ເມືອງຫົງສາ ຈັດພິທີປະກາດການຈັດຕັ້ງ ເຈົ້າເມືອງ, ຮອງເຈົ້າເມືອງ ແລະ ບາງຂະແໜງການຂອງເມືອງຢ່າງເປັນທາງການ


ຕອນເຊົ້າວັນທີ 26 ທັນວາ 2019 ເມືອງຫົງສາ ແຂວງໄຊຍະບູລີ ໄດ້ຈັດພິທີປະກາດການຈັດຕັ້ງ ເຈົ້າເມືອງ, ຮອງເຈົ້າເມືອງ ແລະ ບາງຂະແໜງການຂອງເມືອງຂຶ້ນຢ່າງເປັນທາງການ. ຢູ່ທີ່ສະໂມສອນຂອງເມືອງ. 




ໂດຍເປັນກຽດເຂົ້າຮ່ວມເປັນປະທານຂອງທ່ານ ຍັນຍົງ ສີປະເສີດ ຮອງເລຂາພັກແຂວງ ຮອງເຈົ້າແຂວງໄຊຍະບູລີ ພ້ອມດ້ວຍທີມງານຂອງແຂວງ, ມີຄະນະປະຈຳພັກເມືອງຫົງສາ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ຫົວໜ້າກອງບັນຊາການທະຫານ-ຕຳຫຼວດ, ພະນັກງານອາວຸໂສບຳນານ, ຕາງໜ້າບໍລິສັດ, ລັດວິສາຫະກິດສູນບໍລິການປະຈຳເມືອງ, ນັກທຸລະກິດ-ຜູ້ປະກອບການ, ນາຍບ້ານເທດສະບານເມືອງ ແລະ ພະນັກງານຫຼັກແຫຼ່ງຂອງເມືອງເຂົ້າຮ່ວມ.



​ໃນ​ພິທີ​ດັ່ງກ່າວ, ທ່ານ ໄພທອງ ຈັນດາ ຮອງຫົວໜ້າຄະນະຈັດຕັ້ງແຂວງໆ ໄຊຍະບູລີ ​ໄດ້​ຂຶ້ນ​ຜ່ານ​ມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຮັບຮອງເອົາຄະນະບໍລິຫານງານພັກເມືອງ, ຜູ້ແທນສົມບູນ-ສຳຮອງ, ຄະນະປະຈຳ, ເລຂາ-ຮອງເລຂາ, ປະທານ-ຮອງປະທານກວດກາພັກເມືອງໆ ຫົງສາ ສະໄໝທີ VIII ທັງໝົດ 27 ສະຫາຍ ຍິງ 4 ສະຫາຍ.




 ໃນນັ້ນ, ມີຄະນະປະຈຳພັກເມືອງທັງໝົດ 9 ສະຫາຍ ຍິງ 2 ສະຫາຍ, ກຳມະການພັກເມືອງ ທັງໝົດ 15 ສະຫາຍ ຍິງ 2 ສະຫາຍ; ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງທ່ານ ຄຳຫຼ້າ ຜິວວັນນາ ເລຂາພັກເມືອງ ເປັນເຈົ້າເມືອງໆ ຫົງສາ, ແຕ່ງຕັ້ງທ່ານ ແຫຼ້ ອ່ອນສົມບູນ ກຳມະການປະຈຳພັກເມືອງ ເປັນຮອງເຈົ້າເມືອງໆ ຫົງສາ, ໂຍກຍ້າຍ-ແຕ່ງຕັ້ງທ່ານ ຈັນເພັງ ອູ່ທອງຄຳ ກຳມະການປະຈຳພັກເມືອງ ຫົວໜ້າຫ້ອງການແຜນການ ແລະ ການລົງທຶນເມືອງ ໄປຮັບໜ້າທີ່ໃໝ່ຢູ່ຫ້ອງວ່າການເມືອງ ເປັນຮອງເຈົ້າເມືອງໆ ຫົງສາ. 


ພ້ອມນີ້, ທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດ ແລະ ວຽກພັກ-ພະນັກງານ ກໍ່ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງຫົງສາ ວ່າດ້ວຍການແຕ່ງຕັ້ງທ່ານ ສົມສີ ພົມມະຈັນ ຮອງເລຂາພັກເມືອງ ເປັນປະທານອົງການກວດກາລັດເມືອງ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນເມືອງ, ໂຍກຍ້າຍ-ແຕ່ງຕັ້ງທ່ານ ປ່ຽນ ຈິນດາ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ ໄປຮັບໜ້າທີ່ໃໝ່ຢູ່ຫ້ອງວ່າການເມືອງ ເປັນຫົວໜ້າຫ້ອງວ່າການປົກຄອງເມືອງ, ບົ່ງຕົວແຕ່ງຕັ້ງ ທ່ານ ທອງສຸກ ປ້ອງຄຳ ເປັນເລຂາໜ່ວຍພັກ ທັງເປັນຫົວໜ້າຫ້ອງການ ສຶກສາທິການ ແລະ ກິລາເມືອງຫົງສາ.





ໃນ​ຕ້ອນ​ທ້າຍ, ທ່ານ ຍັນຍົງ ສີປະເສີດ ​ໄດ້​ໃຫ້​ກຽດ​ໂອ້​ລົມຕໍ່​ພິທີ. ​ເຊິ່ງກ່ອນອຶ່ນທ່ານ​ໄດ້​ກ່າວ​ຍ້ອງຍໍ​ ຊົມ​ເຊີຍ ​ບັນດາ​ທ່ານ​ທີ່​ຖືກ​ແຕ່ງຕັ້ງຮັບ​ໜ້າ​ທີ່​ໃໝ່ ​​ເຊິ່ງລ້ວນ​ແລ້ວ​ແຕ່​ແມ່ນ​ບຸກຄົນ​ທີ່ມີ​ຄວາມ​ຮູ້​, ຄວາມ​ສາມາດ, ມີປະສົບ​ການ, ມີ​ຜົນງານ​​ໃນ​ຫຼາຍ​ດ້ານ, ຜ່ານ​ການ​ບຸກບືນ-ຝຶກຝົນຫຼໍ່​ຫຼອມຕົນເອງ ຈົນເຮັດໃຫ້ຕົນເອງມີການເຕີບໃຫຍ່ເຂັ້ມແຂງຂຶ້ນ ເປັນແຕ່ລະບາດກ້າວ ແລະ ​ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ​ ຈາກ​ການຈັດ​ຕັ້ງຂັ້ນເທິງ​ເປັນ​ຢ່າງ​ດີ. ພ້ອມນັ້ນ, ທ່ານໄດ້ເນັ້ນໜັກໃຫ້ສືບຕໍ່ຊີ້ນໍາ-ນຳພາ ວຽກງານສຶກສາອົບຮົມການເມືອງແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານເສດຖະກິດ-ວັດທະນະທຳສັງຄົມ ແລະ ວຽກງານທີ່ໄດ້ຮັບຜິດຊອບຊີ້ນຳ-ນຳພາໃຫ້ມີຜົນສຳເລັດ, ເລັ່ງປັບປຸງແກ້ໄຂ ດ້ານອ່ອນທີ່ຄົງຄ້າງໃຫ້ມີການຫັນປ່ຽນຢ່າງແຂງແຮງກວ່າເກົ່າ, ສືບຕໍ່ປົກປັກຮັກສາມູນເຊື້ອອັນດີງາມໂດຍສະເພາະ ຄວາມສາມັກຄີພາຍໃນຄະນະພັກ-ຄະນະນຳ, ມີຄວາມເປັນເອກະພາບສູງຕໍ່ວຽກງານ, ທັງສືບຕໍ່ເປັນຫຼັກແຫຼ່ງ, ເປັນຄັນທຸງ, ເປັນແກນນຳໃນການເຕົ້າໂຮມຄວາມສາມັກຄີຄະນະພັກ, ສະມາຊິກພັກ ໃນຖັນແຖວພະນັກງານຕື່ມອີກ.

ພາບ-ຂ່າວ: ກິດຕິສັກ ບົວໄລ (ນັກຂ່າວເມືອງຫົງສາ)

Post a Comment

0 Comments