ຊົມເຊີຍ ເອັດສຊີຈີ ສານຕໍ່ມອບທຶນການສຶກສາ ໃນໂຄງການ “SCG Sharing the Dream” ປີທີ 8 ແລ້ວ



ໂຄງການມອບທຶນການສຶກສາ “SCG Sharing the Dream” ຈະເປັນການມອບໂອກາດທີ່ດີໃຫ້ກັບນ້ອງໆເຍົາວະຊົນທຸກຄົນທີ່ມີຄວາມມຸ່ງໝັ້ນຕັ້ງໃຈໃນການສຶກສາຮ່ຳຮຽນ ສາມາດພັດທະນາຕົນເອງໃຫ້ເປັນບຸກຄະລາກອນທີ່ມີຄຸນ ຄ່າ ແລະ ປະໂຫຍດໃຫ້ແກ່ຕົນເອງ ແລະ ສັງຄົມກໍຄືປະເທດຊາດໃນອະນາຄົດ.

 ເມື່ອວັນທີ 17 ທັນວາ 2019 ທີ່ສູນກີລາບູໂດ ນະຄອນຫຼວງວຽງຈັນ ໂດຍບໍລິສັດເອັດສຊີຈີຮ່ວມກັບກະຊວງສຶກສາທິການ ແລະ ກີລາ ແລະ ສະມາຄົມຮ່ວມນໍ້າໃຈກັບເດັກນ້ອຍລາວເພື່ອສານຕໍ່ໂຄງການ “SCG Sharing the Dream” ໃນ ສປປ ລາວ ຊຶ່ງປີນີ້ຖືເປັນປີທີ 8 ແລະ ນີ້ກໍເປັນໜຶ່ງໃນກິດຈະກໍາເພື່ອສັງຄົມຂອງເອັດສຊີຈີທີ່ມຸ່ງເນັ້ນການພັດທະນາ ແລະ ສົ່ງເສີມທ່າແຮງຂອງບັນດາເຍົາວະຊົນຂອງບັນດາປະເທດໃນອາຊຽນ ທັງເພື່ອສ້າງໂອກາດທາງການສຶກສາໃຫ້ເຍົາວະຊົນທີ່ເປັນຄົນເກັ່ງ ແລະ ມີມາລະຍາດດີ, ມີຄວາມກະຕັນຍູແຕ່ຂາດເຂີນທຶນຮອນ ເພື່ອເປັນຜູ້ສືບທອດສ້າງສາພັດທະນາປະເທດຊາດອະນາຄົດ.



 ໂດຍການເຂົ້າຮ່ວມຂອງ ທ່ານ ອຸຣະວະດີ ສີພິຣົມ ເອກອັກຄະລາຊະທູດໄທປະຈຳ ສປປ ລາວ, ທ່ານ ນາງ ປອ ດາລາວອນ ກິດຕິພັນ ຮັກສາການຫົວໜ້າຫ້ອງການກະຊວງສຶກສາທິການ ແລະ ກີລາ, ທ່ານ ພູທອນ ແສງດາວົງ ຮອງຫົວໜ້າພະແນກສຶກສາທິການ ແລະ ກີລານະຄອນຫຼວງວຽງຈັນ, ທ່ານ ວິໂຣດ ຣັດຕະນະໄຊສິດ Head of Distribution and Retail Business ບໍລິສັດເອັດຊີຈີ ຊີມັງ-ຜະລິດຕະພັນກໍ່ສ້າງ ຈຳກັດ, ມີບັນດາແຂກຖືກເຊີນພ້ອມດ້ວຍພາກສ່ວນກ່ຽວຂ້ອງ ແລະ ບັນດານ້ອງນັກຮຽນ-ນັກສຶກສາທີ່ໄດ້ຮັບທຶນເຂົ້າຮ່ວມຢ່າງຫຼວງຫຼາຍ.
 ໂອກາດດັ່ງກ່າວທ່ານ ປອ ດາລາວອນ ກິດຕິພັນ ໄດ້ກ່າວວ່າ: “ຂ້າພະເຈົ້າຂໍຂອບໃຈທາງບໍລິສັດເອັດສຊີຈີທີ່ໄດ້ໃຫ້ການສະໜັບສະ ໜຸນ ແລະ ຊຸກຍູ້ໃຫ້ມີໂຄງການດີໆແບບນີ້, ຊຶ່ງປີນີ້ກໍຖືເປັນປີທີ 8 ທີ່ເອັດສຊີຈີໃຫ້ສະໜັບສະໜຸນນັກຮຽນໃນ ສປປ ລາວ ແລະ ຂໍຂອບໃຈຜູ້ອໍານວຍການໂຮງຮຽນ, ຄູ- ອາຈານທີ່ໃສ່ໃຈປະຕິບັດໜ້າທີ່ຂອງຕົນໃຫ້ດີຂຶ້ນໄປເລື້ອຍໆເພື່ອບັນລຸຜົນສຳເລັດໃນການຈັດ ຕັ້ງປະຕິບັດແຜນພັດທະນາການສຶກສາໃຫ້ມີການພັດທະນາທີ່ມີຄຸນນະພາບດີຂຶ້ນຕາມນະໂຍບາຍຂອງກະຊວງສຶກສາທິການ ແລະ ກີລາ, ຕະຫຼອດເຖິງນ້ອງນັກຮຽນ-ນັກສຶກສາກໍຂໍໃຫ້ຕັ້ງໃຈສຶກສາຮໍ່າຮຽນ ແລະ ເຮັດຄວາມດີໃຫ້ສົມກັບທີ່ຖືກໄວ້ວາງໃຈສຳລັບທຶນທີ່ໄດ້ຮັບໃນຄັ້ງນີ້”.


ຂະນະທີ່ ທ່ານ ວິໂຣດ ຣັດຕະນະໄຊສິດ ກ່າວວ່າ: “ເອັດສຊີຈີເຊື່ອວ່າປະເທດຊາດຈະເຂັ້ມແຂງໄດ້ກໍ່ຕ້ອງເລີ່ມຈາກ “ຄົນ” ທີ່ມີຄຸນ ນະພາບຊຶ່ງບໍ່ໄດ້ໝາຍເຖິງແຕ່ຄົນເກັ່ງ ຫຼື ຄົນທີ່ມີຄວາມສາມາດຢ່າງດຽວເທົ່ານັ້ນ, ແຕ່ຕ້ອງເປັນຄົນດີ, ກະຕັນຍູຕໍ່ຄອບຄົວ-ຊຸມ ຊົນ-ສັງຄົມ ແລະ ຕົນເອງ. ນອກຈາກນັ້ນ ເອັດສຊີຈີຍັງເຫັນຄວາມສຳຄັນຂອງຄວາມໄຝ່ຝັນ ແລະ ຄວາມມຸ່ງຫມັ້ນຈຶ່ງຢາກເຊີນ ຊວນໃຫ້ນ້ອງໆທຸກຄົນ ຮ່ວມຈຸດປະກາຍຄວາມໄຝ່ຝັນ ແລະ ຄວາມມຸ່ງຫມັ້ນສູ່ຄວາມສຳເລັດໃນອະນາຄົດ ແລະ ສະແດງໃຫ້ເຫັນວ່າຄວາມໃຝ່ຝັນຄືພະລັງສຳຄັນທີ່ເປັນຈຸດເລີ່ມຕົ້ນໄປສູ່ການພັດທະນາສັງຄົມ ແລະ ປະເທດຊາດໃຫ້ກ້າວຕໍ່ໄປໃນອະນາຄົດ”.



 ເອັດສຊີຈີມຸ່ງຊຸກຍູ້ໂຄງການຕ່າງໆທີ່ຊ່ວຍພັດທະນາບຸກຄະລາກອນຂອງປະເທດຜ່ານການສົ່ງເສີມດ້ານການສຶກສາ, ຊຶ່ງເປັນທີ່ມາຂອງໂຄງການທຶນການສຶກສາ “SCG Sharing the Dream” ໃນພູມີ ພາກອາຊຽນເຊັ່ນ: ລາວ, ໄທ, ຫວຽດນາມ, ອິນໂດ ເນເຊຍ, ຟິລິບປິນ, ກຳປູເຈຍ ແລະ ມຽນມາ ຊຶ່ງປັດຈຸບັນໂຄງການໄດ້ມອບທຶນການສຶກສາໃຫ້ນັກຮຽນປີລະຫຼາຍກວ່າ 6.000 ຄົນທົ່ວພູມີພາກອາຊຽນເພື່ອຮ່ວມພັດທະນາປະເທດທີ່ເອັດສຊີຈີເຂົ້າໄປດຳເນີນທຸລະກິດ, ສຳລັບ ສປປ ລາວ ເອັດສຊີຈີກໍໄດ້ດຳ ເນີນໂຄງການນີ້ດ້ວຍຄວາມຕັ້ງໃຈ ແລະ ໃສ່ໃຈຢ່າງຕໍ່ເນື່ອງຕະຫຼອດ 8 ປີ ແລະ ໃນປີນີ້ມອບທຶນການສຶກສາລະດັບມັດທະຍົມຕອນປາຍລວມ 300 ທຶນ ໃນນັ້ນ ນະຄອນຫຼວງວຽງຈັນມີ 160 ທຶນ ແລະ ແຂວງຄຳມ່ວນຈຳນວນ 140 ທຶນ. ສ່ວນທຶນການສຶກສາລະດັບປະລິນຍາຕີໃນປີນີ້ມີທັງໝົດ 18 ທຶນ ຊຶ່ງທຶນດັ່ງກ່າວຈະມຸ່ງເນັ້ນສະໜັບສະໜຸນນັກສຶກສາທີ່ມີຄວາມໄຝ່ຝັນໃນການສໍາເລັດການສຶກສາ ແລະ ປະກອບອາຊີບເພື່ອເປັນກໍາລັງສໍາຄັນໃນການພັດທະນາປະເທດຕໍ່ໄປ.

ທັງນີ້ ເອັດສຊີຈີເລີ່ມດໍາເນີນທຸລະກິດໃນ ສປປ ລາວ ຕັ້ງແຕ່ປີ 2003 ດໍາເນີນທຸລະກິດພາຍໃຕ້ 4 ບໍລິສັດຄື: Khammouane Cement Limited (KCL), SCG International Laos Co., Ltd., CPAC Lao ແລະ SCG Logistics (Lao) ເພື່ອຜະລິດ ແລະ ຈໍາໜ່າຍຊີມັງ, ວັດສະດຸກໍ່ສ້າງແລະ ເຄື່ອງຕົບແຕ່ງຄົວເຮືອນແບບຄົບວົງຈອນ, ສໍາລັບທຸກຄວາມຕ້ອງການຂອງຜູ້ບໍລິໂພກພາຍໃຕ້ຍີ່ ຫໍ້ SCG ແລະ Cotto ເຊັ່ນ: ສິນຄ້າກຸ່ມຫຼັງຄາ, ຝ້າ, ຝາຜະໜັງ ແລະ ເພດານ, ກາໂລ້ເຊຣາມິກ, ສະນວນກັນຄວາມຮ້ອນ, ສຸຂະພັນກ໊ອກນໍ້າ ແລະ ຄອນກຣີດຜະສົມ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
Twitter ID: @tholakhong
tholakhong@gmail.com | www.tholakhong.com


------------------------------------------


Post a Comment

0 Comments