ປະດັບຫຼຽນໄຊແຮງງານຊັ້ນ I ໃຫ້ທ່ານ ສົມສະຫວາດ ເລັ່ງສະຫວັດ ແລະ ປາຖະຄາຖາຄົບຮອບ 24 ປີ ນະຄອນຫຼວງພະບາງເມືອງມໍລະດົກໂລກ




ພິທີປາຖະກະຖາ ສະເຫຼີມສະຫຼອງ ຫຼວງພະບາງເມືອງມໍລະດົກໂລກ ຄົບຮອບ 24 ປີ ແລະ ປະດັບຫຼຽນໄຊແຮງງານຊັ້ນ I ໃຫ້ພະນະ ທ່ານ ສົມສະຫວາດ ເລັ່ງສະຫວັດ ອາດີດ ກົມການເມືອງສູນກາງພັກ,ອາດີດຮອງນາຍົກລັດຖະມົມຕີ ໄດ້ຈັດຂື້ນ ໃນວັນທີ 16 ທັນວາ 2019ນີ້ ທີ່ຫໍປະຊຸມໃຫຍ່ແຂວງຫຼວງພະບາງ ໂດຍໃຫ້ກຽດປາຖະກະຖາ ຂອງພະນະ ທ່ານ ສົມສະຫວາດ ເລັ່ງສະຫວັດ ເຊິ່ງທ່ານໄດ້ຍົກໃຫ້ເຫັນສະພາບການປົກປັກຮັກສາມໍລະດົກໂລກຫຼວງພະບາງຕະຫຼອດໄລຍະ 24 ປີຜ່ານມາ ຂອງຊາວຫຼວງພະບາງ ທີ່ໄດ້ຮ່ວມກັນຊຸກຍູ້ສົ່ງເສີມ ພ້ອມທັງຮັກສາໄດ້ມູນເຊື້ອວັດທະນະທໍາອັນດີງາມ ແລະ ສະຖານບູຮານທີ່ເກົ່າແກ່ຢູ່ຄູ່ຊາວເມືອງໄວ້ເປັນຢ່າງດີ.ພ້ອມທັງຍົກໃຫ້ເຫັນຄວາມໝາຍຂອງມໍລະດົກແມ່ນຜະລິດຕະພັນທີ່ມະນຸດສ້າງຂຶ້ນ ຫຼື ເກີດຂຶ້ນໂດຍທຳມະຊາດ ທີ່ມີຄຸນຄ່າສູງທາງດ້ານວັດທະນະທຳ,ປະຫວັດສາດ ແລະ ທຳມະຊາດ,ເປັນຊັບສົມບັດອັນລໍ້າຄ່າ,ເປັນຊັບສິນລວມຂອງວົງຄະນະຍາດແຫ່ງຊາດ ແລະ ມໍລະດົກແຫ່ງຊາດ ທີ່ເປັນວັດຖຸຫຼືບໍ່ເປັນວັດຖຸ ແມ່ນການຢັ້ງຢືນເຖິງຄວາມເປັນມາຂອງຊາດລາວ,ຄົນລາວ ໂດຍສະເພາະແມ່ນຊາວນະຄອນຫຼວງພະບາງ ແຕ່ລະຍຸກແຕ່ລະສະໄໜ.ໂດຍຜ່ານການສໍາຫຼວດ ແລະ ຮັບຮອງຈາກຄະນະກຳມະການມໍລະດົກໂລກ ແລະ ບັນທຶກເຂົ້າໃນບັນຊີມໍລະດົກໂລກຂອງອົງການອຸຍແນັສສະໂກ ຕາມມາດຖານເງື່ອນໄຂ ແລະ ຂໍ້ກຳນົດໃນສົນທິສັນຍາ 1972,



ເຊິ່ງນະຄອນຫຼວງພະບາງໂດຍຜ່ານ 3 ເງື່ອນໄຂທີ່ໄດ້ຮັບເຂົ້າເປັນມໍລະດົກໂລກຄື: ເງື່ອນໄຂທີ 1) ສະແດງໃຫ້ເຫັນເຖິງ ຄວາມສໍາຄັນ ໃນການແລກປ່ຽນ ຄຸນຄ່າມະນຸດ ມາໄດ້ຫລາຍ ເຊັ່ນຄົນ, ເປັນສະຖານທີ່ທາງ ດ້ານວັດທະນະທໍາ ຂອງໂລກຄຽງຄູ່ ກັບການພັດທະນາ ທາງດ້ານສະຖາ ປັດຕິຍະກໍາ ຫລື ເຕັກໂນໂລ ຊີ, ສີລະປະ ອະນຸສອນສະຖານ, ການວາງຜັງເມືອງ.ເງື່ອນໄຂທີ 2) ເປັນຕົວຢ່າງ ອັນໂດດເດັ່ນຂອງ ຮູບແບບການ ປຸກສ້າງທາງດ້ານ ສະຖາ ປັດຕິຍະກຳ, ເຕັກໂນໂລຊີ ຫລື ດ້ານຄຸນນະ ພາບ,ລັກສະນະສະຖານ ທີ່ສະແດງໃຫ້ເຫັນ ຄວາມໝາຍຄວາມສຳ ຄັນ ແຕ່ລະຍຸກຂອງມວນມະນຸດ.ເງື່ອນໄຂທີ 3) ເປັນຕົວຢ່າງ ອັນໂດດເດັ່ນ ຂອງການດໍາລົງຊີວິດ ທີ່ມີຮີດຄອງປະເພນີອັນ ຍອດຍິ່ງ, ເປັນເອກະລັກ ສະເພາະສືບທອດ ກັນມາຂອງມວນມະນຸດ ໃນການນຳໃຊ້ທີ່ດິນ-ນໍ້າຢັ້ງຢືນເຖິງ ວັດທະນະທຳໃດໜຶ່ງ ຫລື ຮູບການ ວັດທະນະທໍາ ທີ່ແຕກຕ່າງກັນ.ມາເຖິງປະຈຸບັນປະເທດທີ່ຂຶ້ນບັນຊີມໍລະດົກໂລກໂດຍອຸຍແນັສສະໂກຮັບຮອງມີຈໍານວນ 167 ປະເທດ,ມີແຫຼ່ງມໍລະດົກໂລກທັງໝົດ 1.121 ແຫ່ງມໍລະດົກທາງດ້ານວັດທະນະທຳ 869 ແຫ່ງ,ມໍລະດົກທາງດ້ານທຳມະຊາດ 213 ແຫ່ງ,ມໍລະດົກປະສົມ 39 ແຫ່ງ,ໃນນີ້ ສປປລາວໄດ້ຂຶ້ນບັນຊີມໍລະດົກໂລກ 3 ແຫ່ງ ,ສະເພາະ ຫຼວງພະບາງເມືອງມໍລະດົກໂລກໄດ້ຮັບຮອງໃນປີ 1995. 

ຄຽງຄູ່ກັນນັ້ນກໍໄດ້ມີບຸກຄົນທີ່ໄດ້ສ້າງຄຸນງາມຄວາມດີ ປະກອບສ່ວນເຂົ້າໃນວຽກງານປົກປັກຮັກສາມໍລະດົກໂລກຫຼວງພະບາງ ຈົນໄດ້ຖືກຮັບຮອງເປັນມໍລະດົກໂລກຈົນເຖິງທຸກວັນ,ໂດຍມີຫຼາຍພາກສ່ວນ ໜຶ່ງໃນນັ້ນກໍ່ມີທ່ານ ສົມສະຫວາດ ເລັ່ງສະຫວັດ ອາດີດກົມການເມືອງສູນກາງພັກ,ອາດີດຮອງນາຍົກລັດຖະມົມຕີ,ທ່ານໄດ້ໃຫ້ຄວາມເອົາໃຈໃສ່ຊີ້ນໍາ ແລະ ນໍາພາໃນການປົກປັກຮັກສາ ລວມທັງການພົວພັນກັບຕ່າງປະເທດ ໃຫ້ການຊ່ວຍເຫຼືອ,ບູລະນະສະຖານທີ່ວັດວາອາຮາມ ແລະ ສະຖາປັດຕະຍະກໍາອັນເກົ່າແກ່ ທາງປະຫວັດສາດ,ທໍາມະຊາດ ໄວ້ໃຫ້ຍືນຍົງ.ດັ່ງນັ້ນອົງການປົກຄອງແຂວງຫຼວງພະບາງ ຈິ່ງສະເໜີເຖິງລັດຖະບານ ເພື່ອປະດັບຫຼຽນໄຊແຮງງານຊັ້ນ I ໃຫ້ພະນະ ຕາມລັດຖະດຳລັດຂອງປະທາປະເທດ ແຫ່ງ ສປປລາວ ເລກທີ່ 326/ປປທ ວ່າດ້ວຍການປະດັບຫຼຽນໄຊແຮງງານ ຊັ້ນ I ໃຫ້ຜູ້ທີ່ມີຜົນງານດີເດັ່ນມີຄຸນງາມຄວາມດີ ອຸທິດເຫື່ອແຮງ,ສະຕິປັນຍາເຂົ້າໃນການຊີ້ນໍາ-ນຳພາການປົກປັກຮັກສາ ແລະ ອະນຸລັກມູນເຊື້ອວັດທະນະທຳອັນດີງາມຂອງ ແຂວງຫຼວງພະບາງ ເມືອງ ມໍລະດົກໂລກຕະຫຼອດໄລຍະຜ່ານມາ (9/12/1995-9/12/2015 ) ໃຫ້ກຽດຂຶ້ນປະດັບຫຼຽນໄຊແຮງງານ ໂດຍ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ ຢ່າງສົມກຽດ.

ທ່ານ ຄໍາຂັນ ຈັນທະວີສຸກ ກ່າວວ່າ: ຈຸດປະສົງຂອງການເຕົ້າໂຮມຊຸມໃນຄັ້ງນີ້ ເປັນການເຜີຍແຜ່ ແລະ ຫວນຄືນສະພາບການປົກປັກຮັກສາມໍລະດົກໂລກຫຼວງພະບາງຕະຫຼອດໄລຍະ 24 ປີຜ່ານມາ ໃຫ້ຊາວເມືອງມໍລະດົກໂລກ ໄດ້ເຂົ້າໃຈແຈ້ງເຖິງການຮັກສາໄວ້ໃຫ້ຍືນຍົງ ລວມທັງຜົນງານຕ່າງໆທີ່ພົ້ນເດັ່ນ ແລະ ສ້າງຊື່ສຽງໃຫ້ແກ່ແຂວງຫຼວງພະບາງກໍ່ຄືປະເທດລາວ.

ເຂົ້າຮ່ວມຮັບຟັງໃນຄັ້ງນີ້ມີຄະນະພັກປະຈໍາພັກແຂວງ,ກຳມະການພັກແຂວງ,ເມືອງ,ຫົວໜ້າພະແນກການ,ທະຫານ,ຕໍາຫຼວດ,ສະຖາບັນການສຶກສາ,ນັກທຸລະກິດ,ຄະນະກຳມະການຄຸ້ມຄອງມໍລະດົກໂລກ,ອົງການປົກຄອງບ້ານ ພ້ອມດ້ວຍປະຊາຊົນຊາວຫຼວງພະບາງເຂົ້າຮ່ວມຢ່າງຫຼວງຫຼາຍ.ປີ 2020 ນີ້.ນະຄອນຫຼວງພະບາງ ກໍ່ຕິດ 1 ໃນ 20 ແຫ່ງ,ແຫຼ່ງທ່ອງທ່ຽວທີ່ໜ້າທ່ຽວຊົມທີ່ສຸດໃນທົ່ວໂລກ.

 ຂ່າວ: ເພັດສາຄອນ ສິມມະວົງ

Post a Comment

0 Comments