ສໍາເລັດການດໍາເນີນກອງປະຊຸມໃຫຍ່ຜູ້ແທນຊາວໜຸ່ມ ກະຊວງວິທະຍາສາດ ແລະ ເຕັກໂນໂລຊີ ຄັ້ງທີ II


ກອງປະຊຸມໃຫຍ່ຜູ້ແທນຊາວໜຸ່ມ ກະຊວງວິທະຍາສາດ ແລະ ເຕັກໂນໂລຊີ ຄັ້ງທີ II ໄດ້ໄຂຂຶ້ນໃນຕອນເຊົ້າຂອງວັນທີ 09 ທັນວາ 2019, ທີ່ຫ້ອງປະຊຸມໃຫຍ່ ຂອງ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໂດຍໃຫ້ກຽດເຂົ້າຮ່ວມເປັນຄະນະປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ສະຫາຍ ພຸດທະສັກ ວິຈິດຕຣາ, ຮັກສາການເລຂາຄະນະບໍລິຫານງານຊາວໜຸ່ມ ກວຕ, ສະຫາຍ ນາງ ແກ້ວໄພວັນ ດວງສະຫວັນ, ປະທານສະຫະພັນແມ່ຍິງ ກວຕ ແລະ ສະຫາຍ ປອ. ນາງ ແກ້ວວິວອນ ອຸດທະຈັກ, ປະທານສະຫະພັນກຳມະບານ ກວຕ ໂດຍມີຜູ້ແທນສົມບູນເຂົ້າຮ່ວມທັງໝົດ 215 ສະຫາຍ, ຍິງ 122 ສະຫາຍ ແລະ ແຂກຖືກເຊີນ 29 ສະຫາຍ. 


 ກອງປະຊຸມໃຫຍ່ຄັ້ງນີ້ ໄດ້ລົງປະຊາມະຕິເປັນເອກະສັນກັນ ແລະ ຮັບຮອງເອົາບັນດາເນື້ອໃນທີ່ສຳຄັນຄື: 1) ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ, ທິດທາງຄາດໝາຍສູ້ຊົນກ່ຽວກັບວຽກງານ 4 ບຸກຂອງຊາວໜຸ່ມ; 2) ບົດສຳຫຼວດການຊີ້ນຳ-ນຳພາລວມ ຂອງຄະນະບໍລິຫານງານຊາວໜຸ່ມ ກະຊວງ ກວຕ ຊຸດເກົ່າ; 3) ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາຍເຫດບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບົດມະຕິກອງປະຊຸມໃຫຍ່ຜູ້ແທນຊາວໜຸ່ມ ທົ່ວປະເທດ ຄັ້ງທີ 07 ທີ່ຜ່ານມາ; 4) ກອງປະຊຸມຍັງໄດ້ຮັບຮອງເອົາທິດທາງ, ແຜນການ 5 ປີ ນັບແຕ່ນີ້ຮອດປີ 2024.


 ຄຽງຄູ່ກັນນັ້ນ, ບັນດາສະຫາຍເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າ ປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ວາງໄວ້. ພ້ອມນັ້ນ, ຜູ້ແທນກອງປະຊຸມໄດ້ພ້ອມກັນປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກວຕ ຊຸດໃໝ່ ຊຶ່ງມີຜູ້ລົງຮັບສະໝັກເລືອກຕັ້ງ 21 ສະຫາຍ, ຍິງ 06 ສະຫາຍ ແລະ ເລືອກໄດ້ 17 ສະຫາຍ, ຍິງ 05 ສະຫາຍ. ກອງປະຊຸມຄັ້ງປະຖົມມະລຶກໄດ້ເລືອກເອົາ ສະຫາຍ ພຸດທະສັກ ວິຈິດຕຣາ ເປັນຄະນະປະຈຳ, ເລຂາຄະນະບໍລິຫານງານຊາວໜຸ່ມ ກວຕ; ສະຫາຍ ຄຳຜາ ທອງວັນນາ ເປັນຄະນະປະຈຳ, ຮອງເລຂາຄະນະບໍລິຫານງານຊາວໜຸ່ມ ກວຕ ແລະ ທັງເປັນປະທານກວດກາ; ສະຫາຍ ນາງ ສິຣິລັກ ໄຊຍະບຸນຊູ ເປັນຄະນະປະຈຳ, ຮອງເລຂາຄະນະບໍລິຫານງານຊາວໜຸ່ມ ກວຕ; ສະຫາຍ ກົດລະຈິດ ມັງໜໍ່ເມກ ເປັນຄະນະປະຈຳ, ທັງຮອງປະທານກວດກາ; ສະຫາຍ ນາງ ສົມສະໄໝ ແພງສີ ເປັນຄະນະປະຈຳ, ຄະນະບໍລິຫານງານຊາວໜຸ່ມ ກວຕ; ສະຫາຍ ພອນປະເສີດ ສຸລິນທອນ ເປັນຄະນະປະຈຳ, ຄະນະບໍລິຫານງານຊາວໜຸ່ມ ກວຕ; ສະຫາຍ ບຸດສະກອນ ຫຼວງລາດ ເປັນຄະນະປະຈຳ, ຄະນະບໍລິຫານງານຊາວໜຸ່ມ ກວຕ; ສະຫາຍ ມັງກອນ ແກ້ວຄຳດີ ເປັນຄະນະກວດກາ, ຄະນະບໍລິຫານງານຊາວໜຸ່ມ ກວຕ; ສະຫາຍ ອານຸຄອນ ການະວົງ ເປັນຄະນະບໍລິຫານງານຊາວໜຸ່ມ ກວຕ, ສະຫາຍ ນາງ ມະນີລັດ ກິ່ນພູນສິນ ເປັນຄະນະບໍລິຫານງານຊາວໜຸ່ມ ກວຕ; ສະຫາຍ ສົມສັກ ອາລຸນສະຫວັດ ເປັນຄະນະບໍລິຫານງານຊາວໜຸ່ມ ກວຕ; ສະຫາຍ ປະສິດທິເດດ ຫຼວງວິໄລ ເປັນຄະນະບໍລິຫານງານຊາວໜຸ່ມ ກວຕ; ສະຫາຍ ນາງ ລິດດາວັນ ທິລະກຸນ ເປັນຄະນະບໍລິຫານງານຊາວໜຸ່ມ ກວຕ; ສະຫາຍ ນາງ ຫຼາວຄຳ ແສງປະທຸມມາ ເປັນຄະນະບໍລິຫານງານຊາວໜຸ່ມ ກວຕ, ສະຫາຍ ບິນລີ້ ສີສຸລາດ ເປັນຄະນະບໍລິຫານງານຊາວໜຸ່ມ ກວຕ; ສະຫາຍ ດາວວອນ ສີປະເສີດ ເປັນຄະນະບໍລິຫານງານຊາວໜຸ່ມ ກວຕ ແລະ ສະຫາຍ ວົງພະຈັນ ຈັດຕະວາກຸນ ເປັນຄະນະບໍລິຫານງານຊາວໜຸ່ມ ກວຕ.

ໂອກາດດຽວກັນ, ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ ຍັງໄດ້ໃຫ້ກຽດໂອລົມ ແລະ ປະກອບຄຳຄິດເຫັນຕໍ່ກອງປະຊຸມ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີນຳ-ນຳພາ ຂອງຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ກະຊວງວິທະຍາສາດ ແລະ ເຕັກໂນໂລຊີ ຊຸດເກົ່າ ທີ່ໄດ້ຊີ້ນຳ-ນຳພາ ພະນັກງານ ສະມາຊິກຊາວໜຸ່ມ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ, ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ກວຕ ຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ. ຈາກນັ້ນ, ສະຫາຍໄດ້ໃຫ້ທິດຊີ້ນຳວຽກງານແຕ່ລະດ້ານໃນທາງທີ່ສ້າງສັນ ຊຶ່ງສະຫາຍມີຄວາມເຊື່ອໝັ້ນຕໍ່ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ກວຕ ຊຸດໃໝ່ ທີ່ຈະສືບຕໍ່ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ ຂອງຄະນະບໍລິຫານງານຊາວໜຸ່ມ ກະຊວງວິທະຍາສາດ ແລະ ເຕັກໂນໂລຊີ ໃຫ້ສ້າງໄດ້ຜົນງານ ແລະ ມີຜົນສຳເລັດຍິ່ງໃຫຍ່ກວ່າເກົ່າ. 

ກອງປະຊຸມໃຫຍ່ຄັ້ງນີ້ ໄດ້ດໍາເນີນໄປເປັນເວລາເຄິ່ງວັນຈຶ່ງໄດ້ປິດລົງດ້ວຍຜົນສໍາເລັດອັນຈົບງາມ.

ພາບ ແລະ ຂ່າວ: ພະແນກຂ່າວສານ ແລະ ປະຊາສຳພັນ

Post a Comment

0 Comments