດ 3 ລ້ານກີບ ເພື່ອມອບໃຫ້ປະຊາຊົນໃນບ້ານດັ່ງກ່າວ; ສ່ວນເງິນແມ່ນຈະໄດ້ນໍາໃຊ້ຊື້ອຸປະກອນກໍ່ສ້າງ, ຫ້ອງນໍ້າໂຮງຮຽນປະຖົມບ້ານກ້ອງທ່ຽງ ຍ້ອນວ່າຫ້ອງນໍ້າໃນໂຮງຮຽນຍັງບໍ່ທັນຖາວອນ. 




ເຄື່ອງທີ່ນໍາມາມອບແມ່ນໄດ້ຈາກພະນັກງານ-ລັດຖະກອນພະແນກ ຖວທ ແລະ ສູນອະນຸລັກຊ້າງ ເຖິງວ່າຈະມີມູນຄ່າບໍ່ຫຼວງຫຼາຍ ແຕ່ກໍ່ເປັນສ່ວນໜຶ່ງທີ່ຊ່ວຍໃຫ້ພໍ່ແມ່ປະຊາຊົນມີກໍາລັງໃຈຜ່ານຜ່າອຸປະສັກນາງໆປະການໄດ້. ໃຫ້ກຽດມອບໂດຍ ທ່ານ ຈັນທີ ສີມະນີຈັນ ຫົວໜ້າພະແນກ ຖວທ ແຂວງ, ກ່າວຮັບ ທ່ານ ຖື ນາຍບ້ານບ້ານກ້ອງທ່ຽງ ໂດຍເປັນສັກຂີພິຍານຂອງທ່ານ ສີສະໝອນ ນາມວົງ ຮອງເຈົ້າເມືອງໄຊສະຖານ ພ້ອມດ້ວຍພະນັກງານພະແນກ ຖວທ ແຂວງ ແລະ ພໍ່ແມ່ປະຊາຊົນພາຍໃນບ້ານເຂົ້າຮ່ວມ.  

ຂ່າວ: ບຸນທີ.

Post a Comment

0 Comments