ທ່ານ ສີສະຫວາດ ແກ້ວບຸນພັນ ຢ້ຽມຢາມ ແລະ ເຮັດວຽກຢູ່ແຂວງ ວຽງຈັນ


   ທ່ານ ພົນເອກ. ສີສະຫວາດ ແກ້ວບຸນພັນ ອະດີດກຳມະການກົມການເມືອງສູນກາງພັກ, ອະດີດປະທານສູນກາງແນວລາວສ້າງຊາດ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງ ວຽງຈັນ ໂດຍໄດ້ຮັບການຕ້ອນຮັບ ຈາກທ່ານ ຄໍາພັນ ສິດທິດໍາພາ  ກຳມະການສູນກາງພັກ, ເລຂາພັກແຂວງ ເຈົ້າແຂວງໆວຽງຈັນ. ທ່ານ ພົ.ວ ບຸນມາ ວົງດາລາແສນ ກຳມະການພັກແຂວງ, ຫົວຫນ້າການທະຫານ ກອງບັນຊາການທະຫານແຂວງວຽງຈັນ. ໃນວາລະການເຄື່ອນໄຫວໃນຄັ້ງນີ້ ທ່ານ ພົນເອກ ສີສະຫວາດ ແກ້ວບຸນພັນ ໄດ້ພົບປະ ແລະ ເຮັດວຽກກັັບຄະນະນຳຂັ້ນແຂວງ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຂອງແຂວງ ທີ່ກອງບັນຊາການທະຫານແຂວງ. ໃນລະຫວ່າງວັນທີ່ 16-19 ທັນວາ 2019 ນີ້.



   ໃນໂອກາດລົງເຄື່ອນໄຫວຢ້ຽມຢາມຄັ້ງນີ້ ທ່ານ ພົນເອກ ສີສະຫວາດ ແກ້ວບຸນພັນ  ໄດ້ຮັບຟັງບົດລາຍງານຫຍໍ້ກ່ຽວກັບສະພາບລວມຂອງແຂວງ ໂດຍສະເພາະແມ່ນ ວຽກງານການເມືອງ-ແນວຄິດ, ພື້ນຖານເສດຖະກິດ-ສັງຄົມ, ວັດທະນະທໍາ ແລະ ວຽກງານອື່ນໆ ທີ່ກ່ຽວຂ້ອງ ຈາກທ່ານເຈົ້າແຂວງ.

ພ້ອມດຽວກັນນັ້ນ, ທ່ານ ສີສະຫວາດ ແກ້ວບຸນພັນ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານຂອງຄະນະພັກ-ຄະນະນໍາຂອງແຂວງທີ່ຍາດມາໄດ້ໃນໄລຍະຜ່ານ, ແຕ່ຄຽງຄູ່ກັບຜົນງານແລ້ວ ຄະນະພັກ, ຄະນະນໍາແຕ່ລະຂັ້ນ ຕ້ອງໄດ້ເພີ່ມທະວີໃນການເຕົ້າໂຮມຄວາມສາມັກຄີປອງດອງປະຊາຊົນລາວບັນດາເຜົ່າພາຍໃນແຂວງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃນການແກ້ໄຂປະ ກົດການຫຍໍ້ທໍ້ຕ່າງໆໃນສັງຄົມ; ເອົາໃຈໃສ່ຕ້ານໄພແຫ້ງແລ້ງ ແລະ ອຸທົກກະໄພຕ່າງໆ,  ຊຸກຍູ້ໃຫ້ປະຊາຊົນລາວບັນດາເຜົ່າເຂົ້າຮ່ວມທຸກຂະບວນການທີ່ສໍາຄັນຂອງຊາດ, ຂອງແຂວງ ເປັນຕົ້ນແມ່ນເປັນເຈົ້າຕົນເອງ ໃນການປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ປຸກລະດົມປະຊາຊົນທໍາການຜະລິດເປັນສິນຄ້າ ເພື່ອແກ້ໄຂຄວາມທຸກຍາກຂອງປະຊາຊົນເຮັດໃຫ້ແຂວງວຽງຈັນນັບມື້ຮັ່ງມີຂຶ້ນເລື້ອຍໆ. 

ພ້ອມດຽວກັນນັ້ນ, ທ່ານ ສີສະຫວາດ ແກ້ວບຸນພັນ ໄດ້ເຄື່ອນໄຫວຢ້ຽມຢາມ ແລະ ໂອ້ລົມພະນັກງານຫລັກແຫລ່ງ ຢູ່ເມືອງວັງວຽງ ແຂວງ ວຽງຈັນຕື່ມອີກ.

Post a Comment

0 Comments