ພິທີ ຖະແຫຼງຂ່າວ ກ່ຽວກັບການກະກຽມຈັດງານມະຫາກໍາຊົນເຜົ່າທົ່ວປະເທດຄັ້ງທີ I ແລະ ຜະລິດຕະພັນ ຂອງ ບັນດາຊົນ ເຜົ່າ ຢູ່ສວນພຶກສາ ເມືອງນາຊາຍທອງ


ພິທີ ຖະແຫຼງຂ່າວ ກ່ຽວກັບການກະກຽມຈັດງານມະຫາກໍາຊົນເຜົ່າທົ່ວປະເທດຄັ້ງທີ I  ແລະ ຜະລິດຕະພັນ ຂອງ ບັນດາຊົນ ເຜົ່າ ຢູ່ສວນພຶກສາ ເມືອງນາຊາຍທອງ, ນະຄອນຫລວງວຽງຈັນ

ວັນທີ 19ທັນວາ 2019 ນີ້, ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ໄດ້ເປັນກຽດຖະແຫຼງຂ່າວກ່ຽວກັບການກະກຽມຈັດງານມະຫາກໍາຊົນເຜົ່າທົ່ວປະເທດຄັ້ງທີ I  ແລະ ຜະລິດຕະພັນ ຂອງ ບັນດາຊົນ ເຜົ່າ ຢູ່ສວນພຶກສາ ເມືອງນາຊາຍທອງ, ນະຄອນຫລວງວຽງຈັນ ເປັນກຽດເຂົ້າຮ່ວມມີ ທ່ານ ພູວົງ ພະມີສິດ ປະທານສວນພຶກສາ, ທີ່ປຶກສາວຽກງານຊົນເຜົ່າ ສນຊ, ທ່ານ ສີເພັດ ທໍາມະວົງ ຮອງປະທານແນວລາວສ້າງຊາດ ນະຄອນຫຼວງວຽງຈັນ, ບັນດາທ່ານການນໍາມາຈາກເມືອງນາຊາຍທອງ ຕະຫຼອດຮອດສື່ມວນຊົນຈາກທຸກພາກສ່ວນເຂົ້າຮ່ວມ.



ທ່ານ ຮອງປະທານ ສນຊໄດ້ຕາງຫນ້າຄະນະປະຈໍາສູນກາງແນວລາວສ້າງຊາດ ມີຄວາມຍິນດີຂໍແຈ້ງໃຫ້ບັນດາທ່ານ ສື່ມວນຊົນຈາກ ທຸກພາກສ່ວນ ໂດຍຜ່ານບັນດາທ່ານໄປຍັງພະນັກງານ-ລັດຖະກອນ, ກໍາມະກອນ, ທະຫານ, ຕໍາຫຼວດ ຕະຫຼອດເຖິງປະຊາຊົນລາວບັນດາເຜົ່າໃນທົ່ວປະເທດໄດ້ຮັບຊາບວ່າ: ເພື່ອເປັນການສ້າງຂະບວນການ ສໍາຄັນຂະບວນການຫນຶ່ງຂໍ່ານັບຮັບຕ້ອນວັນສ້າງຕັ້ງແນວລາວສ້າງຊາດຄົບຮອບ 70 ປີ ທີ່ຈະຫມູນວຽນມາບັນຈົບ ຄົບຮອບ ໃນວັນທີ 13 ສິງຫາ 2020 ນີ້, ທັງເປັນຂະບວນການຂ່ໍານັບຮັບຕ້ອນວັນສໍາຄັນຕ່າງໆ ຂອງຊາດ, ຂອງພັກ ແລະ ອົງການຈັດຕັ້ງມະຫາຊົນ ໃນປີ 2020. 


ສູນກາງແນວລາວສ້າງຊາດຮ່ວມ ກັບສວນພຶກສາ, ທີ່ປຶກສາວຽກງານຊົນເຜົ່າຂອງສູນກາງແນວລາວສ້າງຊາດ, ແນວລາວສ້າງຊາດນະຄອນລວງວຽງຈັນ, ແນວລາວສ້າງຊາດເມືອງນາຊາຍທອງ, ອົງການປົກຄອງ ເມືອງ ແລະ ປະຊາຊົນລາວບັນເຜົ່າພາຍໃນເມືອງ ຈະໄດ້ພ້ອມກັນຈັດງານມະຫາກໍາຊົນເຜົ່າທົ່ວປະເທດ ຄັ້ງທີ 1 ສະແດງສິລະປະວັນນະຄະດີ ແລະ ການວາງສະແດງຜະລິດຕະພັນຂອງບັນດາຊົນເຜົ່າ ພ້ອມທັງຈັດກິດຈະກໍາທ່ຽວ ຊົມທໍາມະຊາດທີ່ສວຍສົດງົດງາມ, ເຮືອນຊົນເຜົ່າ, ສວນດອກໄມ້ ແລະ ສິ່ງທີ່ຫນ້າສົນໃຈ ອີກຫລາຍຢ່າງທີ່ມີຢູ່ໃນສວນພຶກສາ, ສວນທ່ອງທ່ຽວທໍາມະຊາດ ເຊິ່ງຕັ້ງຢູ່ເຂດດ່ານຊີ, ເມືອງນາຊາຍທອງ ນະຄອນຫລວງວຽງຈັນ. ການສະແດງສິລະປະວັນນະຄະດີ ແລະ ການວາງສະແດງຜະລິດຕະພັນບັນດາເຜົ່າໃນຄັ້ງນີ້ ຈະເລີ່ມຕົ້ນ ເປີດແຕ່ຕອນເຊົ້າຂອງວັນທີ 27 ທັນວາ 2019 ແລະ ຈະປິດລົງໃນຕອນຄໍາ່ຂອງວັນທີ 29 ທັນວາ 2019, ເຊິ່ງເປັນໄລຍະທີ່ປວງຊົນລາວບັນດາເຜົ່າພວກເຮົາພວມຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII, ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງແນວລາວສ້າງຊາດ ແລະ ພວມເບີກບານມ່ວນຊື່ນ ສະເຫລີມສະຫລອງວັນບຸນປະເພນີຂອງບັນດາເຜົ່າ ແລະ ສາສະຫນາ ຢ່າງເປັນຂະບວນຟົດຟື້ນ. ແຕ່ລະ ວັນຄະນະຮັບຜິດຊອບໄດ້ກະກຽມລາຍການ ແລະ ກິດຈະກໍາຕ່າງໆ ມີລາຍລະອຽດ ດັ່ງນີ້:

1. ມີການສະແດງສິລະປະວັນນະຄະດີຂອງບັນດາເຜົ່າ ເປັນຕົ້ນແມ່ນການຮ້ອງເພງ, ຂັບລໍາ,
ຟ້ອນ...ຂອງເຜົ່າລາວ, ຊົນເຜົ່າກຶມມຸ, ຊົນເຜົ່າມົ້ງ, ຊົນເຜົ່າບຣູ, ຊົນເຜົ່າໄຕດໍາ, ຊົນເຜົ່າໄຕ ແດງ, ຊົນເຜົ່າຜູ້ນ້ອຍ, ຊົນເຜົ່າພູໄທ ແລະ ຊົນເຜົ່າອື່ນໆ; 2. ມີການທ່ຽວຊົມການວາງສະແດງຜະລິດຕະພັນ ແລະ ຊີມອາຫານບັນດາເຜົ່າ; 3. ພາຍໃນງານມີການວາງສະແດງຜະລິດຕະພັນຂອງບັນດາເຜົ່າ ເປັນຕົ້ນແມ່ນເຄື່ອງນຸ່ງຫົ່ມຂອງຊົນເຜົ່າ, ເຄື່ອງປູກຂອງຝັງ, ຫັດຖະກໍາຈັກສານຂອງບັນດາເຜົ່າ ແລະ ອື່ນໆ; 4. ຈະມີກິດຈະກໍາທ່ຽວຊົມສວນພຶກສາ ເຊິ່ງເປັນການທ່ອງທ່ຽວທາງທໍາມະຊາດ ໃນນັ້ນຈະປະກອບມີ ຫໍວາງສະແດງວັດທະນະທໍາຂອງບັນດາເຜົ່າ, ເຮືອນຊົນເຜົ່າຕ່າງໆ, ມີດອກໄມ້ນາໆຊະນິດທີ່ສວຍງາມ ແລະ ສະຖານທີ່ພັກຜ່ອນທີ່ເຢັນສະບາຍ; 5. ຈະມີການເດີນແບບຊຸດຊົນເຜົ່າຕ່າງໆໃນມື້ສຸດທ້າຍຂອງວັນທີ 29 ທັນວາ 2019; 6. ແຕ່ລະວັນ ນັບແຕ່ວັນທີ 27 ຫາ 29 ທັນວາ 2019 ຈະມີການຄົບງັນທັງກາງເວັນ ແລະ  ກາງຄືນ.


ເພື່ອເຮັດໃຫ້ງານສະແດງສິລະປະວັນນະຄະດີ ແລະ ຜະລິດຕະພັນຂອງຊົນບັນດາເຜົ່າ ກໍ່ຄື ກິດຈະກໍາທີ່ກ່າວມາຂ້າງເທິງນັ້ນ ໄດ້ບັນລຸດ້ວຍຜົນສໍາເລັດອັນຈົບງາມ ແລະ ທັງມີບັນຍາກາດເບີກບານ ມ່ວນຊື່ນ, ຂ້າພະເຈົ້າຕາງຫນ້າຄະນະປະຈໍາສູນກາງແນວລາວສ້າງຊາດ, ຄະນະຮັບຜິດຊອບຈັດງານ ຂໍ ເຊີນຊວນບັນດາທ່ານ ການນໍາຂອງພັກ-ລັດ, ອົງການຈັດຕັ້ງມະຫາຊົນ ຕະຫຼອດເຖິງພະນັກງານລັດຖະກອນ, ກໍາມະກອນ, ທະຫານ, ຕໍາຫຼວດ, ອົງການຈັດຕັ້ງສາກົນປະຈໍາລາວ ແລະ ປະຊາຊົນລາວ ບັນດາເຜົ່າໃນນະຄອນຫລວງວຽງຈັນ ແລະ ບັນດາແຂວງອ້ອມຂ້າງເປັນກຽດ ເຂົ້າຮ່ວມງານໃນຄັ້ງນີ້ ຕາມ ອັດທະຍາໄສ.ພ້ອມກັນນີ້, ຂໍສະແດງຄວາມຂອບໃຈມາຍັງຜູ້ໃຫ້ການສະຫນັບສະຫນູນໂດຍສະເພາະແມ່ນບໍລິສັດ ຫ້າງຮ້ານ, ການຈັດຕັ້ງສັງຄົມ, ຕະຫຼອດເຖິງບຸກຄົນ, ທຸກໆທ່ານທີ່ໄດ້ປະກອບສ່ວນສະຫນັບສະຫນູນວັດຖຸ ປັດໃຈເຂົ້າໃນການກະກຽມຈັດຕັ້ງກິດຈະກໍາທີ່ກ່າວມານີ້ດ້ວຍ.

Post a Comment

0 Comments